ខេត្តត្បូងឃ្មុំ ៖ រថយន្តតូច១គ្រឿងមិនស្គាល់ម៉ាក បានបុកស្ត្រីចំណាស់ម្នាក់អាយុប្រហែលជាង៦០ឆ្នាំពីក្រោយនៅលើផ្លូវជាតិលេខ៧ ត្រង់ចន្លោះបង្គោលគីឡូម៉ែត្រលេខ១២៨-១២៩ ក្នុងភូមិទួលវិហារ ឃុំជីរោទ៍ទី២ ស្រុកត្បូងឃ្មុំ កាលពីវេលាម៉ោង១០យប់ថ្ងៃទី២៧ ខែកក្កដា…
ខេត្តត្បូងឃ្មុំ ៖ រថយន្តតូច១គ្រឿងមិនស្គាល់ម៉ាក បានបុកស្ត្រីចំណាស់ម្នាក់អាយុប្រហែលជាង៦០ឆ្នាំពីក្រោយនៅលើផ្លូវជាតិលេខ៧ ត្រង់ចន្លោះបង្គោលគីឡូម៉ែត្រលេខ១២៨-១២៩ ក្នុងភូមិទួលវិហារ ឃុំជីរោទ៍ទី២ ស្រុកត្បូងឃ្មុំ កាលពីវេលាម៉ោង១០យប់ថ្ងៃទី២៧ ខែកក្កដា ។
ហេតុការណ៍ដ៏រន្ធត់នេះ បណ្តាលឲ្យស្ត្រីរងគ្រោះស្លាប់ភ្លាមៗដោយដាច់ខ្លួនជាបំបែក ហើយរថយន្តបានបើករត់គេចបាត់ស្រមោល ។ មន្ត្រីនគរបាលចរាចរណ៍ស្រុកត្បូងឃ្មុំ ប្រាប់ឲ្យដឹងថា ស្ត្រីរងគ្រោះដើរក្នុងទិសដៅពីខាងកើតទៅខាងលិចតាមបណ្តោយផ្លូវហើយជាកន្លែងងងឹតផង ។ខណៈទៅដល់ចំណុចខាងលើ ស្រាប់តែមានរថយន្តមួយគ្រឿងមិនស្គាល់ម៉ាក បានបុកពីក្រោយពេញទំហឹង ហើយកិនបន្ថែមបណ្តាលឲ្យខ្លួនប្រាណសពត្រូវដាច់ជាបំបែកនិងហូរឈាមពេញផ្លូវ ។
ប្រភពដដែលបន្តថា រថយន្តមិនស្គាល់អត្តសញ្ញាណនោះបើកបរក្នុងល្បឿនលឿន ហើយក្រោយពីបុកមនុស្សស្លាប់ក៏បន្ថែមល្បឿន បើករត់គេចបាត់ស្រមោល ចំណែកសពមិនត្រូវបានសមត្ថកិច្ចស្គាត់អត្តសញ្ញាណទេ ។
ដោយក្តីអាណិតអាសូរ នាយទាហានម្នាក់បានជួយឧបត្ថម្ភថវិកានិងបានយកសពមកបូជានៅវត្តស្រែសៀម តាមប្រពៃណី ។ ស្ត្រីចំណាស់ដែលរថយន្តបុកស្លាប់នេះ ពលរដ្ឋតែងឃើញគាត់ដើរទៅវិញទៅមកតាមផ្លូវជាតិ ហើយជាមនុស្សមានសតិមិនប្រក្រតីផងដែរ ដែលកន្លងមកមានពេលខ្លះរថយន្តរកកល់នឹងបុកទៀតផង ។
សមត្ថកិច្ចបានប្រកាសរកសាច់ញាតិ តែមិនមានអ្នកណាម្នាក់ស្គាល់អត្តសញ្ញាណថា ស្ត្រីរងគ្រោះមានស្រុកកំណើតនៅទីណាឡើយ ៕
ចែករំលែកព័តមាននេះ