ខេត្តស្ទឹងត្រែង ៖ ចាប់តាំពីថ្ងៃគ្រោះមហន្តរាយដោយការបាក់ទំនប់វារីអគ្គិសនីនៅខេត្តអត្តពឺ ប្រទេសឡាវ បានបង្កឱ្យប្រជាពលរដ្ឋរាប់សិបនាក់ស្លាប់ និងរាប់សិបនាក់ទៀតបាត់ខ្លួន ដោយការបាក់ទំនប់វារីអគ្គិសនីសេពានសេណាមណយ កាលពីថ្ងៃទី២៣ ខែកក្កដា ២០១៨ កន្លងមក…
ខេត្តស្ទឹងត្រែង ៖ ចាប់តាំពីថ្ងៃគ្រោះមហន្តរាយដោយការបាក់ទំនប់វារីអគ្គិសនីនៅខេត្តអត្តពឺ ប្រទេសឡាវ បានបង្កឱ្យប្រជាពលរដ្ឋរាប់សិបនាក់ស្លាប់ និងរាប់សិបនាក់ទៀតបាត់ខ្លួន ដោយការបាក់ទំនប់វារីអគ្គិសនីសេពានសេណាមណយ កាលពីថ្ងៃទី២៣ ខែកក្កដា ២០១៨ កន្លងមក ក្នុងនោះអាជ្ញាធរឡាវក៏ជូនដំណឹង រួមទាំងការស្នើដល់កម្ពុជានៃខេត្តស្ទឹងត្រែង ជួយសម្រួលគ្រាប្រទះឃើញសពពលរដ្ឋរបស់ខ្លួន និងជូនដំណឹងត្រឡប់ភាគីឡាវ ដើម្បីមកទទួលប្រគល់ជូនគ្រួសារធ្វើបុណ្យតាមប្រពៃណីតាមទំនៀមទម្លាប់។
តាមមន្ត្រីយោធាការពារព្រំដែនកម្ពុជា-ឡាវឱ្យដឹងថា សពពលរដ្ឋឡាវចំនួន២៩នាក់ ត្រូវបានកម្ពុជាបញ្ជូនទៅឱ្យភាគីឡាវជាបន្តបន្ទាប់ ក្រោយប្រទះឃើញសពអណ្តែតមកខ្សែទឹកខាងក្រោមចាប់ពីទន្លេសេពាន ដល់ស្ពានអូរគុ បន្តរហូតមកដល់វរសេនាតូចការពារព្រំដែន១០១ ឃុំសន្តិភាព ស្រុកសៀមប៉ាង។ នៅរសៀលថ្ងៃទី២៩ កក្កដា សពពលរដ្ឋឡាវម្នាក់ទៀតអណ្តែតទៅដល់ស្រុកសៀមបូក ខេត្តស្ទឹងត្រែង ហើយត្រូវអគ្គកុងស៊ុលឡាវប្រចាំខេត្តស្ទឹងត្រែង ទៅទទួល និងវិចខ្ចប់នាំទៅខេត្តអត្តពឺ ប្រទេសឡាវ នៅយប់ថ្ងៃដដែលនោះផងដែរ។
ទោះយ៉ាងណាលោក សំ ផន អគ្គកុងស៊ុលឡាវប្រចាំខេត្តស្ទឹងត្រែង បានបញ្ជាក់នៅរសៀលថ្ងៃទី៣០ នេះថា យោងតាមរបាយការណ៍អាជ្ញាធរខេត្តអត្តពឺ ការរកឃើញសពប្រជាពលរដ្ឋរបស់ខ្លួនទាំងនៅប្រទេសឡាវ និងកម្ពុជាមានចំនួន១១នាក់ និងបាត់ខ្លួន១២១នាក់ដែលមិនទាន់រកឃើញ។
ប៉ុន្តែបើតាមរបាយការណ៍មន្ត្រីយោធាការពារព្រំដែនកម្ពុជាបានផ្តល់ព័ត៌មានសពពលរដ្ឋឡាវចំនួន២៩នាក់ត្រូវប្រគល់ទៅភាគីឡាវបន្តបន្ទាប់ ក្រោយការបាក់ទំនប់នៅខេត្តអត្តពឺ និងសពបុរសម្នាក់ទៀតត្រូវប្រទះឃើញនៅស្រុកសៀមបូក ដូច្នេះសរុបទាំងអស់ចំនួន៣០នាក់ហើយ។ ប្រភពដដែលបន្តថា អាជ្ញាធរឡាវនៅតែបន្តការស្នើដល់កម្ពុជា ខណៈពលរដ្ឋរបស់ខ្លួននៅបាត់១៣១នាក់ទៀតដែលមិនទាន់រកឃើញ៕
ចែករំលែកព័តមាននេះ