ខេត្តកំពង់ឆ្នាំង ៖ ក្រុមអាជីវករនៅតាមបណ្ដោយផ្លូវជាតិលេខ៥ មានចម្ងាយប្រមាណជាង១០គីឡូម៉ែត្រពីទីរួមខេត្តកំពង់ឆ្នាំង ដែលដាក់តាំងលក់នូវផលិតផល និងកសិផលក្នុងស្រុកបានត្អូញត្អែរថា ពួកគាត់លក់មិនសូវដាច់ទេ ទទួលបានចំណូលតិចតួច ហើយក៏កំពុងប្រឈមនឹងជីវភាពរស់នៅប្រចាំថ្ងៃដែរ ខណៈប្រជាពលរដ្ឋដែលធ្វើដំណើរតាមផ្លូវជាតិលេខ៥…
ខេត្តកំពង់ឆ្នាំង ៖ ក្រុមអាជីវករនៅតាមបណ្ដោយផ្លូវជាតិលេខ៥ មានចម្ងាយប្រមាណជាង១០គីឡូម៉ែត្រពីទីរួមខេត្តកំពង់ឆ្នាំង ដែលដាក់តាំងលក់នូវផលិតផល និងកសិផលក្នុងស្រុកបានត្អូញត្អែរថា ពួកគាត់លក់មិនសូវដាច់ទេ ទទួលបានចំណូលតិចតួច ហើយក៏កំពុងប្រឈមនឹងជីវភាពរស់នៅប្រចាំថ្ងៃដែរ ខណៈប្រជាពលរដ្ឋដែលធ្វើដំណើរតាមផ្លូវជាតិលេខ៥ ហាក់មិនសូវឈប់រថយន្ដទិញផលិតផលក្នុងស្រុក ។
លោកយាយ សិន សន ជាអ្នកលក់ដូរកសិផលមួយរូបបាននិយាយថា គាត់លក់មិនសូវដាច់ទេ គឺ១ថ្ងៃបានប្រាក់ត្រឹមតែ១ម៉ឺន ឬ២ម៉ឺនរៀលប៉ុណ្ណោះ ខណៈកាលពីមុនលក់ដាច់ អាចរកប្រាក់បានរហូតដល់៥ម៉ឺនរៀលឯណោះ ។ លោកយានបន្ដថា ៖« សព្វថ្ងៃនេះ បើទោះបីជាលក់មិនសូវដាច់ តែខ្ញុំចេះតែបន្ដលក់ទៅ គ្រាន់នឹងបានប្រាក់ចិញ្ចឹមខ្លួន និងទប់ទល់ជីវភាពគ្រួសារខ្លះៗ »។
ស្រដៀងគ្នានេះដែរ អ្នកស្រី រិន ចាន់ថន មានស្រុកកំណើននៅខេត្តតាកែវ និងបានមករស់នៅខេត្តកំពង់ឆ្នាំងជាមួយស្វាមី បាននិយាយថា អ្នកស្រីបានប្រកបមុខរបរលក់ដូរនៅទីនេះជាង៥ឆ្នាំហើយ ។ អ្នកស្រីនិយាយថា ៖« មុខរបរលក់ដូររបស់ខ្ញុំ ក៏ដូចជាអ្នកលក់ដូរនៅទីនេះទាំងអស់ គឺលក់មិនសូវដាច់ទេ ដោយសារតែខែនេះ ជារដូវធ្លាក់ភ្លៀងខ្លាំង » ។ អ្នកស្រីបានបន្តថា អ្នកលក់ដូរនៅទីនេះមានដូចជា ដំឡូង ល្ពៅ ត្រឡាច តាសក់ស្រូវ និងនំចំណីមួយចំនួនទៀត ។ នៅក្នុងខែនេះ អ្នកលក់ដូរខាតបង់គ្រប់គ្នា ព្រោះពេលលក់មិនដាច់ កសិផលមួយចំនួនស្អុយរលួយចោល ។
អ្នកស្រី ក៏ដូចជាអ្នកលក់ដូរទាំងអស់ បានអំពាវនាវដល់អ្នកធ្វើដំណើរតាមផ្លូវជាតិលេខ៥ សូមឈប់ជួយទិញផលិតផលរបស់ខ្មែរក្នុងស្រុកផង ដើម្បីពួកគាត់មានទឹកចិត្តបន្ដលក់ដូរនៅតំបន់នេះទៀត ។
សូមបញ្ជាក់ថា ទីតាំងនេះស្ថិតនៅចំណុចជិតភ្នំដាំផ្កា ក្នុងភូមិចារថ្មី ឃុំអណ្តូងស្នាយ ស្រុករលាប្អៀរ ខេត្តកំពង់ឆ្នាំង ។ ការលក់ដូរទាំងនេះបានក្លាយជាទីផ្សារមួយទៅហើយ ក្នុងរយៈពេលប្រមាណជាង៦ឆ្នាំចុងក្រោយនេះ ខណៈពីដំបូងឡើយមានត្រឹមតែ៣-៤តូបប៉ុណ្ណោះ ៕
ចែករំលែកព័តមាននេះ