ខេត្តកណ្ដាល ៖ បុរសម្នាក់អតីតជាពលករទូកនេសាទនៅថៃបានចូលជើងជាមួយស្លាបចក្រ គាត់បានក្លាយខ្លួនជាជនពិការជើង កន្លងមកគាត់ព្យាយាមសម្លាប់ខ្លួន៣លើក ប៉ុន្តែមិនសម្រេច លុះលើកទី៤នេះ ប្រើវិធីដែលគ្មាននរណាម្នាក់នឹកស្មានដល់ ក៏បានលង់ស្លាប់សម្រេច ហេតុការណ៍នេះកើតឡើងកាលពីម៉ោង១២និង៤៥ នាទីរសៀល ថ្ងៃទី២៨ ខែកក្កដា ឆ្នាំ២០១៨ ស្ថិតក្នុងភូមិត្រពាំងវែង ឃុំឆក់ឈើនាង ស្រុកអង្គស្នួល ខេត្តកណ្តាល។
បុរសរូបនេះឈ្មោះ Vieng Yang Choung អាយុ៤៦ឆ្នាំ ជនជាតិវៀតណាម គាត់គឺជាជនពិការជើងទាំង២ដែលត្រូវគ្រូពេទ្យកាត់ចោលត្រឹមភ្លៅ និងបានស្នាក់នៅក្នុងអង្គការជិត១០ឆ្នាំកន្លងមកហើយ។
នគរបាលព្រហ្មទណ្ឌស្រុកនិយាយថា បុរសរងគ្រោះនេះគឺជាអតីតពលករទូកនេសាទនៅប្រទេសថៃ ហើយភ្លាត់ស្នៀតត្រូវស្លាបចក្រម៉ាស៊ីនទូកវ័ធត្រូវជើង បណ្ដាលឲ្យរងរបួសដំបៅព្យាបាលមិនជាឡើយ។ ក្រោយមកត្រូវថៅកែថៃបោះបង់ចោល ព្រោះធ្វើការលែងកើត ខណៈមានអង្គការមួយប្រទះឃើញកាលពីអំឡុងឆ្នាំ២០០៩ រួចក៏នាំទៅផ្ញើនៅអង្គការមួយនៅក្នុងភូមិត្រពាំងវែង ដើម្បីឲ្យជួយមើលថែ និងព្យាបាលគាត់។
ប្រភពដដែលបន្តថា ប៉ុន្តែទោះខំព្យាបាលបែបណា ក៏ជើងនោះមិនអាចព្យាបាលជាដដែល ហើយដំបៅកាន់តែរីកធំទៅៗរហូតដល់គ្រូពេទ្យកាត់ចោលត្រឹមភ្លៅក្លាយជាជនពិការជើងទាំង២តែម្ដង។ មិនតែប៉ុណ្ណោះក្រោយកាត់ជើងចោល ក៏នៅតែព្យាបាលជាបន្តបន្ទាប់ រហូតសព្វថ្ងៃត្រគាកគាត់ក៏ដំបៅដែរ ។
ប្រភពដដែលបន្តទៀតថា កន្លងមកគាត់ព្យាយាមសម្លាប់ខ្លួន៣លើកបន្តបន្ទាប់ ដោយចង.ក និងរវ៉ៃរទេះរុញចូលរថយន្តដើម្បីឲ្យរថយន្តបុកស្លាប់ ប៉ុន្តែមិនសម្រេចទេ ដោយអ្នកឃើញជួយសង្គ្រោះទាន់ លុះថ្ងៃកើតស្រាប់តែបាត់គាត់ទើបដើរកគ្រប់កន្លែងតែមិនឃើញសោះ ។ ពេលទៅដល់កន្លែងដាក់ពាងទឹកពេញមួយក៏ឃើញរទេះរុញគាត់ក្បែរទឹកនោះ ដោយសង្ស័យក៏អឺតមើលក្នុងពាងក៏ប្រទះឃើញគាត់ស្លាប់ក្នុងទឹកពាងនោះបាត់ទៅហើយ។
ក្រោយកើតហេតុ នគរបាលបានធ្វើការពិនិត្យសពជនរងគ្រោះ ទើបសន្និដ្ឋានថា បុរសនោះពិតជាស្លាប់ដោយការធ្វើអត្តឃាតលោតសម្លាប់ខ្លួនក្នុងទឹកពាងនោះមែន មិនមានសញ្ញាអ្វីដែលបញ្ជាក់ថា ជាអំពើឃាតកម្មនោះឡើយ ហើយអង្គការខាងលើក៏បានចាត់ចែងធ្វើបុណ្យសពតាមប្រពៃណី៕
ចែករំលែកព័តមាននេះ