រាជធានីភ្នំពេញ ៖ ថ្ងៃទី២៤ មិថុនា ២០១០ ខាងមុខ គឺជាថ្ងៃកំណត់សម្ពោធបើកឱ្យប្រើប្រាស់ជាផ្លូវការនូវស្ពានអាកាសក្បាលថ្នល់ដែលតាមគំរោង គឺប្រព្រឹត្ដធ្វើក្រោមអធិបតីភាពដ៏ខ្ពង់ខ្ពស់របស់សម្ដេចតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា ។ មុនថ្ងៃសម្ពោធឈានចូលមកដល់ សាលារាជធានីភ្នំពេញរួមជាមួយក្រុមហ៊ុនស្ថាបនាបាននិងកំពុងសំរុកយ៉ាងមមាញឹកទាំងយប់ទាំងថ្ងៃបង្ហើយការងារដែលសេសសល់មួយចំនួន ជាពិសេសការពង្រីកមហាវិថីព្រះមុនីវង្សផ្នែកខាងក្រោមស្ពានឱ្យបានធំទូលាយ ការដាក់ភ្លើងស្ដុប ព្រមទាំងការងារផ្សេងៗមួយចំនួនទៀត ។ ជាក់ស្ដែងនៅយប់ថ្ងៃទី២០ មិថុនា ក្រុមហ៊ុនឯក ជនមួយឈ្មោះ T.C.M បានទទួលបន្ដពីសាលារាជធានីភ្នំពេញក្នុងការអ៊ុតពង្រីកផ្លូវជំរុញធ្វើយ៉ាងណាឱ្យបានរួចរាល់មុនថ្ងៃសម្ពោធទី២៤ មិថុនា ហើយការងារនេះមានការចូលរួមចុះជួយសំរួលជាប្រចាំពីអាជ្ញាធរខណ្ឌចំការមន ដឹកនាំដោយលោកឡូ យុយ អភិបាលខណ្ឌ ។
លោកមា សំ តំណាងក្រុមហ៊ុនអ៊ុតផ្លូវខាងលើនេះបានឱ្យដឹងថា តាមការណែនាំរបស់លោកកែប ជុតិមា អភិបាលរាជធានីភ្នំពេញ ក្រុមហ៊ុនរបស់លោកបាននិងកំពុងសំរុកធ្វើការពង្រីកផ្លូវ និងចាក់អ៊ុតកៅស៊ូឱ្យរួចរាល់មុនថ្ងៃសម្ពោធ ដែលការពង្រីកគឺចាប់ពីស្ពានអាកាសក្បាលថ្នល់រហូតដល់ស្ថានីយប្រេងឥន្ធនៈច្រមុះជ្រូកក្នុងប្រវែង២៥០ម៉ែត្រ ។ ការពង្រីកកំណាត់ផ្លូវនេះគឺឱ្យបានទទឹង១២ម៉ែត្រកន្លះម្ខាងគិតពីអ័ក្សផ្លូវ ដើម្បីឱ្យបានធំទូលាយបង្កលក្ខណៈងាយស្រួលដល់ប្រជាពលរដ្ឋធ្វើដំណើរកាត់បន្ថយការកកស្ទះចរាចរណ៍ ។
លោកជា ពិសិដ្ឋ មន្ដ្រីជំនាញសាលារាជ ធានីភ្នំពេញបានឱ្យដឹងថា ជារួមការស្ថាបនាស្ពានអាកាសក្បាលថ្នល់នេះ គឺជិតរួចរាល់១០០%ហើយ ហើយពេលនេះក្រុមការងារកំពុងសំរុកពង្រីកផ្លូវឱ្យបានធំទូលាយជាមួយនឹងការងារដាក់ភ្លើងស្ដុប និងស្ថាបនាសួនក្រោមស្ពាន ។ ប៉ុន្ដែទោះជាយ៉ាងណា ក៏មានការងារមួយចំនួនតូចនៅសេសសល់ចៀសមិន
