រាជធានីភ្នំពេញ ៖ គ្រូពេទ្យបានព្រមានថា ក្រៅពីមេរោគនោះ អាហារជ្រក់ និងស្រា អាចរួមចំណែកនាំឱ្យប្រជាជនកម្ពុជាកើតមហារីកថ្លើមដ៏កាចសាហាវដែលបានសម្លាប់មនុស្សជាច្រើននាក់។
លោកវេជ្ជបណ្ឌិត អ៊ាវ សុខា ប្រធានផ្នែកមហារីក និងជំងឺឈាមនៃមន្ទីរពេទ្យកាល់ម៉ែតនិយាយថា មហារីកថ្លើមបង្កឡើងដោយមូលហេតុច្រើន ។ មូលហេតុទី១ គឺទាក់ទងនឹងម្ហូបប្រចាំថ្ងៃ ។ របបអាហារប្រភេទជាជ្រក់ ដូចជាទឹកត្រសក់ត្រាំង ជ្រក់អស់នឹងមានដុះផ្សិតសៗ ដែលនោះគឺជាមូលហេតុចំបងនៃការកើតជំងឺមហារីកថ្លើម។
វេជ្ជបណ្ឌិត អ៊ាវ សុខា បញ្ជាក់យ៉ាងដូច្នេះថា៖ «ផ្សិតសៗនឹងគឺសាហាវណាស់។ គេរកឃើញថា វាមានសារធាតុគីមីពុលមួយដែលដុះក្នុងផ្សិតនឹង មិនមែនមានន័យថា គេដាក់គីមីក្នុងជ្រក់ទេ ។ តែផ្សិតសៗនឹងគឺមានសារធាតុគីមីពុលម្យ៉ាងដែលមានឈ្មោះ B. Aflatoxin ដែលសាហាវជាងមេរោគរលាកថ្លើម បេ និង សេ បូកចូលគ្នា ៣៣២ ដង។ មានន័យថា វាធ្វើឲ្យកើតមហារីកថ្លើមខ្ពស់ជាង មេរោគរលាកថ្លើមបេ និងសេ បូកបញ្ចូលគ្នា ៣៣២ ដង។
នៅអាស៊ីអាគ្នេយ៍យើងនឹង រួមទាំងចិនផង នាំគ្នាហូបអានឹងច្រើនណាស់ ។ នៅលើពិភពលោកគេឃើញថា តំបន់អាស៊ីអាគ្នេយ៍យើងនឹង បូកទាំងប្រទេសចិនភាគខាងត្បូងនឹង គឺជាតំបន់ Top area ដែលកើតជំងឺមហារីកថ្លើមខ្ពស់ជាងគេបំផុតនៅលើពិភពលោក គឺដោយសារកត្តាចំណីអាហារនឹងឯង ។ នេះជាមូលហេតុធំសម្រាប់មហារីកថ្លើមនៅប្រទេសកម្ពុជាយើង ហើយនឹងតំបន់អាស៊ីអាគ្នេយ៍»។
លោកបានផ្តល់យោបល់ថា មុនបរិភោគអាហារជ្រក់ គេត្រូវយកវាទៅលាងទឹកឲ្យស្អាត កុំឲ្យមានជាប់ផ្សិតដើម្បីការពារអាយុជីវិតយើងបាន។
លោកបន្តទៀតថា ប៉ុន្តែនៅក្នុងនោះមូលហេតុនៃជំងឺមហារីក ក៏ជាប់ពាក់ព័ន្ធនឹងការមានមេរោគរលាកថ្លើម បេ ។ យ៉ាងណាមិញ គ្រូពេទ្យជំនាញបញ្ជាក់ថា តែមិនមែនការរលាកថ្លើម បេ ទាំងអស់សុទ្ធតែកើតមហារីកទេ ។ ប៉ុន្តែអាចមានពី ១ ទៅ ២ ភាគរយ ដែលវាវិវត្តទៅជាក្រិន ហើយអាចវិវត្តទៅរកមហារីក ។
នេះជាការលើកឡើងរបស់វេជ្ជបណ្ឌិត អ៊ាវ សុខា ដែលមានបទពិសោធន៍ខាងផ្នែកជំងឺមហារីកទាំងក្នុង និងក្រៅប្រទេសជាង ២០ ឆ្នាំមានប្រសាសន៍ថា ក្រសួងសុខាភិបាលបានបង្កើតឲ្យមានការចាក់វ៉ាក់សាំងលើកុមារ បើសិនជាកូនង៉ា (ទារកទើបកើត) មកគឺយើងចាក់វ៉ាក់សាំងរលាកថ្លើម បេ ឥឡូវកន្លែងណាក៏មានចាក់ដែរ សូម្បីតែនៅមណ្ឌលសុខភាព ។
