រាជធានីភ្នំពេញ ៖ បុរសម្នាក់ស្រវឹងជោកបើកបររថយន្តមួយគ្រឿងក្នុងល្បឿនយ៉ាងលឿន ក៏រេចង្កូតឡើងលើខឿនសួនច្បារពុះចែកទ្រូងផ្លូវទៅបុកបង្គោលភ្លើងបំភ្លឺផ្លូវមួយដើមបណ្តាលអោយបាក់ទ្រេតដល់ដី ហេតុការណ៍នេះកើតឡើងកាលពីវេលាម៉ោង៨និង៣០នាទីយប់ ថ្ងៃទី២៦ ខែកក្កដា ឆ្នាំ២០១៨ ត្រង់ចំណុចខាងត្បូងវត្តឃ្មួញប្រមាណ៥០០ម៉ែត្រ តាមបណ្តោយផ្លូវហាណូយ ស្ថិតក្នុងសង្កាត់ឃ្មួញ ខណ្ឌសែនសុខ។
តាមប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុ គេឃើញបុរសម្នាក់បើកបររថយន្តមួយគ្រឿងម៉ាកហ៊ីយ៉ាន់ដាយស្តារិច ពណ៌ទឹកប្រាក់ គ្មានស្លាកលេខ ធ្វើដំណើរតាមបណ្តោយផ្លូវហាណូយ ក្នុងទិសដៅពីត្បូងទៅជើង និងក្នុងល្បឿនយ៉ាងលឿន។ លុះមកដល់ចំណុចកើតហេតុស្រាប់តែរថយន្តខាងលើក៏រេចង្កូតទៅខាងឆ្វេងឡើងលើខឿនសួនច្បារពុះចែកទ្រូងផ្លូវហើយក៏ទៅបុកផ្ទប់នឹងបង្គោលភ្លើងបំភ្លឺផ្លូវមួយដើមបណ្តាលឲ្យបាក់ទ្រេតដល់ដី ចំណែកឯរថយន្តខ្ទាតទៅចិញ្ចើមផ្លូវបែរក្បាលត្រលប់ទៅក្រោយវិញរងការខូចខាតក្រពឹតផ្នែកខាងមុខចំហៀងខាងឆ្វេងយ៉ាងដំណំ។
ក្រោយពេលកើតហេតុ រថយន្តបង្កខាងលើត្រូវបានសមត្ថកិច្ចជំនាញចុះធ្វើការវាស់វែងស្ទូចយកទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញដើម្បីរង់ចាំម្ចាស់រថយន្តចូលខ្លួនមកដោះស្រាយទៅតាមផ្លូវច្បាប់នៅពេលក្រោយ៕
ចែករំលែកព័តមាននេះ