រាជធានីភ្នំពេញ ៖ អ្នកគ្រូបង្រៀននៅអនុវិទ្យាល័យហ៊ុនសែនជម្ពូវ័នម្នាក់ និងជាអនុប្រធានការិយាល័យបោះឆ្នោតផងនោះ ត្រូវបានអាជ្ញាធរខណ្ឌពោធិ៍សែនជ័យ សហការជាមួយកម្លាំងនគរបាលប៉ុស្តិ៍ត្រពាំងក្រសាំង ធ្វើការចាប់ខ្លួននាំយកទៅសាកសួរ បន្ទាប់ពីគាត់លួចយកទឹកថ្នាំជ្រលក់ដៃបោះឆ្នោត១ដប ចេញពីការិ
យាល័យដែលគាត់គ្រប់គ្រង។ ប៉ុន្តែត្រូវបែកការណ៍ទើបត្រូវចាប់ខ្លួននាំទៅសាកសួរ និងកសាងសំណុំរឿងនៅផ្នែកនគរបាលព្រហ្មទណ្ឌខណ្ឌពោធិ៍សែនជ័យ បន្ទាប់មកបញ្ជូនទៅកាន់តុលាការចាត់ការតាមច្បាប់។
ពេលនោះគាត់បានប្រាប់នគរបាលថា ការដែលគាត់លួចយកទឹកខ្មៅនោះគឺដើម្បីចែកចាយឲ្យក្រុមគ្រួសារ និងសាច់ញាតិប្រើប្រាស់ក្នុងការជ្រលក់ដៃដោយមិនចាំបាច់ទៅបោះឆ្នោត ។មិនតែប៉ុណ្ណោះគាត់ធ្វើបែបនេះ ក៏ព្រោះតែខឹងនឹងលោកអនុប្រធានភូមិរបស់គាត់ម្នាក់តែងមើលរំលងគាត់ដែលជាសមាជិកគណបក្សប្រជាជនម្នាក់ដែរ មិនដែលឲ្យគាត់ចូលប្រជុំការងារបក្សដើម្បីបានលុយ២ម៉ឺនរៀលដូចជាអ្នកដទៃៗទៀត។
ការចាប់ខ្លួននោះបានធ្វើឡើងកាលពីវេលាម៉ោង១០និង៣០នាទីព្រឹកថ្ងៃទី២៨ ខែកក្កដា ឆ្នាំ២០១៨ នៅក្នុងការិយាល័បោះឆ្នោតលេខ១៤០១ ស្ថិតនៅក្នុងសាលាបឋមសិក្សាត្រពាំងក្រសាំង ភូមិត្រពាំងអណ្ដូង សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ។
អ្នកគ្រូជាប់ចោទខាងលើឈ្មោះជា សុធារី អាយុ៤៦ឆ្នាំ ជាគ្រូបង្រៀននៅវិទ្យាល័យហ៊ុនសែនជម្ពូវ័នផងនិងជាអនុប្រធានការិយាល័យបោះឆ្នោតលេខ១៤០១នោះផងដែរ សព្វថ្ងៃមានទីលំនៅក្នុងភូមិសាមគ្គី២ សង្កាត់ត្រពាំងក្រសាំង ។
នគរបាលបានឲ្យដឹងថា អ្នកគ្រូរូបនេះត្រូវបានចាត់តាំងឲ្យធ្វើជាអនុប្រធានការិយាល័យបោះឆ្នោតលេខ១៤០១ ស្ថិតនៅក្នុងសាលាបឋមសិក្សាត្រពាំងក្រសាំង លុះដល់ពេលកើតហេតុគាត់បានធ្វើសកម្មភាពលួចយកទឹកថ្នាំជ្រលក់ដៃបោះឆ្នោតចេញពីការិយាល័យខាងលើ១ដបដាក់នៅក្នុងកាបូបស្ពាយរបស់គាត់បម្រុងគេចខ្លួន ប៉ុន្តែខណៈនោះត្រូវបានបែកការណ៍មានអ្នកប្រទះឃើញបានរាយការណ៍ជូនអាជ្ញាធរខណ្ឌពោធិ៍សែនជ័យ ពេលនោះលោកអភិបាលរងខណ្ឌធិ៍សែនជ័យម្នាក់ដឹកនាំកម្លាំងចុះទៅសហការជាមួយកម្លាំងនគរបាលប៉ុស្ដិ៍ត្រពាំងក្រសាំងចុះទៅចាប់ខ្លួនភ្លាមៗតែម្ដង។
ប្រភពដដែលបានបន្តថា ក្រោយពេលចាប់ខ្លួនធ្វើការត្រួតពិនិត្យបានរកឃើញទឹកថ្នាំជ្រលក់ដៃ១ដបនៅក្នុងកសបូបស្ពាយរបស់គាត់ ហើយដៃរបស់គាត់ក៏មានប្រឡាក់ទឹកថ្នាំនោះផងដែរ។បន្ទាប់មកកម្លាំងបានបញ្ជូនស្ត្រីរូបនេះទៅកាន់ផ្នែកនគរបាលព្រហ្មទណ្ឌខណ្ឌពោធិ៍សែនជ័យដើម្បីសាកសួរនិងកសាងសំណុំរឿងចាត់ការតាមច្បាប់។ប៉ុន្តែមិនទាន់ដឹងថាតើតុលាការសម្រេចបែបណានៅឡើយទេចំពោះទង្វើរបស់គាត់ខាងលើនេះ។
ក្រោយពេលដែលកម្លាំងនគរបាលសួរនាំពីគោលបំណងនៃការលួចយកទឹកថ្នាំជ្រលក់ដៃចេញពីការិយា
ល័យបោះឆ្នោតនេះ ត្រូវបានអ្នកគ្រូរូបនេះសារភាពថា គាត់ពិតជាបានប្រព្រឹត្តបែបនេះមែន ហើយគាត់មិនមែនជាសកម្មជនអតីតបក្សសង្គ្រោះជាតិនោះទេ គាត់គឺជាសមាជិកគណបក្សប្រជាជនកម្ពុជាមានទាំងប័ណ្ណសម្គាល់ខ្លួនបក្សត្រឹមត្រូវទៀតផង។ ប៉ុន្តែមូលហេតុដែលគាត់ធ្វើបែបនេះគឺដោយសារតែគាត់ខឹងសម្បារនឹងលោកអនុប្រធានភូមិម្នាក់ ដែលមើលរំលងរូបគាត់។
កន្លងមកពេលប្រជុំបក្សតែងបានរបបលុយ២ម៉ឺនរៀលរាល់លើក ប៉ុន្តែលោកអនុប្រធានភូមិមិនដែលឲ្យគាត់ទៅប្រជុំបានលុយនឹងគេ ឬឲ្យលុយរបបនេះមកគាត់ម្ដងណាឡើយ ។ ទើបគាត់ខឹងលួចយកទឹកថ្នាំជ្រលក់ដៃនេះក្នុងបំណងយកទៅឲ្យបងប្អូនសាច់ញាតិ និងក្រុមគ្រួសារប្រើប្រាស់ជ្រលក់ដៃដោយមិនចាំបាច់ទៅបោះឆ្នោតឡើយ ប៉ុន្តែមិននឹកស្មានថាត្រូវបែកការណ៍ និងត្រូវសមត្ថកិច្ចចាប់ខ្លួនបែបនេះទេ៕
ចែករំលែកព័តមាននេះ