ផុត ជាក់ស្ដែងសួនច្បារខាងក្រោមស្ពានអាចនៅសល់តិចតួច គឺទាល់តែបើកឱ្យប្រើប្រាស់ស្ពាន ហើយបិទចរាចរណ៍មួយផ្នែកណាមួយ ដើម្បីស្ថាបនាសួនបញ្ចប់ និងកំណាត់ផ្លូវដែលនៅសល់ប្រមាណ៥០ម៉ែត្រពីច្រមុះជ្រូកស្ថានីយប្រេងឥន្ធនៈដែលត្រូវស្ថាបនាតាមក្រោយ តែការងារសំខាន់ៗបានរួចរាល់ទាំងស្រុងហើយ ។
គួររំលឹកថា ស្ពានអាកាសក្បាលថ្នល់នេះបានបើកការដ្ឋានសាងសង់កាលពីខែ ឧសភា ២០០៩ ស្ថាបនាដោយក្រុមហ៊ុនក្នុងស្រុកដ៏ធំមួយ គឺក្រុមហ៊ុន O.C.I.C ដែលមានលោកឧកញ៉ាពុង ឃាវសែ ជាប្រធាន ដោយចំណាយអស់ទឹកប្រាក់ប្រមាណ៦លានដុល្លារសហរដ្ឋអាមេរិក ដោយមិនគិតពីស្ពានព្រះមុនីវង្សថ្មីដែលទឹកប្រាក់ស្ថាបនាបានមកពីការជួលដីកោះពេជ្រឱ្យក្រុមហ៊ុនវិនិយោគរយៈពេល៩៩ឆ្នាំ ។ ស្ពានអាកាសក្បាលថ្នល់នេះបានបើកការដ្ឋានស្របគ្នានឹងពិធីសម្ពោធដាក់ឱ្យប្រើប្រាស់ស្ពានព្រះមុនីវង្សថ្មី ក្រោម អធិបតីភាពដ៏ខ្ពស់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន ។ ស្ពាននេះ មានបណ្ដោយប្រវែង៣០៨ម៉ែត្រ លាតសន្ធឹងលើកំណាត់ផ្លូវជាតិលេខ២ ចាប់ពីអតីត មន្ទីរពេទ្យការងារ រហូតដល់មុខអគ្គស្នងការដ្ឋាននគរបាលជាតិ មហាវិថីព្រះនរោត្ដម មាន ទទឹង១៤,២ម៉ែត្រ កំពស់ត្រង់ចំណុចកណ្ដាល៨ម៉ែត្រ ។
យោងតាមសេចក្ដីជូនដំណឹងរបស់សាលារាជធានីបានឱ្យដឹងថា នៅក្នុងថ្ងៃសម្ពោធ ស្ពានអាកាសក្បាលថ្នល់ដែលជាសមិទ្ធផលជាប្រវត្ដិសាស្ដ្រស្ថិតក្នុងព្រំប្រទល់ខណ្ឌចំការមន និងខណ្ឌមានជ័យ ដើម្បីឱ្យការរៀបចំពិធីដ៏អធិកអធមខាងលើប្រកបដោយជោគជ័យមានសណ្ដាប់ធ្នាប់របៀបរៀបរយល្អ សាលារាជធានីនឹងផ្អាកជាបណ្ដោះអាសន្នការធ្វើចរាចររបស់យានយន្ដគ្រប់ប្រភេទលើកំណាត់មហាវិថីព្រះនរោត្ដម ចាប់ពីរង្វង់មូលក្បាលថ្នល់ដល់មុខក្រសួងមហាផ្ទៃចាប់ពីម៉ោង១២ថ្ងៃត្រង់ថ្ងៃទី២៣ មិថុនា ឆ្នាំ២០១០ រហូតដល់ម៉ោង១២ថ្ងៃត្រង់ថ្ងៃទី២៤ មិថុនា ឆ្នាំ ២០១០ ។ ផុតកំណត់រយៈពេលនេះការធ្វើចរាចរណ៍នឹងដំណើរការប្រក្រតីឡើងវិញ ដោយរួមទាំងការអនុញាតឱ្យធ្វើចរាចរណ៍លើស្ពានអាកាសក្បាលថ្នល់សំរាប់ទិសដៅចរាចរណ៍ចេញ-ចូលរាជធានីភ្នំពេញផងដែរ ៕
ចែករំលែកព័តមាននេះ