ខេត្តត្បូងឃ្មុំ ៖ លោក លី ឡេង អភិបាលនៃគណៈអភិបាលខេត្តបានអញ្ចើញចុះពិនិត្យមើលពីស្ថានភាពពលរដ្ឋដែលរងគ្រោះ ដោយទឹកជំនន់ទន្លេមេគង្គចំនួនជិត២០០គ្រួសារកំពុងតែស្នាក់នៅលើទួលមានសុវត្ថិភាព ភូមិទន្លេបិទលើ ឃុំទន្លេបិទ ស្រុកត្បូងឃ្មុំ…
ខេត្តត្បូងឃ្មុំ ៖ លោក លី ឡេង អភិបាលនៃគណៈអភិបាលខេត្តបានអញ្ចើញចុះពិនិត្យមើលពីស្ថានភាពពលរដ្ឋដែលរងគ្រោះ ដោយទឹកជំនន់ទន្លេមេគង្គចំនួនជិត២០០គ្រួសារកំពុងតែស្នាក់នៅលើទួលមានសុវត្ថិភាព ភូមិទន្លេបិទលើ ឃុំទន្លេបិទ ស្រុកត្បូងឃ្មុំ នាព្រឹកថ្ងៃទី៣១ ខែកក្កដា ឆ្នាំ២០១៨នេះ ដោយបានជម្រុញដល់អាជ្ញាធរមូលដ្ឋានត្រូវតែយកចិត្តទុកដាក់រៀបចំឲ្យមានទឹកស្អាតប្រើប្រាស់រួមជាមួយគ្រូពេទ្យប្រចាំការ ហើយសមត្ថកិច្ចវិញក៏ជួយការពារដល់ពួកគាត់ផងដែរ ។
លោក យូ សេត អាយុ៤១ឆ្នាំ នៅភូមិព្រែកតូច ឃុំទន្លេបិទ ប្រាប់ឲ្យដឹងថា ផ្ទះរបស់គាត់នៅតាមជួរដងទន្លេមេគង្គហើយត្រូវបានទឹកទន្លេឡើងមកជន់លិចដល់ក្រោមផ្ទះហើយថែមទាំងហូរ និងបារម្ភខ្លាចកូនចុះលេងទឹកលង់ស្លាប់ប្រសិនបើធ្វេសប្រហែសមិនបានមើល ។ ហេតុដូច្នេះហើយទើបគាត់បាននាំប្រពន្ធកូនមករស់នៅទីទួលសុវត្ថិភាព ។
លោកប្រាប់បន្តថា គាត់មករស់នៅកន្លែងថ្មីជាបណ្តោះអាសន្ននេះដោយជួបបញ្ហារកង្វះទឹក
ស្អាតប្រើប្រាស់ទើបតែនៅព្រឹកថ្ងៃទី៣១ កក្កដា ត្រូវបានកងកម្លាំងនគរបាលស្រុកត្បូងឃ្មុំ បានដឹកនាំ១រថយន្តមកបង្ហូរដាក់ក្នុងស៊ីទែនសម្រាប់ចែកជូនឲ្យពលរដ្ឋប្រើប្រាស់ ។
ចំណែកបង្អន់អនាម័យវិញដឹកមកដល់កន្លែងហើយតែមិនទាន់បានតម្លើងឲ្យពលរដ្ឋបន្ទោរបង់រាល់ថ្ងៃគាត់បត់ជើងធំក្នុងទឹកបឹងមានផលវិបាកហើយក៏ខ្លាចប្រឈមនឹងជំងឺផ្សេងៗរាគរូសជាដើម ។
ជាមួយនោះគោចំនួន០៦ក្បាលក៏ពិបាកនឹងរកចំណីឲ្យស៊ី ត្រូវជិះទូកទៅក្រោយភូមិសុំដើមពោតពីអ្នកភូមិដែលទឹកឡើងមកលិចយកមកឲ្យគោហើយក៏សំណូមពរដល់ពេទ្យសត្វ មេត្តាជួយចាក់ថ្នាំវាក់សាំងដល់គោរបស់ពលរដ្ឋរាប់សិបក្បាលដែលដឹកគេចពីទឹកជំនន់មករស់នៅទួលសុវត្ថិភាពទន្លេបិទ ។
ស្ត្រីខ្មែរអ៊ិស្លាមឈ្មោះ អ៊ែល រៀម អាយុ៥៨ឆ្នាំ នៅភូមិព្រែកតូចប្រាប់ថា កន្លងទៅថ្មីៗនេះគាត់ធ្លាប់បានសំណូមពរដល់អាជ្ញាធរស្រុកក៏ដូចជាខេត្ត ដោយសូមឲ្យមានទឹកស្អាតប្រើប្រាស់នៅទួលសុវត្ថិភាព នូវទីបំផុតក៏បានឆ្លើយតបមែននាព្រឹកថ្ងៃទី៣១ កក្កដា នេះបានទឹកស្អាតប្រើ
ប្រាស់សម្រាប់ដាំបាយ និងធ្វើម្ហូបពិសារ ។ ជាមួយនោះក៏មានពេទ្យនៅប្រចាំការថែមទៀតសម្រាប់ជួយដល់ពលរដ្ឋដែលមានជំងឺផ្សេងៗអាចមកទទួលយកសេវ៉ាព្យាបាលដោយមិនយកកំរៃនោះទេ ។
លោកវរសេនីយ៏ឯក សួស ស៊ាងលី អធិការនគរបាលស្រុកត្បូងឃ្មុំប្រាប់ថា ប្រជាពលរដ្ឋមកពីតាមបណ្តាភូមិនានាជាច្រើនដែលរងគ្រោះដោយលិចលង់ពីជំនន់ទន្លេមេគង្គបាននាំគ្នាមករស់នៅបណ្តោះអាសន្ននៅទីទួលសុវត្ថិភាព ឃុំទន្លេបិទ ស្រុកត្បូងឃ្មុំ ដោយទទួលបានបញ្ជារពីលោកអភិបាលខេត្តក៏ដូចជាលោកឧត្តមសេនីយ៏ទោ បែន រ័ត្ន ស្នងការនគរបាលខេត្ត ដោយរូបលោកបានដឹកទឹកស្អាតយកមកបែងចែកឲ្យពលរដ្ឋប្រើប្រាស់នៅព្រឹកថ្ងៃទី៣១ កក្កដា ៕
ចែករំលែកព័តមាននេះ