ខេត្តបាត់ដំបង ៖ យោងតាមព័ត៌មានបឋមពីសមត្ថកិច្ចបានឲ្យដឹងថា អតីតមន្ត្រីគណបក្សសង្គ្រោះជាតិចំនួន៥នាក់ ត្រូវបានគណៈកម្មជាតិរៀបចំការបោះឆ្នោត (គ.ជ.ប)ខេត្តបាត់ដំបង សម្រេចធ្វើការផាកពិន័យក្នុងម្នាក់ៗចំនួន១០លានរៀល ក្រោមបទចោទប្រកាន់ថា «បង្ហោះរូបភាពដែលបង្ហាញពីម្រាមដៃស្អាត និងមានលក្ខណ:ញុះញង់មិនឱ្យមានការបោះឆ្នោត» ។
ការសម្រេចសេចក្ដីនេះ ធ្វើឡើងដោយក្រុមប្រឹក្សាជំនុំជម្រះនៃគណ:កម្មការជាតិរៀបចំការបោះឆ្នោតខេត្តបាត់ដំបង កាលពីព្រឹកថ្ងៃទី២៦ កក្កដា នៅការិយាល័យរបស់គណៈកម្មាធិការជាតិរៀបចំការបោះឆ្នោតខេត្ត ដែលស្ថិតក្នុងភូមិដំណាក់ហ្លួង សង្កាត់វត្តគរ ក្រុងបាត់ដំបង ។
អតីតសមាជិកគណបក្សសង្គ្រោះជាតិចំនួន៥រូប ១-លោក ជា ជីវ, ២-លោក គ្រុយ គឹមសាំង, ៣-លោក ពៅ តាំង, ៤-លោក ថោង សារឿន និង៥-លោក ម៉ាង ឈុន ។ ប៉ុន្តែនៅក្នុងសវនការរបស់គ.ជ.ប នេះមិនមានវត្តមានលោក ជា ជីវ ទេ ដោយឱ្យតំណាងចូលរួមជំនួស គឺលោកសួន ចំរើន ។
បើតាមមន្ត្រីគ.ជ.បខេត្តបានឲ្យដឹងថា អតីតសមាជិកគណបក្សសង្គ្រោះជាតិទាំង៥រូបនេះ បានរងការ
ប្ដឹងចោទប្រកាន់ដោយមន្ត្រីគណបក្សប្រជាជនកម្ពុជា នៅតាមបណ្ដាឃុំ-សង្កាត់ផ្សេងគ្នា នៅក្នុងខេត្តបាត់ដំបង។
បើយោងតាមរបាយការណ៍របស់គ.ជ.បបានឱ្យដឹងថា មន្ត្រីគណបក្សប្រជាជនកម្ពុជា ដែលឈរជាដើមបណ្ដឹងប្ដឹងចោទប្រកាន់អតីតសមាជិកបក្សប្រឆាំងទាំង៥រូបនោះ មាន១-លោកឈឿន ភាច បានប្ដឹងមន្ត្រីបក្សប្រឆាំងចំនួន២ករណី នៅស្រុកកំរៀង, ២-លោកពីវ ហួយ បានប្ដឹងចោទប្រកាន់មន្ត្រីបក្សប្រឆាំងមួយករណី នៅឃុំអន្លង់វិល ស្រុកសង្កែ និង៣-លោកសុត សុផន និងលោកសុត សុផុន បានប្ដឹងចោទប្រកាន់មន្ត្រីបក្សប្រឆាំងចំនួន២ករណី នៅក្នុងក្រុងបាត់ដំបង ។
បន្ទាប់ពីធ្វើការសួរដេញដោលអស់រយ:ពេលជាង៤ម៉ោង ក្នុងសំណុំរឿងបង្ហោះម្រាមដៃស្អាត ប្រឆាំងនឹងការបោះឆ្នោតជាតិរបស់អតីតសមាជិកបក្សប្រឆាំងខាងលើនេះ ក្រុមប្រឹក្សាជំនុំជម្រះនៃគណៈកម្មការជាតិរៀបចំការខេត្ត ដែលមានលោកវន ពន ជាប្រធាន បានសម្រេចធ្វើការផាកពិន័យជាប្រាក់ចំនួន១០លានរៀល ក្នុងម្នាក់ៗដោយពុំគិតដល់ទោសព្រហ្មទណ្ឌផ្សេងៗទៀតឡើយ ចំពោះអតីតសមាជិកបក្សប្រឆាំងទាំង៥រូបខាងលើនេះ។ ប៉ុន្តែសេចក្ដីសម្រេចនេះ គ.ជ.ប បានបើកផ្លូវតវ៉ាតាមកំណត់ច្បាប់ ។
សូមបញ្ជាក់ថា នៅក្នុងកិច្ចប្រជុំពេញអង្គនៃក្រុមប្រឹក្សាជំនុំជម្រះនៃគណ:កម្មការជាតិរៀបចំការបោះឆ្នោតខេត្ត លើសំណុំរឿងអតីតសមាជិកបក្សប្រឆាំងទាំង៥រូប ដែលបង្ហោះរូបភាពម្រាមដៃស្អាត និងញុះញង់មិនឱ្យមានការទៅបោះឆ្នោតខាងលើនេះ ក៏មានការការពារយ៉ាងហ្មត់ចត់ពីកម្លាំងសមត្ថកិច្ចផងដែរ តែអង្គជំនុំជម្រះនេះ បានធ្វើឡើងជាសាធារណ: ៕
ចែករំលែកព័តមាននេះ