ការអត់ធន់ជាគ្រឿងអលង្ការរបស់អ្នកប្រាជ្ញ ការអត់ធន់ជាគ្រឿងកម្ចាត់បង់នូវបាបធម៌ ការអត់ធន់ជាកម្លាំងរបស់អ្នកប្រព្រឹត្តធម៌ ការអត់ធន់ជាគុណជាតិនាំមកនូវប្រយោជន៍ និងសេចក្តីសុខដល់ខ្លួន និងអ្នកដទៃ ។ នេះជាពុទ្ធគាថាសម្រួលជាខេមរភាសា ដែលមាននៅក្នុងគម្ពីរធម្មបទដ្ឋកថា ។…
ការអត់ធន់ជាគ្រឿងអលង្ការរបស់អ្នកប្រាជ្ញ ការអត់ធន់ជាគ្រឿងកម្ចាត់បង់នូវបាបធម៌ ការអត់ធន់ជាកម្លាំងរបស់អ្នកប្រព្រឹត្តធម៌ ការអត់ធន់ជាគុណជាតិនាំមកនូវប្រយោជន៍ និងសេចក្តីសុខដល់ខ្លួន និងអ្នកដទៃ ។ នេះជាពុទ្ធគាថាសម្រួលជាខេមរភាសា ដែលមាននៅក្នុងគម្ពីរធម្មបទដ្ឋកថា ។
ការអត់ធន់នេះជាគ្រឿងអលង្ការរបស់អ្នកប្រាជ្ញពាក់លម្អគ្រប់ពេល បុគ្គលមានចិត្តប្រាសចាកខន្តីធម៌ ទោះបីប្រដាប់តាក់តែងកាយដោយគ្រឿងអាភរណៈ ទាំងឡាយដ៏មានតម្លៃមានមាសពេជ្រជាដើម រមែងល្អក្នុងពួកជនបានតែក្នុងកាលដែលនៅមិនទាន់ប៉ះអារម្មណ៍ដែលមិនគួរប្រាថ្នាឬអារម្មណ៍ដែលទាស់ចិត្ត តែបើពើបប្រទះប៉ះអារម្មណ៍មិនជាទីគាប់ចិត្ត មានជួបនឹងពាក្យប្រមាថមើលងាយជាដើមក្នុងខណៈណា ខណៈនោះគេក៏ភ្លេចខ្លួនសម្តែងអាការៈក្រញឹងខឹងក្រញូវគួរជាទីស្អប់ឱ្យប្រាកដឡើងភ្លាម ។ កាលបើដូចនេះនរណាឡើយនឹងលើកតម្កើងគេថាជាមនុស្សល្អទៅកើត ព្រោះមុខគួរស្អប់យ៉ាងនេះ។
ចំណែកអ្នកប្រាជ្ញមានពុទ្ធាទិបណ្ឌិតជាដើមសូម្បីគ្មានគ្រឿងប្រដាប់ទាំងនោះ តែប្រកបដោយខន្តីធម៌ សូម្បីជួបប្រទះនឹងពាក្យមើលងាយ ជេរ ប្រទេចត្រគោះបោះបោកមកលើយ៉ាងណាក៏មិនបានកើតអារម្មណ៍ខឹងតបឬសម្តែងអាការៈគួរស្អប់ឱ្យប្រាកដឡើយ ត្រឡប់ជាមានមុខញញឹមប្រិមប្រិយយ៉ាងនេះ តើនរណឡើយនឹងមិនសរសើរថា លោកជាអ្នកល្អ ។
ខន្តីជាគុណនាំមកនូវប្រយោជន៍ និងសេចក្តីសុខ អ្នកដែលមានខន្តីនៅក្នុងខន្ធសន្តាននឹងអាចនាំមកនូវប្រយោជន៍ និងសេចក្តីសុខគ្រប់យ៉ាង គឺខន្តីអាចទាញមនុស្សជាសត្រូវឱ្យទៅជាមិត្តសម្លាញ់ អាចញុំាងចិត្តដែលក្តៅឱ្យទៅជាត្រជាក់ អ្នកប្រាថ្នាប្រយោជន៍បច្ចុប្បន្ន ឬអនាគត បើមានខន្តីអត់ធន់ក្នុងចិត្តអាចធ្វើប្រយោជន៍នោះឱ្យជាប្រយោជន៍មនុស្សក្តី ប្រយោជន៍ទេវតាក្តី រហូតដល់ប្រយោជន៍ខ្ពស់បំផុតគឺព្រះនិព្វាន ដែលជាសុខដ៏ធំបំផុត ក៏កើតអំពីខន្តីទាំងអស់ ។ ហេតុនោះទើបលោកពោលថា ខន្តីជាគុណនាំមកនូវប្រយោជន៍ និងសេចក្តីសុខក្នុងលោកយ៉ាងដូច្នេះ ។
ចែករំលែកព័តមាននេះ