វេជ្ជបណ្ឌិត អ៊ាវ សុខា មានប្រសាសន៍បន្តថា កាលណាយើងចាក់វ៉ាក់សាំងការពារទៅមេរោគរលាកថ្លើម បេ វាចូលក្នុងខ្លួនអ្នកជំងឺ (មនុស្ស) អត់កើត ព្រោះវាមានអង់ទីគ័រ ការពារខ្លួន ដល់អញ្ចឹងទៅយើងត្រូវបានទទួលការការពារ អញ្ចឹងយើងអត់កើតមហារីក ។
ប្រភពដដែលបានឲ្យដឹងថា យ៉ាងណាមិញ ការចាក់វ៉ាក់សាំងនេះ គឺបានតែមេរោគរលាកថ្លើម បេ ខណៈមេរោគរលាកថ្លើម សេ គឺអត់មានវ៉ាក់សាំងទេ ប៉ុន្តែមេរោគរលាកថ្លើមសេ គឺអាចលេបថ្នាំជាបាន ។ យើងទៅព្យាបាលលេបថ្នាំទៅគឺជាហើយ គឺលេបថ្នាំត្រឹមតែ ៣ ខែ ។
លោកវេជ្ជបណ្ឌិតបន្ថែមថា ប៉ុន្តែយើងខ្លាចត្រង់ថា អ្នកកើតមហារីករាល់ថ្ងៃនេះ ខ្លះគាត់ឆ្លងមេរោគរលាកថ្លើម បេ និង សេ ពីមុន ហើយឥតមានបានចាក់វ៉ាក់សាំងទេកាលពីក្មេង ហើយរលាកថ្លើម សេ នឹងក៏គាត់អត់បានព្យាបាល ដល់អញ្ចឹងការព្យាបាលគាត់គឺអត់ជា ដល់ពេលអត់ជា វាវិវត្តទៅដល់ក្រិនន រួចបន្ទាប់ពីក្រិននរួចកើតជាមហារីកតែម្តង។
បញ្ហាសំខាន់មួយទៀតនោះ គឺពាក់ព័ន្ធនឹងអ្នកផឹកស្រា។ អូ! គឺមនុស្សមួយចំនួន ផឹកស្រា ផឹកសាហាវណាស់ ។ ខ្ញុំនិយាយបែបនេះ អាចធ្វើឲ្យបងប្អូនអ្នកផឹកនឹងខឹងពេទ្យ ថាស្តីឲ្យ។ តែការពិត គឺចង់ឲ្យបងប្អូនមានសុខភាពល្អ ។ ប៉ុន្តែចង់និយាយថា បើអាចកាត់បន្ថយបានកាត់បន្ថយទៅ កុំឲ្យផឹកយកស្លាប់រស់អញ្ចឹង ។ យូរៗម្តង ផឹកប៊ីយ៉ែរមួយកំប៉ុងបាន កុំឲ្យតែ ១កេះ ៣ នាក់ ផឹកល្មមបានហើយ បើអត់ផឹករឹតតែល្អ ។
លោក វេជ្ជបណ្ឌិតនិយាយថា បញ្ហាសំខាន់មួយទៀតគឺទាក់ទងនឹងទន្លេមេគង្គ។ តាមដងទន្លេមេគង្គយើង ម្តុំក្រចេះ ស្ទឹងត្រែង ឡើងទៅប្រទេសឡាវនឹង គឺថាមានសត្វល្អិតមួយ ដែលនៅក្នុងចង្វែកថ្ម ជួនកាលទៅវាជ្រាបចូលទៅក្នុងខ្ចៅ ខ្យង ឬត្រី។ ត្រីទឹកសាបយើងពេលយើងវះទៅ គឺឃើញមានខ្មៅៗ (ខ្លះហៅជាតិ) ការពិតជាបារ៉ាស៊ីត ។ សត្វល្អិតនោះ ពេលប្រជាពលរដ្ឋចុះងូតទឹក វាជ្រាបចូលតាមចង្វែកជើង ចន្លោះជើង ចូលទៅចរន្តឈាម វាចូលទៅដល់ក្នុងសាច់ថ្លើម វាទៅទុំ ហើយយូរទៅឲ្យកើតជាមហារីកថ្លើម។
លោកគ្រូពេទ្យបញ្ជាក់ថា កន្លងមកក៏មានព័ត៌មានផ្សព្វផ្សាយដែលមានកុមារតូចៗនៅក្រចេះ ស្ទឹងត្រែង គឺគាត់កើតមហារីកថ្លើមដោយសារតែប៉ារ៉ាស៊ីតនេះ ។ វានឹងមានតែនៅទន្លេមេគង្គយើងទេ ៕
អត្ថបទនេះនាំជូនមកដោយក្រុមហ៊ុនធានារ៉ាប់រងជីវិត AIA
ចែករំលែកព័តមាននេះ