រាជធានីភ្នំពេញ ៖ ស្ត្រី៣នាក់ ខណៈកំពុងជិះម៉ូតូមួយគ្រឿងម៉ាកស៊ុយហ្សុ៊យគីណិចតាមដងផ្លូវ បានត្រូវជន សង្ស័យ៣នាក់ជិះម៉ូតូហុងដាឌ្រីម ធ្វើសកម្មភាពឆក់ទូរស័ព្ទដៃបានសម្រេច តែត្រូវជនរងគ្រោះដេញតាម រួចធាក់ផ្ដួលម៉ូតូ និងត្រូវសមត្ថកិច្ចចាប់ឃាត់ខ្លួនបានម្នាក់ ឯ២នាក់ទៀតរត់ចុះក្នុងទឹកទន្លេបាត់ស្រមោល។
ករណីនេះ កើតឡើងកាលពីវេលាម៉ោង១០យប់ថ្ងៃទី២៦ កក្កដា ស្ថិតនៅតាមផ្លូវមាត់ទន្លេ ខាងក្រោយផ្សារអុីអនម៉ល ស្ថិតក្នុងសង្កាត់ទន្លេបាសាក់ ខណ្ឌចំការមន ។
តាមអ្នកឃើញហេតុការណ៍ឱ្យដឹងថា ស្ត្រីទាំង៣នាក់ជិះម៉ូតូតាមផ្លូវមាត់ទន្លេ ក្រោយផ្សារអីុអនម៉ល ពីខាងជើងទៅខាងត្បូង ។ ខណៈទៅដល់ចំណុចខាងលើ ស្រាប់តែមានជន៣នាក់ជិះម៉ូតូមួយគ្រឿងម៉ាកហុងដាឌ្រីម ពណ៌ខ្មៅ ធ្វើដំណើរស្របទិសគ្នាបានមកជិតជនរងគ្រោះរួចក៏ធ្វើសកម្មភាពឆក់ទូរស័ព្ទដៃបានសម្រេចហើយរត់គេចខ្លួន ។
ភ្លាមៗនោះ ជនរងគ្រោះបានជិះម៉ូតូដេញតាមរួចធាក់ផ្ដួលម៉ូតូចោរ ហើយសមត្ថកិច្ចក៏បានមកដល់កន្លែងកើតហេតុ និងឃាត់ខ្លួនបានម្នាក់យកទៅប៉ុស្តិ៍នគរបាលទន្លេបាសាក់ដើម្បីសាកសួរ ។រីឯបក្សពួក២នាក់ទៀត បានរត់ហើយលោតចូលក្នុងទន្លេបាត់ស្រមោល និងត្រូវបាននគរបាលព្រហ្មទណ្ឌខណ្ឌចំការមនរុករកអស់រយៈពេលជិត១ម៉ោង ប៉ុន្តែនៅតែរកមិនឃើញ ។
ក្រោយពេលកើតហេតុ ជនសង្ស័យដែលឃាត់ខ្លួនបានត្រូវបានសមត្ថកិច្ចកសាងសំណុំរឿងបញ្ជូនទៅសាលាដំបូង ៕
ចែករំលែកព័តមាននេះ