ខេត្តព្រះវិហារ ៖ សមត្ថកិច្ចបានឃាត់ខ្លួនយុវជន៤នាក់ភ្លាមៗ ខណៈពួកគេយកគ្រាប់បែកដៃក្រឡាទៀបមួយគ្រាប់ចូលទៅការិយាល័យបោះឆ្នោតមួយនៅក្នុងខេត្តព្រះវិហារ កាលពីល្ងាចថ្ងៃទី២៧ ខែកក្កដា ។ បើតាមសមត្ថកិច្ច ករណីនេះបានកើតឡើងនៅការិយាល័យបោះឆ្នោតលេខ០៣១៧ ស្ថិតក្នុងសាលារៀនចំរើនផល ឃុំឈានមុខ ស្រុកត្បែងមានជ័យ ។
ទោះបីជាបែបណា អ្នកនាំពាក្យគណៈកម្មាធិការជាតិរៀបចំការបោះឆ្នោត(គ.ជ.ប)បានឱ្យដឹងថា នេះមិនមែនជាករណីធ្ងន់ធ្ងរប៉ះពាល់ដំណើរការបោះឆ្នោតនោះទេ ព្រោះក្រោយពីការឃាត់ខ្លួនទើបដឹងថា គ្រាប់បែកដែលពួកគេប្រើធ្វើឱ្យភ្ញាក់ផ្អើលនោះ ជាគ្រាប់បែកដែកកេះទេ មិនមែនជាគ្រាប់បែកពិតឡើយ ។ ឆែកឃើញពេលយប់ទម្រាំដឹងថា វាជាគ្រាប់បែកដែកកេះ គឺភ័យខ្លាចមិនតិចទេ ។ តាមប្រភពព័ត៌មានថា ក្រោយការឃាត់ខ្លួនពួកគេទាំង៤នាក់ត្រូវបានធ្វើការអប់រំ និងដោះលែងវិញនៅយប់ថ្ងៃដដែលនោះ ។
យោងតាមរបាយការណ៍របស់សមត្ថកិច្ច គឺនៅវេលាម៉ោង៧យប់ថ្ងៃទី២៧ ខែកក្កដា មានយុវជន៤នាក់ បានយកគ្រាប់បែកដៃមួយគ្រាប់ចូលក្នុងការិយាល័យបោះឆ្នោតលេខ០៣១៧ ស្ថិតនៅក្នុងសាលារៀនចំរើនផល ឃុំឈានមុខ ស្រុកត្បែងមានជ័យ ប៉ុន្តែត្រូវបានកម្លាំងសន្តិសុខការពារនៅទីនោះឃាត់ខ្លួន រួចបញ្ជូនទៅនគរបាលប៉ុស្តិ៍ធ្វើការសាកសួរ និងក្រោយមកទើបដឹងថា នោះគឺជាគ្រាប់បែកដែកកេះ ៕
ចែករំលែកព័តមាននេះ