រាជធានីភ្នំពេញ ៖ គូស្នេហ៍វ័យក្មេងមួយគូជិះម៉ូតូមួយគ្រឿងឌុបគ្នាបំណងចូលផ្ទះ ពេលជិះជិតដល់ផ្ទះហើយក៏ត្រូវក្រុមចោរប្រុសស្រីមួយក្រុមធ្វើសកម្មភាពវាយប្លន់យកម៉ូតូបានសម្រេច កាលពីវេលាម៉ោង១២និង២០នាទីរំលងអធ្រាត្រឈានចូលថ្ងៃទី៣១ ខែកក្កដា ឆ្នាំ២០១៨ ត្រង់ចំណុចខាងមុខក្រុមហ៊ុនក្រឡុកស៊ីម៉ង់ត៍ តាមបណ្តោយផ្លូវហាណូយ ស្ថិតក្នុងសង្កាត់ឃ្មួញ ខណ្ឌសែនសុខ។
ជនរងគ្រោះឈ្មោះ សាន់ ទិត្យ ភេទប្រុស អាយុ២៤ឆ្នាំ ជាបុគ្គលិកផ្សារទំនើប ស្នាក់នៅបន្ទប់ជួលក្បែរកន្លែងកើតហេតុ មានស្រុកកំណើតនៅស្រុកជលគីរី ខេត្តកំពង់ឆ្នាំង ។
ប្រភពពីជនរងគ្រោះដែលជាម្ចាស់ម៉ូតូបានរៀបរាប់ប្រាប់ឱ្យដឹងថា នៅមុនពេលកើតហេតុ គាត់និងសង្សាររបស់គាត់បានជិះម៉ូតូមួយគ្រឿងម៉ាកស៊ុយហ្ស៊ុយគីនិច ស៊េរីឆ្នាំ២០១៤ឡើងស៊េរីឆ្នាំ២០១៨ ពណ៌សលាយក្រហម ពាក់ស្លាកលេខ ភ្នំពេញ ១FA-៤៩១៧ ទើបតែជិះចេញមកពីផ្ទះរបស់សង្សារនៅម្តុំកាំកូស៊ីធី គោលបំណងដឹកសង្សារទៅលេងបន្ទប់ជួលរបស់ខ្លួនដែលនៅក្បែរកន្លែងកើតហេតុ។ ដោយធ្វើដំណើរតាមបណ្តោយផ្លូវហាណូយ ក្នុងទិសដៅពីត្បូងទៅជើង ។
ប្រភពដដែលបានបន្តថា លុះជិះមកដល់ចំណុចកើតហេតុដែលជាផ្លូវមានសភាពស្ងាត់ក៏ស្រាប់តែលេចមុខក្រុមជនសង្ស័យប្រុសស្រីមួយក្រុមមានគ្នាជាង១០នាក់ ជិះម៉ូតូ៦ទៅ៧គ្រឿងមិនចាំម៉ាកជិះមកពីក្រោយ។ រួចក៏ធ្វើសកម្មភាពយកមួកសុវត្ថិភាពវាយទៅលើជនរងគ្រោះ បណ្តាលឱ្យជនរងគ្រោះភ័យស្លន់ស្លោក៏ផ្តួលម៉ូតូរត់យករួចខ្លួន ហើយក្រុមជនសង្ស័យឃើញឱកាសល្អក៏លើកម៉ូតូរបស់ជនរងគ្រោះជិះគេចខ្លួនដោយសុវត្ថិភាព ភ្លាមៗនេះជនរងគ្រោះបានស្រែកឆោឡោដែរ តែគ្មាននរណាចេញមកមើលនោះទេ។
ក្រោយពេលកើតហេតុ ជនរងគ្រោះបានទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលឃ្មួញដើម្បីឲ្យសមត្ថកិច្ចជួយធ្វើការស្រាវជ្រាវរកម៉ូតូរបស់ខ្លួនយកត្រឡប់មកវិញ៕
ចែករំលែកព័តមាននេះ