រាជធានីភ្នំពេញ ៖ បុរសជនជាតិកូរ៉េម្នាក់ ដែលជាថៅកែសិប្បកម្មកាត់ដេរ បន្ទាប់ពីប្រពន្ធជនជាតិចិនរបស់គាត់ឈឺស្លាប់ចោលកាលពីជាង១ខែមុន ធ្វើឱ្យគាត់មានវិបត្តិផ្លូវចិត្តយ៉ាងខ្លាំង ។ គាត់តែងតែផឹកស្រាស្រវឹងរាល់ថ្ងៃ ហើយកន្លងមក បានទិញខ្សែយកមកចង.កប៉ងសម្លាប់ខ្លួនម្ដងហើយ ប៉ុន្តែបានកម្មករឃើញជួយទាន់ ។
ពេលនោះ គាត់បានផ្ដាំផ្ញើកម្មករថា «ប្រសិនបើថ្ងៃណាមួយគាត់ស្លាប់ទៅ សូមជួយយកសពគាត់ទៅបញ្ចុះនៅក្បែរសពប្រពន្ធរបស់គាត់ផង គាត់ស្រឡាញ់ប្រពន្ធគាត់ខ្លាំងណាស់» ។ ស្រាប់តែពេលនេះ កម្មករទៅចាក់សោ ដើម្បីយករថយន្តដឹកអីវាន់នៅក្នុងផ្ទះ ដែលគាត់ជួលស្នាក់នៅបានធុំក្លិនស្អុយចម្លែកក៏នាំគ្នាដើររកមើល ស្រាប់តែប្រទះឃើញគាត់ចង.កសម្លាប់ខ្លួនស្លាប់ រហូតហើមស្អុយទៅហើយនៅជាន់ទី២ ។
ហេតុការណ៍នេះ បង្កឲ្យមានការភ្ញាក់ផ្អើលឡើងកាលពីវេលាម៉ោង៦ និង៣០នាទីព្រឹកថ្ងៃទី៣០ ខែកក្កដា នៅជាន់ទី២ផ្ទះជួលលេខ៦០៧A ផ្លូវលេខ៦៨K ភូមិចម្ការឪឡឹក សង្កាត់កាកាប១ ខណ្ឌពោធិ៍សែនជ័យ ។
បុរសជនជាតិកូរ៉េរូបនេះឈ្មោះ Kor Juអាយុ៤៩ឆ្នាំ មានប្រពន្ធឈ្មោះ Li Fuzi ជនជាតិចិន អាយុ៣៨ឆ្នាំ ចេះនិយាយភាសាខ្មែរបានច្រើនគួរសម ។ ប្តីប្រពន្ធនេះ ជាថៅកែសិប្បកម្មកាត់ដេរយីហោ «JU LI គឺយកឈ្មោះប្ដីប្រពន្ធពួកគាត់ដាក់តែម្ដង ។ ពួកគាត់បានជួលផ្ទះខាងលើស្នាក់នៅកាលពីថ្ងៃទី១ខែមករា ឆ្នាំ២០១៨ ក្នុង១ខែតម្លៃ៤០០ដុល្លារ ហើយតាមកុងត្រាគឺជួលរយៈពេលត្រឹម១ឆ្នាំប៉ុណ្ណោះ ។
តាមប្រភពព័ត៌មានពីកម្មករបានឲ្យនគរបាលដឹងថា ផ្ទះជួលដែលថៅកែស្នាក់នៅនិងសិប្បកម្មស្ថិតនៅជិតគ្នានោះដែរ ហើយបន្ទាប់ពីស្នាក់នៅធ្វើការនៅក្នុងផ្ទះជួលនេះបានមួយរយៈប៉ុណ្ណោះ ប្រពន្ធរបស់ថៅកែបានធ្លាក់ខ្លួនឈឺជាទម្ងន់ ។ ពេលនោះ គាត់បានយកប្រពន្ធទៅព្យាបាលជំងឺឯប្រទេសចិន ប៉ុន្តែមិនបានជាសះស្បើយឡើយ គឺពីមួយថ្ងៃទៅមួយថ្ងៃកាន់តែមានសភាពធ្ងន់ទៅៗ ហើយនៅអំឡុងខែមិថុនា ឆ្នាំ២០១៨
ប្រពន្ធគាត់ក៏បានស្លាប់ទៅ ។ បន្ទាប់មក គាត់បានបញ្ចុះសពនៅឯប្រទេសចិនរួចរាល់ ទើបវិលត្រឡប់មកស្រុកខ្មែរវិញ ។
ប្រភពដដែលបន្តថា ចាប់តាំងពីពេលនោះមកថៅកែរូបនេះហាក់ខូចចិត្តខ្លាំងណាស់ គាត់ ផឹកស្រវឹងរាល់ថ្ងៃ ។ មិនតែប៉ុណ្ណោះ គាត់បានប្រើចុងភៅឲ្យទិញខ្សែ ដើម្បីយកទៅចង.កសម្លាប់ខ្លួនថែមទៀតផង ។ ប៉ុន្តែពេលនោះ កម្មករនិងបុគ្គលិកបម្រើការងារនៅទីនោះដឹងទាន់ បានយកខ្សែទៅបោះចោល ហើយសួរនាំពីមូលហេតុចង់សម្លាប់ខ្លួន តែគាត់និយាយថា ទិញខ្សែមកដើម្បីចងហាលខោអាវតែប៉ុណ្ណោះ ។ ខណៈនោះដែរ ថៅកែបានផ្ដាំផ្ញើពួកគេថា «នៅថ្ងៃណាមួយដែលគាត់ស្លាប់ សូមជួយយកសពទៅបញ្ចុះក្បែរសពប្រពន្ធរបស់គាត់ផង ព្រោះគាត់ស្រឡាញ់ប្រពន្ធខ្លាំងណាស់» ។
មន្ត្រីនគរបាលនិយាយថា តាមការសន្និដ្ឋានបុរសកូរ៉េរូបនេះ បានចងកសម្លាប់ខ្លួនតាំងពីថ្ងៃទី២៧ ខែកក្កដាម្ល៉េះ គឺមានរយៈពេល៤ថ្ងៃមកហើយ ព្រោះសពហើមស្អុយរលួយមើលសឹងលែងស្គាល់ ។ ក្រោយពេលមានការភ្ញាក់ផ្អើល កម្លាំងនគរបាលបច្ចេកទេសនៃស្នងការដ្ឋានរាជធានីភ្នំពេញ បានចុះទៅធ្វើកោសល្យវិច័យ ហើយខាងមន្ត្រីស្ថានទូតសាធារណរដ្ឋកូរ៉េប្រចាំនៅកម្ពុជា ក៏បានចុះទៅកាន់ទីនោះតាមដានរឿងនេះដែរ ៕
ចែករំលែកព័តមាននេះ