ខេត្តប៉ៃលិន ៖ ករណីទុស្សេខ្សែភ្លើងនៅកន្លែងចិញ្ចឹមជ្រូកមួយកន្លែង បណ្តាលឱ្យឆេះរោងនិងងាប់អស់ជ្រូកចំនួន៤ក្បាល ខណ:ម្ចាស់ងើបពីវេលារំលងអធ្រាត្រ នាំគ្នាចាប់ជ្រូកមួយក្បាលដើម្បីកាប់សម្រាប់ធ្វើពិធី ជប់ លៀង ។ លុះម្ចាស់ជាប់រវល់ដើរទៅអង្គុយជជែកគ្នាលេងឯផ្ទះអ្នកជិតខាង ស្រាប់តែមានអណ្តាតភ្លើងហុយចេញពីរោងចិញ្ចឹមជ្រូក ក៏ភ្ញាក់ផ្អើលនាំគ្នាពន្លត់ ។
ហេតុការណ៍នេះ បានកើតឡើងកាលពីវេលាម៉ោង៤ និង៣៦នាទីទៀបភ្លឺថ្ងៃទី៣០ ខែកក្កដា នៅក្បែរជើង ភ្នំកុយ ក្នុងភូមិភ្នំកុយ ឃុំសាលាក្រៅ ស្រុកសាលាក្រៅ ។ ម្ចាស់រោងចិញ្ចឹមជ្រូកនេះឈ្មោះ ឡូត សាវឿង ភេទប្រុស អាយុ៣៤ឆ្នាំ ប្រពន្ធឈ្មោះ កែវ សារឿន អាយុ៣២ឆ្នាំ រស់នៅក្នុងភូមិ ឃុំខាងលើ ។
ប្រភពព័ត៌មានពីម្ចាស់ជ្រូកឱ្យដឹងថា មុនពេលកើតហេតុ រូបគាត់និងអ្នកជិតខាង២ទៅ៣នាក់ បានងើបចាប់ជ្រូក១ក្បាល ត្រៀមកាប់ដើម្បីរៀបចំធ្វើកម្មវិធីជប់លៀង ។ ដោយដាំទឹកមិនទាន់ពុះ គាត់ក៏ដើរទៅផឹកស្រានៅមុខផ្ទះជាមួយមិត្តភក្តិទាំងនោះ ស្រាប់តែឮសូរសំឡេងជ្រូកគាត់ស្រែកផ្អើលពេញទ្រុង ។
ប្រភពដដែលបន្តថា ពេលនោះគាត់ក៏នាំគ្នាទុកកំប៉ុងស្រាបៀរចោល ប្រញាប់រត់ទៅមើលទ្រុងជ្រូក ស្រាប់ តែឃើញអណ្តាតភ្លើងឆេះសន្ធោសន្ធៅ ទើបអ្នកខ្លះរត់ទៅបិទបារ៉ែតភ្លើង អ្នកខ្លះទៀតរត់ទៅដងទឹកជះពន្លត់ ។ លុះគាត់ក្រឡេកមើលទៅជ្រូករបស់ខ្លួននៅក្នុងទ្រុង ឃើញមាន៤ក្បាលកំពុងប្រកាច់ងាប់ ដោយសារក្តៅខ្លាំងពេក ក៏យកចេញមកខាងក្រៅ ។
ក្រោយពេលកើតហេតុ លោកអធិការនគរបាលស្រុកសាលាក្រៅ បានដឹកនាំកម្លាំងនគរបាលឃុំសាលាក្រៅចុះទៅត្រួតពិនិត្យមើលកន្លែងកើតហេតុ និងសន្និដ្ឋានថា ការឆេះរោងចិញ្ចឹមជ្រូកនេះ ដោយសារឆ្លងចរន្តខ្សែភ្លើងណាមួយនៅក្នុងរោង ហើយបណ្ដាលឱ្យទុស្សេឆេះដល់ដំបូល ហើយដោយសារអត់មានពន្លត់ទាន់ទើបបណ្តាលឱ្យឆេះទាំងជ្រូកងាប់បែបនេះ ៕
ចែករំលែកព័តមាននេះ