រាជធានីភ្នំពេញ ៖ ហាងផឹកស៊ីយីហោពន្លឺ ឡុង ឈិន ខឹងរថយន្តក្រុមហ៊ុនស៊ីនទ្រី មិនព្រមមកយកសំរាមមុខហាងខ្លួន ខឹងពេកបានប្រើកូនចៅយកសំរាមទៅជះពេញថ្នល់ធ្វើឲ្យអ្នកធ្វើដំណើរឆ្លងកាត់ទីនោះពិបាកធ្វើដំណើរ ដោយខឹងសម្បារនឹងទង្វើអសីលធម៌របស់ថៅកែហាង ស្រែករកអាជ្ញាធរពាក់ព័ន្ធជួយព្រមានម្ចាស់ហាងនោះផង ដែលហេតុការណ៍ហួសចិត្តនេះបានកើតឡើងកាលពីវេលាម៉ោង១១និង៣០នាទីយប់ថ្ងៃទី៣១ ខែកក្កដា នៅតាមបណ្តោយផ្លូវវេងស្រេង ចំណុចហាងផឹកស៊ី យីហោ ពន្លឺ ឡុង ឈិន ភូមិដំណាក់ធំ២ សង្កាត់ស្ទឹងមានជ័យ៣ ខណ្ឌមានជ័យ ។
តាមចម្លើយរបស់ក្រុមបុគ្គលិកក្រុមហ៊ុនស៊ីនទ្រីបានឆ្លើយប្រាប់ឲ្យដឹងថា មុនមានការភ្ញាក់ផ្អើល គឺក្រុមពួកគាត់បើករថយន្ត និងដើរប្រមូលសំរាមតាមបណ្តោយផ្លូវនោះលុះមកដល់កន្លែងហាងនោះរថយន្តប្រមូលសំរាមទើសនឹងរថយន្តភ្ញៀវចតនៅលើផ្លូវសាធារណៈមុខហាងមួយគ្រឿង ហើយខាងបុគ្គលិកប្រមូលសំរាមបានប្រាប់ទៅខាងម្ចាស់រថយន្តឲ្យបើករថយន្តចេញបន្តិច ដើម្បីចូលរថយន្តប្រមូលសំរាម តែត្រូវខាងម្ចាស់ហាងខឹងនឹងស្រែកសម្លុតពួកគាត់ហើយមិនព្រមថយរថយន្តចេញទេ ថែមទាំងបញ្ជាឲ្យចតរថយន្តប្រមូលសម្រាមទន្ទឹមគ្នាប្រមូលសំរាមទៅ ហើយខាងក្រុមអ្នកប្រមូលសំរាមបានប្រាប់ថា បើចតទន្ទឹមគ្នានឹងបាំងផ្លូវគេធ្វើដំណើរ ព្រោះសំរាមច្រើន តែខាងម្ចាស់ហាងថា បើយកមិនបាន ពួកហ្អែងមិនបាច់យកសំរាមនឹង លឺដូច្នោះពួកគាត់ក៏មិនយកសំរាមនោះទេ ហើយបានបើករថយន្តទៅមុខប្រមូលសំរាមបន្តក៏ត្រូវខាងម្ចាស់ហាងនឹងបក្សពួកខឹងចេញមកស្រែកឡូឡា មើលងាយពួកគាត់ជាបុគ្គលិកប្រមូលសំរាមនឹងបានយកកាំបិតទៅកាប់ទ្វាររថយន្តស៊ីនទ្រីទៀត ហើយថែមទាំងបញ្ជាឲ្យកូនចៅយកសំរាមទៅជះនៅកណ្តាលថ្នល់មុខហាង ពាសពេញដងផ្លូវ ធ្វើប្រជាពលរដ្ឋដែលធ្វើដំណើរកាត់ទីនោះ ហើយពិបាកធ្វើដំណើរ ដោយមានការខឹងសម្បារយ៉ាងខ្លាំង នឹងមិនពេញចិត្តនឹងទង្វើថៅកែរហាង ដែលគ្មានសុជីវធម៌ នឹងស្រែកស្តីបន្ទោសពេញៗមាត់ ។
ភ្លាមៗនោះក៏មានវត្តមានសមត្ថកិច្ចមូលដ្ឋាន និងខាងតំណាងរថយន្តស៊ីនទ្រីចុះទៅសម្របសម្រួល ដោយឲ្យខាងម្ចាស់ហាងឆាប់ប្រមូលសំរាមដែលខ្លួនយកចាក់កណ្តាលថ្នល់ចេញទៅដាក់កន្លែងដើមវិញ ហើយខាងម្ចាស់ហាងព្រមក៏ប្រើកូនចៅឲ្យប្រមូលមកវិញនឹងឲ្យរថយន្តស៊ីនទ្រីមកយកសំរាមនោះ ដើម្បីបញ្ចប់រឿង ៕
ចែករំលែកព័តមាននេះ