រាជធានីភ្នំពេញ ៖ ក្រោយការបោះឆ្នោតជ្រើសតាំងតំណាងរាស្ត្រនីតិកាលទី៦ កាលពីថ្ងៃទី២៩ ខែកក្កដា ឆ្នាំ២០១៨ បានប្រព្រឹត្តទៅដោយភាពរលូន និងប្រកបដោយភាពយុត្តិធម៌ត្រូវបានបញ្ចប់នោះ។ មកដល់ត្រឹមវេលាល្ងាចថ្ងៃទី៣០ ខែកក្កដា…
រាជធានីភ្នំពេញ ៖ ក្រោយការបោះឆ្នោតជ្រើសតាំងតំណាងរាស្ត្រនីតិកាលទី៦ កាលពីថ្ងៃទី២៩ ខែកក្កដា ឆ្នាំ២០១៨ បានប្រព្រឹត្តទៅដោយភាពរលូន និងប្រកបដោយភាពយុត្តិធម៌ត្រូវបានបញ្ចប់នោះ។ មកដល់ត្រឹមវេលាល្ងាចថ្ងៃទី៣០ ខែកក្កដា មន្ត្រីរាជការ ប្រជាពលរដ្ឋ កម្មករ បុគ្គលិកក្រុមហ៊ុននានា បានចាកចេញពីស្រុកកំណើតនៅតាមបណ្ដាខេត្តក្រុងនានា។ ធ្វើដំណើរសម្រុកចូលមករាជធានីភ្នំពេញ ដើម្បីចូលបម្រើការងារតាមក្រសួងមន្ទីរ រោងចក្រសហគ្រាស ក្រុមហ៊ុន សិប្បកម្ម ឬការដ្ឋានសំណង់រៀងៗខ្លួន។
តាមការសង្កេតមើលជាក់ស្ដែងនៅតាមដងផ្លូវជាតិលេខ៣ និងលេខ៤ ត្រង់ចំណុចរង្វង់មូលថ្នល់បំបែកចោមចៅ មានរថយន្តឈ្នួលជាច្រើគ្រឿងបានដឹកមនុស្សត្រឡប់ មកពីស្រុកកំណើត។ អ្នកទាំងនោះ៩០ភាគរយ គឺជាកម្មករ កសិករ ដែលជាអ្នករស់នៅក្នុងបណ្ដាខេត្ត ក្រុងមួយចំនួនដូចជាខេត្តកំពង់ស្ពឺ តាកែវ កំពត កែប កណ្ដាល និងព្រះសីហនុ រួមនឹងខេត្តផ្សេងៗទៀត។ ក្រោយពេលទៅដល់ចំណុចរង្វង់មូលថ្នល់បំបែកចោមចៅ អ្នកទាំងនោះបានចុះពីរថយន្តឈ្នួល រួចបានជិះម៉ូតូឌុប ឬម៉ូតូរ៉ឺម៉កកង់បីបន្តទៅកាន់ទីកន្លែងផ្ទះជួលដែលខ្លួនស្នាក់បន្តទៀត។
ទន្ទឹមនឹងនេះដែរក៏មានអ្នកខ្លះធ្វើដំណើរតាមយានយន្តផ្ទាល់ខ្លួនដែលខ្លួនមានរៀងៗខ្លួនផងដែរ ហើយពុំមានភាពអសន្តិសុខណាមួយកើតឡើងលើពួកគាត់ឡើយ។ កញ្ញា ចាន់ ឌី ហៅកាកា ជាកម្មការិនីរោងចក្រមួយស្ថិតនៅក្នុងសួនឧស្សាហកម្មកាណាឌីយ៉ា ស្នាក់នៅផ្ទះជួលស្ថិតនៅ ក្នុងភូមិត្រពាំងថ្លឹង១ សង្កាត់ចោមចៅ១ ខណ្ឌពោធិ៍សែនជ័យ និងមានស្រុកកំណើតនៅក្នុងស្រុកទឹកឈូ ខេត្តកំពត។ បាននិយាយថា កញ្ញាត្រូវបានខាងក្រុមហ៊ុនអនុញ្ញាតឲ្យឈប់សម្រាកតាំងពីវេលាល្ងាច ថ្ងៃសុក្រទី៣០ ខែកក្កដា ឆ្នាំ២០១៨ មកម្ល៉េះដើម្បីធ្វើដំណើរទៅស្រុកកំណើតបោះឆ្នោត។ ខណៈនោះគ្រាន់តែដល់ថ្ងៃឈប់សម្រាកភ្លាម នាងបានធ្វើដំណើរទៅស្រុកកំណើតភ្លាម ព្រោះក្រៅពីការបោះឆ្នោត នាងបាននឹករលឹកដល់ក្រុមគ្រួសារ និងឪពុកម្ដាយខ្លាំងណាស់។
បន្ទាប់មកនាងបានចូលរួមបោះឆ្នោតបំពេញកាតព្វកិច្ចជាប្រជាពលរដ្ឋរួចហើយ មិនតែប៉ុណ្ណោះការឈប់សម្រាក៣ថ្ងៃកន្លងមកនេះក្រៅពីការបោះឆ្នោតនាងបានជួបជុំសប្បាយរីករាយជាមួយគ្រួសារផងដែរ។ ដោយឡែកកញ្ញា ប្រាក់ សារូ ជាកម្មការិនីបម្រើការងារនៅរោងចក្រកាត់ដេរម្ដុំផ្សារ ទួលពង្រ សង្កាត់ចោមចៅ១ ខណ្ឌពោធិ៍សែនជ័យ និងមានស្រុកកំណើតនៅក្នុងស្រុកបរសេដ្ឋ ខេត្តកំពង់ស្ពឺ បាននិយាយថា នាងក៏ត្រូវបានខាងរោងចក្រឲ្យឈប់សម្រាករយៈពេល៣ថ្ងៃដែរ នាងបានចាកចេញពីផ្ទះជួលស្ថិតនៅក្បែររោងចក្រនោះដែរ ទៅកាន់ស្រុកកំណើត កាលពីវេលាល្ងាច ថ្ងៃសុក្រទី២៧ ខែកក្កដានោះដែរ។
ដើម្បីទៅបោះឆ្នោតផង និងបានជួបជុំគ្រួសារផង ហើយនាងបានបោះឆ្នោតជូនគណបក្សដែលនាងស្រឡាញ់រួចហើយ ពេលនេះបានចាកចេញពីស្រុក កំណើត ទាំងអាល័យមកកាន់ផ្ទះជួលវិញដើម្បីត្រៀមចូលធ្វើការងារនៅព្រឹកថ្ងៃទី១ ខែសីហា ឆ្នាំ២០១៨នេះ រកប្រាក់ឈ្នួលផ្គត់ផ្គង់ជីវភាពបន្តទៀត៕
https://youtu.be/D93jr8xsSV4
ចែករំលែកព័តមាននេះ