រាជធានីភ្នំពេញ ៖ តារាសម្តែងសិរី វិទ្យា មិនអាចនៅស្ងៀមបានបន្ទាប់ពីឃើញនារីម្នាក់រងគ្រោះដោយទឹកអាស៊ីតខូចមុខមាត់រស់នៅយ៉ាងលំបាក ។ លោកសិរី វិទ្យា ព្យាយាមរកមធ្យោបាយផ្សេងៗដើម្បីប្រមូលប្រាក់ជួយតាមលទ្ឋភាព។ លោកវិទ្យា បានប្រមូលសម្លៀកបំពាក់ដែលលោកបានប្រើប្រាស់រួចលក់ឡាយឡុង និងបានបរិច្ចាគប្រាក់ទាំងនោះទៅឲ្យស្ត្រីរងគ្រោះដ៏គួរឲ្យអាសូរម្នាក់នោះ ។
តារាសម្តែង និងចម្រៀងលោកសិរី វិទ្យា ឲ្យដឹងកាលពីពេល ថ្មីៗកន្លងមកថា ពីដំបូងលោកមានបំណងបញ្ចេញសម្លៀកបំពាក់ដែលលោកធ្លាប់ស្លៀករួចប្រកាសលក់នៅតាមហ្វេសប៊ុក ហើយយកលុយទាំងអស់សម្រាប់ចូលរួមការងារមនុស្សធម៌ ។ ប៉ុន្តែក្រោយពីលោកបានឃើញអំពីស្ថានភាពដ៏គួរឲ្យអាណិតរបស់នារីដែលរងគ្រោះដោយទឹកអាស៊ីត និងមានមុខរបរចាក់កន្សែងលក់ ដែលគេបានផ្សព្វផ្សាយតាមហ្វេសប៊ុក លោកក៏ទាក់ទងដើម្បីជួបស្ត្រីនោះផ្ទាល់ ។
ក្រោយពេលលោកជួបផ្ទាល់លោកកាន់តែអាណិតក្រោយពីបានយល់ពីស្ថានភាពដែលរស់នៅក្នុងភាពពិការភ្នែក រូបរាងរងដោយទឹកអាស៊ីដស្ទើរមើលពុំយល់ ហើយរកស៊ីចាកកន្សែងរយៈពេល២ថ្ងៃទើបចាក់បានមួយ។ ទោះជាពិការ និងស្ថិតក្នុងជីវភាពខ្វះខាត ប៉ុន្តែនាងតស៊ូខ្លាំងទើបលោកមានបំណងជួយទៅដល់ស្ត្រីរូបនោះ ។
បើទោះបីជាការចូលរួមចំណែកនេះមិនធំធេង ប៉ុន្តែលោកសិរី វិទ្យា សប្បាយចិត្តនឹងធ្វើ និងមានបំណងឲ្យប្រជាពលរដ្ឋខ្មែរបន្តការចែករំលែកសេចក្តីស្រលាញ់ ជួយគ្នាទៅតាមលទ្ធភាពដែលអាចធ្វើទៅបានទៅកាន់អ្នកក្រីក្រ ខ្វះទីពឹងក្នុងនាមជាខ្មែរដូចគ្នា ។
ទោះជាយ៉ាងណាក្តីតារាសម្តែងរូបនេះបញ្ជាក់ថា សកម្មភាពសប្បុរសធម៌ដែលលោកធ្លាប់បានជួយ និងចូលរួមកន្លងមកមិនមែនលោកចង់បានប្រជាប្រិយភាព ឬភាពលេចធ្លោមួយនោះទេ គឺលោកចង់ឲ្យប្រជាជនខ្មែរបន្តជួយឈឺឆ្អាលពីសុខទុក្ខគ្នា ហើយក៏ផ្តើមចេញពីមនុស្សក្នុងសង្គមតែមួយនេះឯង ៕
ចែករំលែកព័តមាននេះ