យើងត្រូវតែប្រយ័ត្នឲ្យមែនទែនចំពោះមនុស្សខ្លះដែលនិយាយចាក់បណ្តោយ ហីអើតាមជានិច្ច ព្រោះអ្នកនិយាយចាក់បណ្តោយខ្លះគេមិនមានគំនិតចង់ឲ្យយើងចម្រើននោះទេ គេមានតែត្រេកអរនៅពេលណាដែលយើងធ្លាក់ដុនដា រងទុក្ខវេទនា។ ចំពោះមិត្តប្លមគេមានចិត្តប្រឡងប្រណាំងជាមួយយើងជានិច្ច នៅពេលដែលយើងមានលំនឹង ឬកំពុងចម្រើន គេមិនចោលយើងទេ គេតែងពឹងពាក់យើងឱបដៃឱបជើង…
យើងត្រូវតែប្រយ័ត្នឲ្យមែនទែនចំពោះមនុស្សខ្លះដែលនិយាយចាក់បណ្តោយ ហីអើតាមជានិច្ច ព្រោះអ្នកនិយាយចាក់បណ្តោយខ្លះគេមិនមានគំនិតចង់ឲ្យយើងចម្រើននោះទេ គេមានតែត្រេកអរនៅពេលណាដែលយើងធ្លាក់ដុនដា រងទុក្ខវេទនា។
ចំពោះមិត្តប្លមគេមានចិត្តប្រឡងប្រណាំងជាមួយយើងជានិច្ច នៅពេលដែលយើងមានលំនឹង ឬកំពុងចម្រើន គេមិនចោលយើងទេ គេតែងពឹងពាក់យើងឱបដៃឱបជើង តែនៅពេលណាដែលយើងចុះខ្សោយ ឬមានសេចក្តីប្រមាទភ្លាំងភ្លាត់នៅក្នុងការងារភ្លាម គេក៏ជួយច្រានយើងដោយពាក្យសរសើរ ដោយសម្តីបញ្ជោរក្នុងបំណងកុំឲ្យយើងមើលឃើញនូវការប្រហែសធ្វេសរបស់យើង។
លុះដល់កំហុសនោះកាន់តែច្រើន គេក៏ដើរខ្សឹប ដើរនិយាយប្រាប់អ្នកដទៃនូវអ្វីៗដែលជាកំហុសរបស់យើង ថែមទាំងប្រឌិតរឿងអាស្រូវមិនពិតផ្សំបញ្ចូលថែមទៀត គឺដល់ពេលដែលធាក់យើងឲ្យខ្ទាតចេញ ដើម្បីគេស៊ីដាច់កន្លែងនោះតែម្តង ព្រោះគេឃ្លានជាយូរមកហើយ ។
មានកល្យាណបុគ្គលខ្លះមិនហ៊ានហាមឃាត់យើងដែលធ្វើនូវអំពើឆ្គាំឆ្គងទេ មកអំពីគេខ្លាចយើងខឹង ខ្លាចយើងស្អប់គេ បានជាគេមិនហ៊ានឃាត់ តែគេអាចធ្វើជាមិត្តល្អបាន បើគេមានសន្តានចិត្តល្អ ព្យាយាមដឹកនាំឲ្យយើងស្តាប់ធម៌ រៀនធម៌ គេសរសើរយើងក្នុងផ្លូវល្អ ក្នុងគោលបំណងឲ្យយើងមាននូវស្មារតីវៀរចាកអំពើសៅហ្មងដោយខ្លួនឯង និងប្រាប់ឱ្យយើងដឹងនូវកំហុសឆ្គងទាន់ពេលវេលា។
ពិតមែនហើយមនុស្សមានច្រើនប្រភេទណាស់ ប៉ុន្តែការជ្រើសរើសមិត្តមិនមែនជាការផ្សងព្រេងដូចចាក់ឆ្នោតទេ គឺត្រូវតែសិក្សាអំពីលក្ខណៈរបស់មនុស្សឲ្យបានច្បាស់លាស់។ តាមពិតព្រះពុទ្ធជាកល្យាណមិត្តមួយព្រះអង្គដ៏កំពូលជាមួយនឹងពុទ្ធបរិស័ទទូទៅ ការប្រព្រឹត្តព្រហ្មចរិយធម៌រហូតបានសម្រេចទាំងមូល ដោយអាស្រ័យព្រះអង្គជាកល្យាណមិត្ត តាមដានពិនិត្យការប្រព្រឹត្តរបស់យើងរាល់ថ្ងៃ ខុសឬត្រូវយ៉ាងណាៗ ព្រះអង្គហ៊ានជួយថា ជួយប្រាប់ និងជួយបង្ហាញផ្លូវត្រូវឱ្យដើរទៀតផង ។
មនុស្សល្អកម្ររកបានណាស់ មនុស្សល្អធ្វើអាក្រក់បានដោយលំបាក ប៉ុន្តែមនុស្សអាក្រក់ធ្វើបាបបានដោយងាយ ថែមទាំងមិនចេះឆ្អែតក្នុងអំពើអបាយនោះទៀតផង ។
ចែករំលែកព័តមាននេះ