រាជធានីភ្នំពេញ ៖ បុរសម្នាក់ស្រវឹងជោកជាំ បើករថយន្តមួយគ្រឿងក្នុងល្បឿនយ៉ាងលឿនហើយព្យាយាមបើកជែងរថយន្តមួយគ្រឿងទៀតក៏ជ្រុលទៅកៀររ៉ឺម៉កម៉ូតូមួយគ្រឿងទៀត បណ្តាលឲ្យក្រឡាប់ផ្ងារជើង កាលពីវេលាម៉ោង៨យប់ថ្ងៃទី៣០ ខែកក្កដា ឆ្នាំ២០១៨ ត្រង់ចំណុចគល់ស្ពានអាកាស៧មករា ផ្នែកខាងលិចតាមបណ្តោយផ្លូវសហព័ន្ធរុស្សី…
រាជធានីភ្នំពេញ ៖ បុរសម្នាក់ស្រវឹងជោកជាំ បើករថយន្តមួយគ្រឿងក្នុងល្បឿនយ៉ាងលឿនហើយព្យាយាមបើកជែងរថយន្តមួយគ្រឿងទៀតក៏ជ្រុលទៅកៀររ៉ឺម៉កម៉ូតូមួយគ្រឿងទៀត បណ្តាលឲ្យក្រឡាប់ផ្ងារជើង កាលពីវេលាម៉ោង៨យប់ថ្ងៃទី៣០ ខែកក្កដា ឆ្នាំ២០១៨ ត្រង់ចំណុចគល់ស្ពានអាកាស៧មករា ផ្នែកខាងលិចតាមបណ្តោយផ្លូវសហព័ន្ធរុស្សី ស្ថិតក្នុងសង្កាត់ទឹកថ្លា ខណ្ឌសែនសុខ ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេឃើញបុរសម្នាក់បើករ៉ឺម៉កមួយគ្រឿងដឹកភ្ញៀវប្រុសស្រីបួនប្រាំនាក់ទៀតរួមដំណើរពីក្រោយ ទើបតែដឹកភ្ញៀវចេញម្តុំស្ថានីយរថភ្លើងភ្នំពេញបំណងដឹកទៅម្តុំពោធិ៍តុងធ្វើដំណើរតាមបណ្តោយផ្លូវសហព័ន្ធរុស្សី ក្នុងទិសដៅពីកើតទៅលិច ។ លុះមកដល់ចំណុចកើតហេតុក៏ស្រាប់តែមានរថយន្តមួយគ្រឿង ពណ៌ស បើកបរដោយបុរសម្នាក់ក្នុងស្ថានភាពស្រវឹងមកពីក្រោយ ក្នុងល្បឿនលឿន ហើយព្យាយាមបើកជែងខាងស្តាំរថយន្តមួយគ្រឿងមិនចាំម៉ាក រួចក៏ជ្រុលទៅកៀររ៉ឺម៉កម៉ូតូបណ្តាលឲ្យក្រឡាប់ផ្ងារជើងទៅបុក និងស្លាកគណបក្សប្រជាជនមួយដើមនៅលើខឿនតាមចិញ្ចើមផ្លូវបង្កឲ្យវៀចទ្រេតនិងបណ្តាលឲ្យភ្ញៀវប្រុសស្រីចំនួនបួននាក់រងរបួសស្រាល ។
ចំណែកឯរថយន្តបង្ករងការខូចខាតក្រពឹតកាងខាងមុខបន្តិចបន្តួច ។ ភ្លាមៗនោះអ្នកបើកបររថយន្តបង្កបានចុះពីលើរថយន្តទាំងក្នុងស្ថានភាពស្រវឹងទៅប្រកែកថា រថយន្តរបស់ខ្លួនមិនបានបើកកៀរនោះទេ គឺរ៉ឺម៉កម៉ូតូបើកទៅធ្លាក់ជង្ហុកក្រឡាប់ដោយខ្លួនឯងនោះទេ។ បន្ទាប់មកអ្នកបើកបររថយន្តបង្កបានគេចខ្លួនចេញពីកន្លែងកើតហេតុបាត់ស្រមោល បន្សល់ទុកតែរថយន្តនៅនឹងកន្លែងកើតហេតុ ។
ក្រោយពេលកើតហេតុសមត្ថកិច្ចមូលដ្ឋានបានចុះទៅដល់ចំណុចកើតហេតុ ហើយបានទាក់ទងទៅសមត្ថកិច្ចជំនាញឲ្យចុះមកធ្វើការវាស់វែងយករថយន្ត និងរ៉ឺម៉កម៉ូតូទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគររាជធានីភ្នំពេញ ដើម្បីរង់ចាំម្ចាស់រថយន្តចូលខ្លួនមកធ្វើការដោះស្រាយគ្នានៅពេលក្រោយ ៕
ចែករំលែកព័តមាននេះ