ខេត្តព្រះសីហនុ ៖ បើតាមសេចក្តីរាយការណ៍បឋមបានឱ្យដឹងថា មុននេះបន្តិច មានការឆោឡោមនុស្សម្នាយ៉ាងខ្លាំង ខណៈពេលក្មេងប្រុសម្នាក់ និងក្មេងស្រីម្នាក់ បានបាត់ខ្លួននៅចំណុចស្ពានចំការដូង ស្ថិតក្នុងភូមិអុងឃុំរាម ស្រុកព្រៃនប់ កាលពីម៉ោងប្រមាណជាង២រសៀល ថ្ងៃទី២៩ ខែកក្កដា ឆ្នាំ២០១៨នេះ ។
សេចក្តីរាយការណ៍បន្តទៀតថា ក្រោយពីក្មេងប្រុសស្រីបានបាត់ខ្លួននាំឱ្យមានការភ្ញាក់ផ្អើលយ៉ាងខ្លាំង ហើយគេនាំគ្នាសង្ស័យថា ក្មេងទាំង២នាក់ខាងលើបានលង់ទឹក ក្រោយមកមានអ្នកចុះមុជទឹក ដើម្បីរាវរកក្មេងៗខាងលើនេះ ។
លុះរហូតមកដល់ម៉ោងជិត៤រសៀលនេះ ខណៈអ្នកជ្រមុជទឹករាវរកនោះ ក៏រកឃើញក្មេងប្រុសម្នាក់នៅក្នុងទឹក ក្រោយក៏ស្រង់ក្មេងប្រុសរងគ្រោះឡើងលើគោក រួចខំប្រឹងធ្វើការសង្គ្រោះបន្ទាន់ តែទោះបីជាជួយសង្គ្រោះយ៉ាងណាក្តី ក៏ក្មេងប្រុសរងគ្រោះបានស្លាប់បាត់បង់ជីវិតទៅហើយ ។ បច្ចុប្បន្ននេះ អ្នកជ្រមុជទឹកកំពុងខ្នះខ្នែងតាមរាវរកក្មេងស្រីរងគ្រោះម្នាក់ទៀត ដែលកំពុងបាត់ខ្លួននៅឡើយ ។
ចែករំលែកព័តមាននេះ