តាមប្រភពព័ត៌មាន Goal បានឲ្យដឹងថា គ្រូបង្វឹកក្លិប Atletico Madrid សញ្ជាតិអាហ្សង់ទីន Diego Simeone បានបកស្រាយឲ្យច្បាស់ពីសម្តីរបស់ខ្លួនដែលត្រូវបានថតជាប់ក្នុងវីឌីអូ សន្ទនាជាមួយនឹងជំនួយការគ្រូបង្វឹក German Burgos ។ នៅក្នុងវីឌីអូនោះ លោក Diego Simeone បាននិយាយថា នឹងយក Ronaldo ជាងយក Messi ។
លោក Diego Simeone បកស្រាយប្រាប់សារព័ត៌មានថា ប្រសិនបើលោកត្រូវរើសយករវាង Messi និង Ronaldo លោកនឹងយក Messi ។ តែសម្រាប់សម្តីរបស់លោកនៅក្នុងវីឌីអូ លោកនិយាយថាយក Ronaldo គឺដោយសារ Ronaldo មានភាពសាកសមចំពោះក្លិបទូទៅ ដែលមានកីឡាករល្មមៗ ។ លោកបញ្ជាក់ទៀតថា សម្តីនេះមិនមែនសម្រាប់ប្រៀបធៀបរកអ្នកខ្លាំងផ្តាច់គេនោះទេ ។
គ្រូបង្វឹក Atletico បានបន្តថា Messi ខ្លាំងនៅពេលមានកីឡាករខ្លាំងៗក្នុងក្រុមជាមួយ ។ ពេលនោះហើយដែល Messi ខ្លាំងជាង Ronaldo ។ តែប្រសិនបើសម្រាប់ក្រុមធម្មតាៗវិញ Ronaldo អាចសម្របខ្លួនបានល្អជាង Messi ។
នាពេលនេះ Ronaldo កំពុងតែនៅក្លិបសេះបង្កង់ត្រៀមប្រកួតបើករដូវកាល ខណៈដែល Messi ត្រូវបានពាក្យចចាមអារាមលើកឡើងថា នឹងអាចបន្តជាគូប្រជែងជាមួយ Ronaldo នៅអ៊ីតាលីទៀត ប្រសិនបើទៅ Inter Milan បានសម្រេច ៕
ចែករំលែកព័តមាននេះ