ជប៉ុន ៖ តាមប្រភពព័ត៌មាន Oddity Central បានឲ្យដឹងថា តាចាស់អាយុ៨១ឆ្នាំ ដែលធ្លាប់ជាម្ចាស់ពានលើកសាច់ដុំកាលពីនៅក្មេង ពេលនេះបានជាប់ពានម្តងទៀត ខណៈដែលមនុស្សផ្សេងទៀតក្នុងវ័យចាស់ដូចគាត់នៅអង្គុយលើកៅអីរុញ ឬត្រូវសម្រាន្តឈឺលើគ្រែ។
លោកតា Toshisuke Kanazawa ធ្លាប់បានពានលើកសាច់ដុំជាច្រើនលើកច្រើនសារកាលពីនៅក្មេង រហូតដល់អាយុ៣៤ឆ្នាំ គាត់ក៏សម្រេចចិត្តចូលនិវត្តន៍។ ក្រោយពីលាចាកពីវិស័យដុំដែកនេះ គាត់ក៏ចាប់ផ្តើមផឹកស្រា ជក់បារី និង ហូបអាហារមិនរើស ដល់ថ្នាក់ក្លាយទៅជាមនុស្សធាត់រាងមិនស្អាត។
ដល់ពេលគាត់អាយុ៥០ឆ្នាំ គាត់ក៏សម្រេចចិត្តចូលហាត់ម្តងទៀត ដោយសារតែចង់ឲ្យប្រពន្ធរបស់គាត់ ដែលកំពុងមានជំងឺសប្បាយចិត្តឡើងវិញ។ គាត់បានបញ្ឈប់នូវរាល់ទង្វើគ្មានប្រយោជន៍ដល់សុខភាព ហើយផ្តោតសំខាន់លើការហាត់ប្រាណ។ ពិតណាស់ រាងកាយមនុស្សចាស់ជរាមិនដូចកាលពីនៅក្មេងកម្លាំងពេញឡើយ។
លោកតាបានប្រើប្រាស់ដុំដែកតិចទម្ងន់ជាងមុន ហើយទាមទារឲ្យមានការសម្រាកច្រើន។ អាហារដែលលោកតាពិសារក៏ទាមទារឲ្យទន់ ឬរាវដែរ ដើម្បីអាចស្រូបយកបាន។ ស្បែករបស់គាត់ជ្រួញមិនស្អាតទេ ដែលបង្ខំឲ្យគាត់លាបប្រេងចម្រាញ់ចេញពីសេះ។ ទោះបីជាពិបាកហាត់ជាងកាលពីនៅក្មេងក៏ដោយ ក៏លោកតាមិនបោះបង់ដែរ។
កាលពីឆ្នាំ២០១៦ លោកតា Kanazawa បានឈ្នះពានពិភពលោកចំណាត់ថ្នាក់លេខ៦ ក្នុងការប្រលងបុរសសាច់ដុំអាយុលើសពី៦៥ឆ្នាំ ហើយបានមេដាយមាសក្នុងនាមជាបេក្ខជនចាស់ជាងគេផងដែរ។
លោកតាបង្ហើបប្រាប់ថា តាំងពីហាត់ប្រាណឡើងវិញមក គាត់មិនសូវជាកើតផ្តាសាយទេ។ សុខភាពរបស់គាត់ក៏ល្អជាងមុន ខុសពីមនុស្សចាស់ផ្សេងទៀតដែលមានជំងឺសន្លាក់ និងជំងឺផ្សេងៗទៀត។ លោកតាប្រាប់ទៀតថា គាត់នឹងមិនឈប់ហាត់ទេ រហូតដល់អាយុ៨៥ឆ្នាំបានគិតតទៅទៀត៕
ចែករំលែកព័តមាននេះ