ប្រទេសរុស្ស៊ី និងស៊ីរី ៖ ឯកអគ្គរដ្ឋទូតរុស្ស៊ីប្រចាំអ៊ីស្រាអែលថ្លែងនាថ្ងៃទី៣០ កក្កដាថា រុស្ស៊ីពុំអាចចាប់បង្ខំកងទ័ពអ៊ីរ៉ង់ដែលជួយទ្រទ្រង់ដល់លោកបាចាអាល់អាសាដឲ្យចាកចេញពីស៊ីរីឡើយ។ នោះជាការបដិសេធសំណើតាំងពីយូរមកហើយក្នុងន័យនេះរបស់អ៊ីស្រាអែល។
ឯកអគ្គរដ្ឋទូតរូបនេះលោកអាណាតូលីវិកតូរ៉ូវបញ្ជាក់ថា ក៏ដោយសារហេតុផលនោះដែរដែលក្រុងមូស្គូ ពុំអាចរារាំងការវាយប្រហាររបស់អ៊ីស្រាអែលប្រឆាំងកងទ័ពអ៊ីរ៉ង់ដែលស្ថិតក្នុងដែនដីស៊ីរី។ លោកវិកតូរ៉ូវ គ្រាន់តែគូសបញ្ជាក់ប្រាប់ទូរទស្សន៍អ៊ីស្រាអែលCHANEL10 ថា កងទ័ពស៊ីរីនឹងដាក់ពង្រាយក្នុងបណ្ដាតំបន់ ដែលដណ្ដើមកាន់កាប់ក្រោយការចាកចេញរបស់ពួកឧទ្ទាមនាភាគភាគនិរតីប្រទេស រហូតដល់ខ្ពង់រាបហ្គោឡង់ កាន់កាប់ដោយកងទ័ពអ៊ីស្រាអែល។
កាលពីសប្ដាហ៍មុន អ្នកទទួលខុសត្រូវអ៊ីស្រាអែលម្នាក់ធ្លាប់គូសបញ្ជាក់ថា រុស្ស៊ីបានស្នើឲ្យកងទ័ពអ៊ីរ៉ង់ ស្ថិតនៅចម្ងាយយ៉ាងតិច១០០គីឡូម៉ែត្រពីខ្សែបន្ទាត់ឈប់បាញ់គ្នានៅខ្ពង់រាបហ្គោឡង់។ ចំណែករដ្ឋាភិបាលអ៊ីស្រាអែលបានបដិសេធសំណើនេះដោយវាយតម្លៃថា មិនគ្រប់គ្រាន់។
លោកវិកតូរ៉ូវបន្តថា អ៊ីរ៉ង់ដើរតួនាទីសំខាន់បំផុតក្នុងការខិតខំប្រឹងប្រែងរួមរបស់យើងដើម្បីកម្ទេចពួកភេរវករនៅស៊ីរី។ ដោយសារហេតុផលបែបនេះទើបយើងចាត់ទុកជារឿងពុំប្រាកដនិយម រាល់សំណើបណ្ដេញកងទ័ពបរទេសពីស៊ីរីទាំងមូល។
ទោះបីប្រកាន់ជំហរអព្យាក្រិត អ៊ីស្រាអែលបានធ្វើការវាយប្រហារតាមអាកាសជាច្រើននៅស៊ីរីប្រឆាំងបណ្ដាគោលដៅសន្មត់ថា ជារបស់អ៊ីរ៉ង់ និងសម្ព័ន្ធមិត្ត កងជីវពលលីបង់ក្រុមហេសប៊ុលឡាហ៍។ រីឯទូរស័ព្ទក្រហមមួយត្រូវបានបង្កើតឡើងកាលពីឆ្នាំ២០១៥រវាងអ៊ីស្រាអែលនិងរុស្ស៊ី ដើម្បីចៀសវាងគ្រោះថ្នាក់នានារវាងកងទ័ពប្រទេសទាំង២នៅស៊ីរី។
កងទ័ពស៊ីរីពេលនេះកំពុងឈានទៅដណ្ដើមកាន់កាប់តំបន់ចុងក្រោយនាភាគនិរតីប្រទេសដែលស្ថិតក្នុងដៃពួកបះបោរនៅឡើយ។ ស៊ីរីបានបើកការវាយលុកធំមួយពីថ្ងៃទី១៩ មិថុនា មក នាភាគនិរតីប្រទេស ហើយរុលទៅមុខយ៉ាងឆាប់ជាមួយការជួយទ្រទ្រង់ពីកងយន្តហោះរុស្ស៊ី ក្នុងខេត្តដឺរ៉ាអា និងខេត្តគូណីត្រា ជិតខ្ពង់រាបហ្គោឡង់ កាន់កាប់មួយផ្នែកដោយអ៊ីស្រាអែល៕
ចែករំលែកព័តមាននេះ