ទីក្រុងហាណូយ ៖ ប្រទេសវៀតណាមបានក្លាយជាដៃគូពាណិជ្ជកម្មធំជាងគេរបស់ប្រទេសចិនជាលើកដំបូង ក្នុងចំណោមប្រទេសនៅក្នុងតំបន់អាស៊ាន ។ ពាណិជ្ជកម្មរវាងប្រទេសទាំងពីរ (ចិន-វៀតណាម) បានកើនឡើងដល់ចំនួន១០ប៊ីលានដុល្លារជារៀងរាល់ខែនៃឆ្នាំ២០១៨នេះ ។
ទីប្រឹក្សាផ្នែកសេដ្ឋកិច្ច និងពាណិជ្ជកម្មនៅស្ថានទូតចិន ប្រចាំប្រទេសវៀតណាម លោក Hu Suo Jin បាននិយាយកាលពីថ្ងៃព្រហស្បតិ៍ថា ៖« កាលពីខែមិថុនា ឆ្នាំ២០១៨នេះ ពាណិជ្ជកម្មរវាងប្រទេសទាំងពីរស្មើនឹង១១,២ប៊ីលានដុល្លារ គឺច្រើនជាងការធ្វើពាណិជ្ជកម្មរវាងប្រទេសចិន និងម៉ាឡេស៊ី ដែលស្មើតែ៩,៣ប៊ីលានដុល្លារប៉ុណ្ណោះ » ។
កាលពីឆមាសទី១ឆ្នាំនេះ ការធ្វើពាណិជ្ជកម្មទ្វេភាគីបានលូតលាស់រហូតដល់២៨,៨% ខ្ពស់ជាងការធ្វើពាណិជ្ជកម្មរវាងប្រទេសចិន និងម៉ាឡេស៊ី ដែលកើនឡើងបានតែ១៥,៥% ប៉ុណ្ណោះ ។
លោក Hu Suo Jin បានបញ្ជាក់ថា ទំនាក់ទំនងសេដ្ឋកិច្ចរវាងប្រទេសទាំងពីរ គឺស្ថិតក្នុងពេលដ៏ល្អបំផុតក្នុងប្រវត្តិសាស្ត្រ ហើយភ្នាក់ងាររបស់ប្រទេសទាំងពីរកំពុងតែដោះស្រាយបញ្ហាឱនភាពពាណិជ្ជកម្មរបស់វៀតណាមផងដែរ ។
លោកបន្តថា ពួកគេបានសហការជាមួយមន្ត្រីនៅតាមខេត្ត ដើម្បីសម្របសម្រួលការនាំចូលកសិផលរបស់វៀតណាម ។
លោក Hu Suo Jin បានបន្ថែមថា ៖«ការកកស្ទះនៅតាមព្រំប្រទល់ គឺមិនមែនមកពីការខ្វះខាតគោលនយោបាយរបស់អាជ្ញាធរនៃប្រទេសទាំងពីរទេ ប៉ុន្តែមកពីកំណើនការផ្លាស់ប្តូរផលិតផលរវាងចិន និងវៀតណាម » ។
អគ្គរដ្ឋទូតរងរបស់ប្រទេសចិន ប្រចាំវៀតណាម លោក Yin Haihon ក៏បានប្រកាសដែរថា នឹងមានការធ្វើទស្សនកិច្ចថ្នាក់ខ្ពស់នៅចុងឆ្នាំ២០១៨នេះ ។ លោកសន្យាថា ស្ថានទូតចិននឹងខិតខំប្រឹងប្រែងជំរុញក្រុមហ៊ុនចិនមកវិនិយោគក្នុងប្រទេសវៀតណាម ៕
ចែករំលែកព័តមាននេះ