ខេត្តបាត់ដំបង ៖ សមត្ថកិច្ចបានរាយការណ៍ថា ជនមិនស្គាល់មុខបានគាស់ផ្ទះគ្រូបង្រៀនម្នាក់ ចូលលួចទ្រព្យសម្បត្តិអស់មួយចំនួន ដែលម្ចាស់ផ្ទះបានដឹងនៅវេលាម៉ោង០៧ និង២០នាទីយប់ថ្ងៃទី២៩ កក្កដា នៅចំណុចភូមិត្រពាំងប្រលិត ឃុំសន្តិភាព…
ខេត្តបាត់ដំបង ៖ សមត្ថកិច្ចបានរាយការណ៍ថា ជនមិនស្គាល់មុខបានគាស់ផ្ទះគ្រូបង្រៀនម្នាក់ ចូលលួចទ្រព្យសម្បត្តិអស់មួយចំនួន ដែលម្ចាស់ផ្ទះបានដឹងនៅវេលាម៉ោង០៧ និង២០នាទីយប់ថ្ងៃទី២៩ កក្កដា
នៅចំណុចភូមិត្រពាំងប្រលិត ឃុំសន្តិភាព ស្រុកសំពៅលូន ខណ:ម្ចាស់ផ្ទះជាប់រវល់ទៅរៀបចំការងារជាគណៈកម្មការបោះឆ្នោតនៅការិយាល័យ ។
សមត្ថកិច្ចបានឱ្យដឹងថា ម្ចាស់ផ្ទះរងគ្រោះឈ្មោះជុំ វុទ្ធី ភេទប្រុស អាយុ៣៨ឆ្នាំ ជាគ្រូបង្រៀន ។ បើតាមម្ចាស់ផ្ទះថា គាត់មិនបានដឹងអំពីពេលវេលាដែលជនល្មើសធ្វើសកម្មភាពគាស់ផ្ទះគាត់នោះទេ ព្រោះគាត់និងភរិយាជាប់រវល់ទៅបំរើការងារបោះឆ្នោតនៅមូលដ្ឋាន លុះត្រឡប់មកវិញ ក៏ឃើញមានស្នាមគាស់ផ្ទះ និងបាត់បង់ទ្រព្យសម្បត្តិមួយចំនួន ទើបគាត់រាយការណីប្ដឹងសមត្ថកិច្ចតែម្ដង ។
សមត្ថកិច្ចបានបញ្ជាក់ថា សម្ភារដែលបាត់បង់មានមាន១-លុយ៨៥ម៉ឺនរៀល ២-ទូរទស្សន៍៣២អ៊ីញ១គ្រឿង ៣-ធុងបាស់១ និង៤-ខ្សែកប្លាទីន២ជី ។ ជុំវិញករណីនេះ សមត្ថកិច្ចបាននឹងកំពុងធ្វើការស៊ើបអង្កេត តែរហូតដល់ពេលមិនទាន់មានតម្រុយអំពីមុខសញ្ញាជនសង្ស័យនៅឡើយទេ ។
សូមបញ្ជាក់ថា កាលពីរសៀលថ្ងៃទី២៨ កក្កដា ចោរបានគាស់ផ្ទះអ្នកគ្រូពេទ្យម្នាក់ ឈ្មោះអ៊ុំ ប៉ុន អាយុ៥៦ឆ្នាំ នៅភូមិតាស្តា ឃុំតាស្តា ស្រុកសំពៅលូន ដូចគ្នា ហើយចោរបានលួចយកលុយចំនួន៥ម៉ឺនបាត និងខ្សែដៃមាស១ខ្សែតម្លៃ៥ម៉ឺនបាត រួចគេចខ្លួនដោយសុវត្ថិភាព ។
ខណ:សមត្ថកិច្ចកំពុងបើកការស៊ើបអង្កេត និងមិនទាន់កំណត់មុខសញ្ញាជនដៃដល់គាស់ផ្ទះអ្នកគ្រូពេទ្យខាងលើនេះផង ស្រាប់តែនៅថ្ងៃទី២៩ កក្កដា ជនមិនស្គាល់មុខ បានធ្វើសកម្មភាពគាស់ផ្ទះលោកគ្រូបង្រៀនម្នាក់ទៀត ដែលនៅស្រុកសំពៅលូនដូចគ្នា ហើយជនដៃដល់បានគេចខ្លួនដោយសុវត្ថិភាពដដែល ។
សមត្ថកិច្ចបានដាក់ការសង្ស័យជំហានដំបូងថា ករណីគាស់ទម្លុះទំលាយលំនៅឋានខាងលើនេះ ជនដៃដល់អាចជាមុខសញ្ញាចាស់ ដែលទើបចេញពីគុក ហើយមិនមែននៅក្រៅស្រុកដែរ ។ ពេលនេះ សមត្ថកិច្ចកំពុងស្រាវជ្រាវរកមុខសញ្ញាទាំងនោះហើយ ។
ចែករំលែកព័តមាននេះ