ខេត្តកំពត ៖ មានហេតុការណ៍គ្រោះថ្នាក់ចរាចរណ៍ដ៏រន្ធត់មួយ បង្កឡើងរវាងរថយន្តបែនដឹកដី និងម៉ូតូសេ១២៥ បើកបរក្នុងទិសដៅស្របគ្នា លើកំណាត់ផ្លូវជាតិលេខ៣ (កំពត-ភ្នំពេញ) កាលពីវេលាម៉ោង១០ និង៤៥នាទី ព្រឹកថ្ងៃទី២៦ កក្កដា ២០១៨ បណ្តាលឲ្យបុរសអ្នកបើកបរម៉ូតូ ជាប្តីរងរបួសស្រាល និងស្ត្រីជាប្រពន្ធរួមដំណើរបានរងរបួសក្បាល(ធ្ងន់) ត្រូវបានដឹកទៅសង្គ្រោះ នៅមន្ទីរពេទ្យភ្នំពេញ។
លោកវរសេនីយទោ ពុធ សឺង នាយការិយាល័យចរាចរណ៍ផ្លូវគោក នៃស្នងការដ្ឋាននគរបាលខេត្តកំពតបានឲ្យដឹងថា ករណីគ្រោះថ្នាក់ចរាចរណ៍កើតឡើងខាងលើ នៅចំណុចមុខបង្គោលគីឡូម៉ែត្រលេខ១៤៣ លើកំណាត់ផ្លូវជាតិលេខ៣ (កំពត-ភ្នំពេញ) ស្ថិតក្នុងភូមិព្រៃឃ្មុំ ឃុព្រៃឃ្មុំ ស្រុកទឹកឈូ ខេត្តកំពត។ សាក្សីនៅកន្លែងកើតហេតុបានឲ្យសមត្ថកិច្ច ដឹងថា មុនពេលកើតហេតុគេឃើញរថយន្តបែនដឹកដី ចង្កូតស្តាំមួយគ្រឿងបើកបរក្នុងទិសដៅ ពីត្បូងទៅជើង លុះដល់ចំណុចខាងលើរថយន្តបត់ត្រឡប់ក្រោយវិញ ស្រាប់តែមានម៉ូតូមួយគ្រឿង បើកបរមកពីក្រោយ (ក្នុងទិសដៅស្របគ្នា) បានមកបុកចំពាក់កណ្តាលរថយន្តខាងឆ្វេង បណ្តាលឲ្យ ម៉ូតូម៉ូតូចូលក្រោមរថយន្ត រីឯអ្នកបើកបរម៉ូតូ និងអ្នករួមដំណើរជាប្រពន្ធបានខ្ទាតចេញពីម៉ូតូ នៅក្រៅរថយន្តរងរបួសធ្ងន់ និងស្រាល។
ប្រភពពីសមត្ថកិច្ចដដែលឲ្យដឹងទៀតថា អ្នកបើកបររថយន្តមានឈ្មោះ ទេព ភិរុណ ភេទប្រុស អាយុ៤០ឆ្នាំ រស់នៅភូមិសុវណ្ណសាគរ សង្កាត់កំពង់កណ្តាល ក្រុងកំពត។ អ្នកបើកបរម៉ូតូឈ្មោះ អ៊ូក ម៉ៅ ភេទប្រុស អាយុ២៨ឆ្នាំ រស់នៅភូមិល្បើក ឃុំត្រពាំងបី ស្រុកឈូក ខេត្តកំពត។ បើកបរម៉ូតូម៉ាក ហុងដាឌ្រីម សេ១៥ ពណ៌ខ្មៅ (របួសស្រាល) អ្នករួមដំណើរឈ្មោះ លីម រស្មី ភេទស្រី អាយុ២៨ឆ្នាំ(ប្រពន្ធ) រស់នៅភូមិឃុំស្រុកខេត្តជាមួយគ្នា(របួសធ្ងន់ត្រង់ក្បាល)។
ជនរងគ្រោះទាំង២នាក់បានបញ្ជូនទៅ មន្ទីរពេទ្យបង្អែកខេត្តកំពត តែដោយស្ត្រីជាប្រពន្ធរងរបួសធ្ងន់ត្រង់ក្បាលទើបក្រុមគ្រូពេទ្យបញ្ជូនទៅ សង្គ្រោះបន្តនៅមន្ទីរពេទ្យភ្នំពេញ។ ចំណែករថយន្ត និងម៉ូតូបានយកមករក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលខេត្តរង់ចាំធ្វើការដោះស្រាយទៅដោយផ្លូវច្បាប់៕
ចែករំលែកព័តមាននេះ