រាជធានីភ្នំពេញ ៖ វេបសាយផ្សព្វផ្សាយព័ត៌មានចំនួន១៧ ត្រូវបានក្រសួងព័ត៌មានបិទរយៈពេល៤៨ម៉ោង គិតចាប់ពីម៉ោង១២យប់ថ្ងៃទី២៧ ខែកក្កដា រហូតដល់ម៉ោង១២យប់ថ្ងៃទី២៩ ខែកក្កដា ពោលគឺមិនឲ្យដំណើរការផ្សព្វផ្សាយព័ត៌មាននៅថ្ងៃស និងនៅថ្ងៃបោះឆ្នោត ។ បើតាមមន្ត្រីក្រសួងព័ត៌មានថា វិធានការនេះគឺដើម្បីរក្សាភាពស្ងប់ស្ងាត់ទាំងនៅថ្ងៃស និងថ្ងៃបោះឆ្នោតដែលជាការអំពាវនាវរបស់ គ.ជ.ប ។
វេ៉បសាយផ្សព្វផ្សាយព័ត៌មានទាំង១៧នេះ មានជាអាទិ៍ វេបសាយវិទ្យុVOD វិទ្យុVOA វិទ្យុអាស៊ីសេរី វេបសាយកាសែតភ្នំពេញប៉ុស្តិ៍ និងវ៉េបសាយមួយចំនួនទៀត ។ វេ៉បសាយទាំងនេះ ត្រូវបានបិទដំណើរការតាំងពីម៉ោង១២យប់ថ្ងៃទី២៧ ខែកក្កដាមកម្លេ៉ះ ។
លោក ផុស សុវណ្ណ អគ្គនាយកនៃអគ្គនាយកដ្ឋានព័ត៌មាននិងសោតទស្សន៍នៃក្រសួងព័ត៌មាន ត្រូវបានវិទ្យុបារាំងអន្តរជាតិដកស្រង់ការបកស្រាយនៅរសៀលថ្ងៃសៅរ៍ ទី២៨ ខែកក្កដាថា ការបិទវេបសាយទាំងនេះ គឺធ្វើឡើងតាមការអំពាវនាវរបស់គណៈកម្មាធិការជាតិរៀបចំការបោះឆ្នោត(គ.ជ.ប) ដែលស្នើឲ្យមានភាពស្ងប់ស្ងាត់នៅថ្ងៃស និងនៅថ្ងៃបោះឆ្នោត ពោល គឺមិនឲ្យផ្សព្វផ្សាយព័ត៌មានណាដែលប៉ះពាល់ដល់ដំណើរ ការបោះឆ្នោត ។
បើតាមលោក ផុស សុវណ្ណ វេបសាយដែលក្រសួងព័ត៌មានបញ្ជាឲ្យបិទនេះ គឺមិនមានម្ចាស់ច្បាស់លាស់ និងមិនបានចុះបញ្ចីនៅក្រសួងព័ត៌មាន ធ្វើឲ្យក្រសួងមិនដឹងថាត្រូវផ្ញើសេចក្តីជូនដំណឹងទៅកាន់អ្នកណា និងនៅកន្លែងណា ។ លោកផុស សុវណ្ណ គូសបញ្ជាក់ថា ក្រសួងព័ត៌មាន គឺជាអ្នកគ្រប់គ្រងនិងទទួលខុសត្រូវលើការចុះផ្សាយរបស់បណ្តាវេបសាយព័ត៌មានទាំងអស់ ។ ដូច្នេះហើយ ចង់ឬមិនចង់ ក្រសួងត្រូវតែចាត់វិធានការដើម្បីឲ្យស្របទៅនឹងច្បាប់ស្តីពីការបោះឆ្នោតរបស់ គ.ជ.ប ។
បើតាមលោកផុស សុវណ្ណ ថា ការបិទវេបសាយបែបនេះមិនមែនជារឿងចម្លែកអ្វីនោះទេ ដោយហេតុថាកាលពីអាណត្តិមុនៗ ក្រសួងព័ត៌មានក៏ធ្លាប់បានធ្វើដូច្នេះដែរ។ក្រោយពីការចាត់វិធានការរបស់ក្រសួងព័ត៌
មាននេះ មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ ដែលគ្រប់គ្រងលើវិទ្យុVOD បានចេញសេចក្តីប្រកាសព័ត៌មានមួយដោយការពារពីភាពត្រឹមត្រូវនិងស្របច្បាប់នៃវេបសាយព័ត៌មានVOD ។
ក្រៅពីការពារVOD មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ ក៏បានចាត់ទុកវិធានការរបស់ក្រសួងព័ត៌មាននេះថា ជារឿងនយោបាយ និងរារាំងប្រជាពលរដ្ឋកម្ពុជាដែលកំពុងត្រូវការយ៉ាងខ្លាំងនូវសារព័ត៌មានឯករាជ្យ ៕
ចែករំលែកព័តមាននេះ