ខេត្តបន្ទាយមានជ័យ ៖ គ្រោះថ្នាក់ចរាចរណ៍រវាងរថយន្តមួយគ្រឿងបុកម៉ូតូមួយគ្រឿង បណ្តាលឱ្យស្លាប់ម្នាក់នឹងកន្លែងកើតហេតុ ចំណែកម្នាក់ទៀតរងរបួសធ្ងន់ ហើយរថយន្តបង្កបើកគេចបាត់ស្រមោល ។ ហេតុការណ៍នេះបានកើតឡើងកាលពីវេលាម៉ោង៨និង៣០នាទីយប់ថ្ងៃទី៣០ ខែកក្កដា ឆ្នាំ២០១៨…
ខេត្តបន្ទាយមានជ័យ ៖ គ្រោះថ្នាក់ចរាចរណ៍រវាងរថយន្តមួយគ្រឿងបុកម៉ូតូមួយគ្រឿង បណ្តាលឱ្យស្លាប់ម្នាក់នឹងកន្លែងកើតហេតុ ចំណែកម្នាក់ទៀតរងរបួសធ្ងន់ ហើយរថយន្តបង្កបើកគេចបាត់ស្រមោល ។ ហេតុការណ៍នេះបានកើតឡើងកាលពីវេលាម៉ោង៨និង៣០នាទីយប់ថ្ងៃទី៣០ ខែកក្កដា ឆ្នាំ២០១៨ តាមបណ្តោយលេខ៦៩អា មុខឡឥដ្ឋភូមិអូរស្ងួត ឃុំអូរប្រាសាទ ស្រុកមង្គលបូរី។
ជនរងគ្រោះដែលស្លាប់ឈ្មោះ ឆុន សុផាន់ ភេទប្រុស អាយុ១៨ឆ្នាំ ជាអ្នកបើកបរម៉ូតូ និងអ្នករួមដំណើរម្នាក់ដែលរងរបួសធ្ងន់ឈ្មោះ រ៉ូ ង៉ា ភេទប្រុស អាយុ១៨ឆ្នាំ ។ ជនរងគ្រោះទាំង២នាក់ត្រូវជាបងប្អូនជីដូនមួយនឹងគ្នា និងរស់នៅភូមិពោធិ៍រាង ឃុំអូរប្រាសាទ ស្រុកមង្គលបូរី។
ប្រភពពីអ្នកឃើញហេតុការណ៍បានប្រាប់ឱ្យដឹងថា នៅមុនពេលគ្រោះថ្នាក់ចរាចរណ៍កើតឡើង គឺជនរងគ្រោះ២នាក់បានជិះម៉ូតូមួយគ្រឿងម៉ាកហុងដា ស៊េរីឆ្នាំ២០១៦ ពណ៌ខ្មៅ ពាក់ស្លាកលេខ បន្ទាយមានជ័យ ១N-៣៥៤៩ ធ្វើដំណើរតាមបណ្តោយផ្លូវជាតិលេខ៦៩អា ក្នុងទិសដៅពីកើតទៅលិច ស្រាប់តែមានរថយន្តមួយគ្រឿងមិនស្គាល់ម៉ាក (អ្នកដែលគេឃើញសង្ស័យជារថយន្តធុនទួរីសកូរ៉េ) បានបើកបរក្នុងល្បឿនលឿន ក្នុងទិសដៅបញ្ច្រាសទិសគ្នាពីលិចមកកើត បានបុកម៉ូតូខាងលើពេញទំហឹង បណ្តាលឱ្យអ្នកបើកបរម៉ូតូម្នាក់ស្លាប់នៅនឹងកន្លែងកើតហេតុ និងអ្នកជិះពីក្រោយម្នាក់បានរងរបួសធ្ងន់ រីឯម៉ូតូរងការខូចខាតខ្ទេចមួយកំណាត់មុខ ចំណែករថយន្តបង្កបានបើកគេចបាត់ស្រមោល។
ក្រោយពេលកើតហេតុភ្លាមៗ គេឃើញមានមន្ត្រីនគរបាលចរាចរណ៍ជើងគោកស្រុកមង្គលបូរី បានចុះមកពិនិត្យវាស់វែងភ្លាមៗ និងបានហៅរថយន្តសង្គ្រោះមណ្ឌលសុខភាពឃុំអូរប្រាសាទមកដឹកជនរងគ្រោះដែលរងរបួសធ្ងន់យកទៅសង្គ្រោះបន្ទាន់ទៅមន្ទីពេទ្យមិត្តភាពកម្ពុជា-ជប៉ុនមង្គលបូរី ។ ចំណែកសពជនរងគ្រោះម្នាក់ត្រូវបានសាច់ញាតិមកទទួលយកធ្វើបុណ្យតាមប្រពៃណី ។
ម៉ូតូរបស់ជនរងគ្រោះដែលរងការខូចខាតខ្ទេចមួយកំណាត់មុខត្រូវបានយកទៅរក្សាទុកនៅអធិការដ្ឋាន
នគរបាលស្រុកមង្គលបូរី និងស្រាវជ្រាវរករថយន្តបង្កដែលបើកគេចខ្លួនដើម្បីចាត់ការតាមច្បាប់៕
ចែករំលែកព័តមាននេះ