រាជធានីភ្នំពេញ ៖ សាលាដំបូងរាជធានីភ្នំពេញ កាលពីព្រឹកថ្ងៃទី២៦ កក្កដា បានបើកសវនាការ លើសំណុំរឿងជនជាតិនីហ្សេរីយ៉ាពីរម្តាយ និងកូនពាក់ព័ន្ធបទល្មើសការនាំចេញមិនស្របច្បាប់ ដោយមានគោលដៅ និងបទល្មើសបញ្ជូនលិខិតឆ្លងដែនពីកម្ពុជាទៅក្រៅប្រទេសដើម្បីចូលមករស់នៅស្រុកខ្មែរវិញ តាមមាត្រា១២ នៃច្បាប់ស្ដីពីការបង្ក្រាបអំពើជួញដូរមនុស្ស និងការធ្វើអាជីវកម្មផ្លូវភេទ ។
ជនជាប់ចោទឈ្មោះ Ogbonna wishdom freser ភេទស្រី អាយុ៥២ឆ្នាំ មុខរបរជាអនុប្រធានអង្គការទ្រទ្រង់កុមារកំព្រា និងជាគ្រូពេទ្យឆ្មប ត្រូវជាម្តាយ ចំណែកជនជាប់ត្រូវជាកូនឈ្មោះ Ogbonna wishdom prince ភេទប្រុស អាយុ២០ឆ្នាំ មុខរបរជាសិស្ស និងជាគ្រូបង្ហាត់បាល់ទាត់នៅសាលាឯកជន ។
គួបញ្ជាក់ថា ជនជាប់ចោទបានប្រព្រឹត្តបទល្មើសតាំងពីខែសីហា ឆ្នាំ២០១៦ ប៉ុន្តែសមត្ថកិច្ចនគរបាលទើបស្រាវជ្រាវរកឃើញ និងឃាត់ខ្លួននៅថ្ងៃទី ១២ តុលា ២០១៧ ។ ពេលសវនាការ ឈ្មោះ Ogbonna បានសារភាពថា បើលោកស្រីដឹងការបញ្ជូនប៉ាស្ព័រចេញទៅក្រៅប្រទេសជាអំពើខុសច្បាប់នៅកម្ពុជានោះលោកស្រីប្រព្រឹត្តទេ ។ ព្រោះនៅពេលលោកស្រីជាប់ឃុំ មានក្មេងៗកំព្រាច្រើនណាស់ដែលត្រូវការលោកស្រីដើម្បីថែទាំពួកគេ និងស្វែងរកការជួយចិញ្ចឹមបីបាច់ពីបរទេស ។
ទោះបីយ៉ាងណាក្តីលោកស្រី Ogbonna បានសារភាពពីទោសកំហុសដែលខ្លួនបានធ្វើ និងបានស្នើសុំឲ្យតុលាការលើកលែងបទចោទ និង ដោះលែងលោកស្រីពីរនាក់ម្ដាយកូនឲ្យមានសេរីភាពវិញ ដើម្បីជួយក្មេងកំព្រាបន្តតទៅទៀត ។ តែលោក រៀល សុភិន ព្រះរាជអាជ្ញារង និង ជាតំណាងអយ្យការសវនាការអមសាលាដំបូងរាជធានីភ្នំពេញ បានសម្រេចតម្កល់ទុកបទចោទប្រកាន់នេះ លើជនត្រូវចោទដដែល ហើយបានស្នើសុំឲ្យចៅក្រមជំនុំជម្រះ សម្រេចទោសលើជនជាប់តាមកំណត់ច្បាប់ ។
ក្រោយពេលចប់ការសាកសួរដេញដោល ចៅក្រមជំនុំជម្រះបានសម្រេចលើកពេលប្រកាសសាលក្រមលើសំណុំរឿងនេះ ទៅថ្ងៃទី២១ សីហា ២០១៨ ខាងមុខ ៕
ចែករំលែកព័តមាននេះ