រាជធានីភ្នំពេញ ៖ គូស្នេហ៍វ័យចំណាស់មួយគូបានឈ្លោះប្រកែកគ្នាតាមដងផ្លូវក្នុងស្ថានភាពស្រវឹងជោករៀងៗខ្លួនរហូតឈានដល់ការវាយតប់គ្នា បណ្តាលអោយខាងស្រីដែលត្រូវជាប្រពន្ធទី២បែកក្បាលហូរឈាមរហូតសន្លប់ បង្កការភ្ញាក់ផ្អើលពេញដងផ្លូវ ដែលហេតុការណ៍នេះបានកើតឡើងកាលពីវេលាម៉ោង៨នឹង៤០នាទីយប់ថ្ងៃទី៣០ ខែកក្កដា នៅតាមបណ្តោយផ្លូវ២១៧ ទល់មុខវត្តស្ទឹងមានជ័យ សង្កាត់ស្ទឹងមានជ័យ១ ខណ្ឌមានជ័យ។
បុរសជាប្តីឈ្មោះ ប៉ែន វិរៈ អាយុ៥៣ឆ្នាំ អតីតជាមន្ត្រីនគរបាល ចំណែកប្រពន្ធទី២ឈ្មោះ នួន ហៅដួង អាយុ៣៣ឆ្នាំ ស្នាក់នៅស្រុកកណ្តាលស្ទឹង ខេត្តកណ្តាល។
ប្រភពពីប្រជាពលរដ្ធដែលរត់ម៉ូតូកង់បីនៅកន្លែងកើតហេតុបានប្រាប់អោយដឹងថា មុនកើតហេតុ គេឃើញប្តីប្រពន្ធខាងលើនេះមិនដឹងមកពីណាទេ បានឈប់ម៉ូតូហើយឈ្លោះប្រកែកគ្នា ដោយខាងស្រីស្រវឹងទោរទន់ទ្រេតទ្រោតស្រែកឡូឡាដាក់ខាងប្រុសដែលស្រវឹងទោរទន់ទ្រេតទ្រោតដូចគ្នា ហើយខាងស្រីបានរត់ទៅវាយខាងប្រុស ធ្វើឲ្យខាងប្រុសច្រានចេញបណ្តាលអោយដួល ហើយខាងស្រីងើបរត់ទៅវាយខាងប្រុសទៀត ទើបទ្រាំមិនបានខាងប្រុសទះមួយដៃចំមួកការពារសុវត្ថិភាពបណ្តាលឱ្យដួលទៀត ក៏មានការភ្ញាក់ផ្អើលដល់ប្រជាពលរដ្ឋចូលជួយអន្តរាគមន៍។
ចំណែកបុរសជាប្តីបានប្រាប់ទាំងស្ថានស្រវឹងថា គាត់មានគ្រួសារនិងមានកូនរួចទៅហើយ ចំណែកស្ត្រីដែលឈ្លោះប្រកែកគ្នានេះជាប្រពន្ធទី២របស់គាត់ ហើយនាងជាស្ត្រីមេម៉ាយ មានកូន តែមិនបានបញ្ជាក់ថាមានកូនប៉ុន្មាននាក់នោះទេ ។ មុនកើតហេតុ គាត់បានហូបស្រានៅម្តុំផ្សារឌុយម៉ិច ក្នុងសង្កាត់វាលវង់ ខណ្ឌ៧មករា ពេលស្រវឹងបានចេញពីទីនោះដោយជិះម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ២០១៧ ពណ៌ខ្មៅ ពាក់ស្លាកលេខ ភ្នំពេញ ១GH-៧០៩២ ជូននាងទៅផ្ទះនៅកន្ទួតសៀមរាប ស្រុកកណ្តាលស្ទឹង ខេត្តកណ្តាល ។
ប្រភពដដែលបានបន្តថា គាត់បានឃាត់នាងឱ្យស្នាក់នៅផ្ទះសំណាក់នៅភ្នំពេញមួយយប់សិនទៅ តែនាងមិនព្រមបានខឹងរករឿងគាត់នៅលើម៉ូតូរហូតទាល់តែគាត់ព្រមជូននាងទៅផ្ទះហើយ បែរជានាងប្រាប់ឱ្យគាត់ជិះតាមផ្លូវចំការដូងវិញ តែគាត់បានប្រាប់នាងថាជិះតាមផ្លូវជាតិលេខ៣វិញទៅ បានឈប់ញ៉ាំអីនៅរោងលក់សាច់ក្រក់តាមផ្លូវ នាងនៅតែមិនព្រមរឹតតែខឹងគាត់ ហើយបានស្រែកឡូឡាវាយគាត់ពីក្រោយរហូត ហើយគាត់ក៏ព្រមជិះតាមផ្លូវ២១៧ឆ្លងកាត់ចំការដូង ពេលធ្វើដំណើរមកដល់វត្តស្ទឹងមានជ័យ ស្រាប់តែនាងទាញគាត់រហូតបើកម៉ូតូលែងកើត ប៊ិះនឹងដួលទៀត គាត់ក៏ឈប់ម៉ូតូ។
ភ្លាមនោះ នាងបានស្រែកជេរគាត់ទាំងស្ថានភាពស្រវឹងដូចគ្នា ថែមទាំងស្ទុះទៅវាយគាត់ ហើយក៏ប្រតាយប្រតប់គ្នា គាត់ក៏មិនដឹងខ្លួនថានាងត្រូវគាត់ច្រានឱ្យដួល ឬក៏គាត់វាយឱ្យដួលនោះទេ ទើបបណ្តាលអោយនាងបែកក្បាលហូរឈាមដួលសន្លប់បែបនេះ ហើយភ្លាមៗនោះ ក៏មានវត្តមានសមត្ថកិច្ច និងប្រជាពលរដ្ឋ ចេញមកជួយអន្តរាគមន៍ភ្លាមៗផងដែរ។
ក្រោយពេលកើតហេតុ ស្ត្រីដែលសន្លប់ត្រូវបានសមត្ថកិច្ចដឹកតាមរ៉ឺម៉កកង់បីយកទៅព្យាបាលរបួសនៅមន្ទីរពេទ្យ ចំណែកបុរសជាប្តីត្រូវបានកម្លាំងសមត្ថកិច្ចឃាត់ខ្លួនយកទៅសួរនាំនៅប៉ុស្តិ៍នគបាល ទើបប្រពន្ធដើមនិងកូនៗទៅជួយដោះស្រាយផងដែរ តែដោយសារភាគីខាងស្រ្តីរងគ្រោះជាប្រពន្ធទី២ស្រវឹងនិយាយស្តាប់គ្នាមិនបាន ទើបមិនអាចដោះស្រាយបានភ្លាមៗនោះទេ រង់ចាំគាត់ស្វាងនឹងស្តាប់ការសម្រេចចិត្តរបស់ស្ត្រីជាជនរងគ្រោះ ៕
ចែករំលែកព័តមាននេះ