ប្រទេសជប៉ុន ៖ ព្យុះត្រូពីកាល់ខ្លាំងមួយកាលពីថ្ងៃទី២៩ កក្កដា បានបង្កឲ្យមានភ្លៀងធ្លាក់យ៉ាងខ្លាំងលើភាគកណ្ដាលជប៉ុន មិនដល់១ខែផង ក្រោយគ្រោះទឹកជំនន់ដ៏សែនអាក្រក់មួយមក។
យោងតាមទូរទស្សន៍រដ្ឋ NHK ថា ព្យុះទីហ្វុងឈ្មោះ JONGDARI អមដោយខ្យល់មានល្បឿនដល់ទៅ១៨០គីឡូម៉ែត្រក្នុង១ម៉ោង បានបោកបក់ដល់ដែនដីជប៉ុននៅ ISE តំបន់ក្រុង MIE នាវេលាម៉ោង១រំលងអធ្រាតថ្ងៃទី២៩ កក្កដា។ ទោះបីយ៉ាងណាព្យុះនោះបានថមថយកម្លាំងមកជាព្យុះត្រូពីកាល់ តែការប្រកាសអាសន្នកម្រិតខ្ពស់នៅបន្តក្នុងខេត្តជាច្រើន។
លោកកូជីគូនីតូមី អ្នកទទួលខុសត្រូវមា្នក់នៃផ្នែកគ្រប់គ្រងវិបត្តិ ក្រុងអូកាហាម៉ាភាគខាងលិចជប៉ុនថ្លែងថា យើងនៅពុំទាន់បញ្ឈប់ការប្រកាសអាសន្ននៅឡើយ ចាប់តាំងពីគ្រោះទឹកជំនន់មហាអាក្រក់កាលពីដើមខែកក្កដា។ យើងរីករាយដែលនាដំណាក់កាលនេះពុំមានទឹកលិចថ្មីៗទៀត។
ក្រោយពីបង្កឲ្យមានភ្លៀងធ្លាក់ខ្លាំងនៅភាគខាងកើតជប៉ុន ព្យុះនេះនាវេលាថ្ងៃត្រង់ថ្ងៃទី២៩ កក្កដា បានបោកបក់សំដៅភាគខាងលិចប្រទេស ហើយអាជ្ញាធរបានស្នើឲ្យជម្លៀសមនុស្សចេញច្រើនសិបពាន់នាក់មុនពេលភ្លៀងធ្លាក់កាន់តែខ្លាំង។
បណ្ដាទូរទស្សន៍បានផ្សាយរូបភាពទាំងឡាយបង្ហាញពីរលកធំៗ វាយប្រហារលើទំនប់នានានៅភាគនិរតីក្រុងតូក្យូ។ បើតាមទូរទស្សន៍ NHK មនុស្សយ៉ាងតិច១៩នាក់រងរបួសក្នុងក្រុង៦របស់ជប៉ុន ៕
ចែករំលែកព័តមាននេះ