ខេត្តបន្ទាយមានជ័យ ៖ ខណៈមានភ្លៀងរលឹមស្រិចៗ ក្បាលនាគលើដំបូលផ្សារសិរីសោភ័ណបានត្រូវរន្ទះបាញ់ តែពុំមានរងគ្រោះដល់មនុស្សឡើយ ពេលអាជីវករកំពុងលក់ដូរធម្មតា នៅក្នុងផ្សារកាលពីវេលាម៉ោង៤រសៀលថ្ងៃទី២៦ កក្កដា ក្នុងភូមិ៣ សង្កាត់ព្រះពន្លា ក្រុងសិរីសោភ័ណ ។
អ្នកឃើញហេតុការណ៍បានឲ្យដឹងថា នៅពេលមានភ្លៀងរលឹមស្រិចៗនោះ គឺគាត់កំពុងដើរទិញអីវ៉ាន់ក្នុងផ្សារសិរីសោភ័ណផ្នែកខាងកើត ស្រាប់តែមានផ្លេកបន្ទោរ ហើយក៏លាន់សូររន្ទះបាញ់ស្ទើរបែកក្រដាសត្រចៀក លុះដើរចេញមកខាងក្រៅផ្សារ ស្រាប់តែឃើញកម្ទេចស៊ីម៉ង់ត៍ជ្រុះធ្លាក់ពីលើដំបូល គឺរូបនាគលើដំបូលផ្សារជ្រុងខាងកើតបានបែក ។
ទោះជាយ៉ាងណា ដំបូលផ្សារសិរីសោភ័ណ ដែលត្រូវរន្ទះបាញ់នេះគ្រាន់តែបែកខូចរូបនាគ១នៅលើដំបូលផ្សារប៉ុណ្ណោះ ប៉ុន្តែម្នាក់ៗហ៊ឹងត្រចៀកយ៉ាងខ្លាំង ព្រមទាំងខូចប្រព័ន្ធអេឡិចត្រូនិក និងកាមេរ៉ាសុវត្ថិភាពជុំ វិញផ្សារផងដែរ ៕
ចែករំលែកព័តមាននេះ