ខេត្តកណ្តាល ៖ បុរសម្នាក់ដែលគេសង្ស័យថាជាមុខសញ្ញាលួចកាច់កម៉ូតូត្រូវបានប្រជាពលរដ្ឋវាយបណ្តាលឱ្យរងរបួសធ្ងន់ធ្ងរ ហើយកម្លាំងសមត្ថកិច្ចបានបញ្ជូនទៅសង្គ្រោះនៅមន្ទីពេទ្យ តែដោយសាររងរបួសធ្ងន់ធ្ងរពេកក៏បានស្លាប់។ អំពើចោរកម្មលួចកាច់កម៉ូតូនេះកើតឡើងកាលពីម៉ោង៥ល្ងាចថ្ងៃទី២៥ កក្កដា ឆ្នាំ២០១៨ នៅចំណុចទំនប់៩០ ភូមិតោតម៉ា ឃុំកណ្តោក ស្រុកកណ្តាលស្ទឹង ខេត្តកណ្ដាល។
នគរបាលស្រុកកណ្តាលស្ទឹងបានអោយដឹងថា ជនរងគ្រោះដែលជាម្ចាស់ម៉ូតូឈ្មោះសា ឆវន្ត័ ភេទប្រុស អាយុ៣៥ឆ្នាំ រស់នៅភូមិតោតម៉ាឃុំកណ្តោក ស្រុកកណ្ដាលស្ទឹង មុខរបរកម្មកររោងចក្រ ។ ចំណែកជនសង្ស័យម្នាក់ដែលប្រជាពលរដ្ឋនាំគ្នាព្រួតវាយរហូតដល់ស្លាប់ ឈ្មោះហួយ លឿង ភេទប្រុស អាយុ៣៤ឆ្នាំ នៅភូមិដើមមៀន សង្កាត់តាខ្មៅ ក្រុងតាខ្មៅ មុខរបរមិនពិតប្រាកដ រីឯជនសង្ស័យម្នាក់ទៀតរត់គេចខ្លួនបាត់ស្រមោល ។
សាក្សីនៅជុំវិញក្បែរកន្លែងកើតហេតុបាននិយាយថា កាលពីវេលាម៉ោង៤និង២០នាទីរសៀលនៅថ្ងៃ២៥ កក្កដា ២០១៨ ជនរងគ្រោះបានជិះម៉ូតូទៅមើលមងនៅកន្លែងកើតហេតុ ហើយជនរងគ្រោះបានទុកម៉ូតូនៅលើទំនប់លេខ៩០ ដោយមានចាក់សោ បិទសន្ទះសោ និងដកខ្សៀបូស៊ីផងដែរ រួចហើយជនរងគ្រោះចុះទៅមើលមងចម្ងាយប្រហែល១០០ម៉ែត្រ ពេលមើលមងរួច ដើរត្រឡប់មករកម៉ូតូវិញ ស្រាប់តែឃើញជនសង្ស័យ២នាក់កំពុងកាច់កម៉ូតូរបស់ខ្លួនក៏ស្រែកថា «ចោរៗ ជួយផង» ។
ប្រភពដដែលបានបន្តថា ពេលនោះមានប្រជាពលរដ្ឋបង់សំណាញ់ និងដាក់មងនៅខាងមុខស្ទាក់ពីមុខ ជនសង្ស័យក៏បើកម៉ូតូត្រឡប់ថយមកក្រោយវិញ មកដល់ទល់មុខជនរងគ្រោះ ជនសង្ស័យក៏បើកម៉ូតូបុកជនរងគ្រោះ តែជនរងគ្រោះយកមែកសង្កែវាយជនសង្ស័យបណ្តាលឲ្យដួលម៉ូតូ រួចជនសង្ស័យបានប្រតាយប្រតប់គ្នាជាមួយជនរងគ្រោះដែលជាម្ចាស់ម៉ូតូ ពេលនោះប្រជាពលរដ្ឋជាច្រើននាក់បានមកព្រួតជួយជនរងគ្រោះ នាំគ្នាវាយជនសង្ស័យម្នាក់មួយដៃម្នាក់មួយជើងបណ្តាលឲ្យជនសង្ស័យម្នាក់ស្លាប់ពេលដឹកតាមរថយន្តសង្គ្រោះចេញពីកន្លែងកើតហតុ ហើយកម្លាំងប៉ុស្តិ៍រាយការណ៍មកផ្នែកជំនាញចុះមកជួយអន្តរាគមន៍ ពិនិត្យ និងរាយការណ៍មកជំនាញខេត្ត។ សមត្ថកិច្ចកំពុងបន្តតាមរកចាប់ខ្លួនបក្ខពួកជនសង្ស័យម្នាក់ទៀតដែលកំពុងរត់គេចខ្លួន ដើម្បីយកមកផ្តន្ទាទោសតាមច្បាប់ ។
នគរបាលបញ្ជាក់ថា សម្ភារបាត់បង់មានម៉ូតូមួយគ្រឿងម៉ាកហុងដា ធុនសេ១២៥ ពណ៌ខ្មៅ ស៊េរីឆ្នាំ២០១៧ លេខតួលេខម៉ាស៊ីន ៩៧៩៥៣៩៩ ពាក់ស្លាក់លេខ កណ្តាល ១W-៤៩៧៧ ជារបស់ជនរងគ្រោះដែលត្រូវជនសង្ស័យម្នាក់ជិះគេចខ្លួនយកទៅបាត់។ រីឯវត្ថុតាងដែលសមត្ថកិច្ចចាប់យកមានម៉ូតូ១គ្រឿងម៉ាកហុងដា ធុនសេ១២៥ ពណ៌ខ្មៅ ពាក់ស្លាកលេខ ភ្នំពេញ ១GL-០១៣២ ជារបស់ជនសង្ស័យ ៕
ចែករំលែកព័តមាននេះ