ក្រុងប៉ោយប៉ែត ៖ តាមប្រភពព័ត៌មានបានឱ្យដឹងថា នៅថ្ងៃនេះ(៣០ មីនា) នាយករដ្ឋមន្ត្រីថៃ គឺ លោកស្រី យីងឡាក់ ស៊ីណាវ៉ាត្រា នឹងធ្វើដំណើរមកបំពេញទស្សនកិច្ចមួយនៅក្នុងស្រុកអារញ្ញ ខេត្តស្រះកែវ ដែលមានព្រំប្រទល់ជាប់នឹងក្រុងប៉ោយប៉ែត ខេត្តបន្ទាយមានជ័យ របស់កម្ពុជា ។ មុនមួយថ្ងៃនៃដំណើរទស្សនកិច្ចរបស់លោកស្រីនាយករដ្ឋមន្ត្រីថៃ នៅព្រឹកថ្ងៃទី២៩ មីនា នៅចំណុចច្រកទ្វារអន្តរជាតិខ្លងលឹកទល់មុខច្រកទ្វារអន្តរជាតិប៉ោយប៉ែត គេសង្កេតឃើញមានសមត្ថកិច្ចថៃរៀបចំសណ្ដាប់ធ្នាប់យ៉ាងមមាញឹកដែលអ្នកខ្លះថា ជាការរៀបចំទុកជាមុនមួយ ក្នុងការត្រៀមលក្ខណៈដើម្បីពង្រឹងការពារសន្ដិសុខសម្រាប់ថ្ងៃនេះ ។
ក្នុងការរៀបចំសណ្ដាប់ធ្នាប់ខាងទឹកដីថៃនេះ ច្រកទ្វារអន្តរជាតិប៉ោយប៉ែត-ខ្លងលឹក ត្រូវបានបិទការឆ្លងកាត់ជិតកន្លះម៉ោង មិនថា អ្នកដំណើរដោយថ្មើរជើង ឬរថយន្តនោះទេ ហើយនៅខាងទឹកដីថៃឃើញមានរថយន្តទំនើបៗជាច្រើនគ្រឿងអមជាមួយរថយន្តស៊ីរ៉ែនការពារមុខក្រោយ មិនដឹងថា ថ្នាក់ណាមកខ្លះនោះទេ ក្នុងនោះមានទាំងតម្រួតថៃមួយចំនួនមកធ្វើសណ្ដាប់ធ្នាប់លើស្ពានមិត្តភាពកម្ពុជា-ថៃទៀតផង ។ ចំណែកនៅលើបង្កាន់ដៃស្ពានមិត្តភាពខាងទឹកដីថៃ គេឃើញមានរៀបចំលម្អដោយក្រណាត់ក្បាច់ក្បូរយ៉ាងស្រស់ស្អាត មិនតែប៉ុណ្ណោះសូម្បីតែស្មៅ និងកូនឈើតូចៗ ដុះតាមអតីតផ្លូវរថភ្លើងចាស់ក៏ត្រូវបានជួលកម្មករយកម៉ាស៊ីនកាត់ជម្រះចេញផងដែរ ។
ក្នុងអំឡុងពេលបិទផ្លូវឆ្លងកាត់មួយរយៈខ្លីនេះ គេឃើញភ្ញៀវជាតិ និងអន្តរជាតិ ព្រមទាំងរទេះកម្មករ និងរថយន្តតូចធំបានកកស្ទះនៅច្រកទ្វារ ។ ទោះបីជាបែបណា រហូតដល់វេលាម៉ោង១១ និង៣០នាទី ក្រោយកន្លះម៉ោងនៃការផ្អាកការឆ្លងកាត់ គឺភ្ញៀវជាតិ និងអន្តរជាតិក៏បានធ្វើដំណើរឆ្លងទៅមកដូចដើមវិញយ៉ាងកុះករ ។
មន្ត្រីការិយាល័យទំនាក់ទំនងកម្ពុជា-ថៃមួយរូបបានប្រាប់តាមទូរស័ព្ទថា ថ្ងៃទី៣០ មីនានេះ លោកស្រីនាយករដ្ឋមន្ត្រីថៃយីងឡាក់ ស៊ីណាវ៉ាត្រា មកបំពេញទស្សនកិច្ចក្នុងស្រុកអារញ្ញចំណុចផ្សារលុងក្លឿ ទើបខាងភាគីថៃគេត្រៀមលក្ខណៈរៀបចំសណ្ដាប់ធ្នាប់ និងពង្រឹងសន្ដិសុខទុកជាមុន ។ មន្ត្រីខាងលើប្រាប់ថា ដំណើរបំពេញទស្សនកិច្ចរបស់នាយករដ្ឋមន្ត្រីថៃមកកាន់ផ្សារលុងក្លឿ ក្នុងស្រុកអារញ្ញនេះ ខាងលោកមិនបានដឹងថា ការធ្វើទស្សនកិច្ចនេះដើម្បីអ្វីខ្លះនោះទេ ៕
ចែករំលែកព័តមាននេះ