រាជធានីភ្នំពេញ ៖ គណៈកម្មាធិការអនុសាខាកាកបាទក្រហមកម្ពុជាខណ្ឌឫស្សីកែវ និងសហគមន៍មូលនិធិនគរកាយវត្តព្រះពុទ្ធសាសនាកម្ពុជា កាលពីរសៀលថ្ងៃទី២៨ មីនា ២០១៣ បាននាំអំណោយជាគ្រឿងឧបភោគបរិភោគនិងបច្ច័យមួយចំនួនទៅចែកជូនដល់ប្រជាពលរដ្ឋក្រីក្រងាយរងគ្រោះចំនួន១០គ្រួសារ មានផ្ទុកមេរោគអេដស៍និងពិការ រស់នៅក្នុងមូលដ្ឋានសង្កាត់ច្រាំងចំរេះទី១ ខណ្ឌឫស្សីកែវ។
លោកជា ពិសី ប្រធានគណៈកម្មាធិការអនុសាខាកាកបាទក្រហមកម្ពុជាខណ្ឌឫស្សីកែវ បានឱ្យដឹងថា កន្លងមកអនុសាខាកាកបាទក្រហមខណ្ឌឫស្សីកែវ បានយកចិត្តទុកដាក់យ៉ាងខ្លាំងចំពោះប្រជាពលរដ្ឋក្រីក្រងាយរងគ្រោះ ហើយបានណែនាំដល់មន្ត្រីកាកបាទក្រហមសង្កាត់ចុះស្រាវជ្រាវរកប្រជាពលរដ្ឋក្រីក្រ និងផ្ទុកមេរោគដើម្បីនាំអំណោយមកចែកជូនជាបន្តបន្ទាប់ដោយមានការរួមជាមួយព្រះតេគុណសុវណ្ណជោតិ ខឹម សម្បត្តិ។
លោកជា ពិសី ក៏បានពាំនាំប្រសាសន៍ផ្តាំផ្ញើការសាកសួរសុខទុក្ខពីសំណាក់លោកប៉ា សុជាតិវង្ស ប្រធានគណៈកម្មាធិការសាខាកាកបាទក្រហមកម្ពុជារាជធានីភ្នំពេញ លោកឃ្លាំង ហួត ប្រធានកិត្តិយសអនុសាខាកាកបាទក្រហមខណ្ឌឫស្សីកែវ ជាពិសេសលោកជំទាវកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលជានិច្ចកាលតែងតែគិតគូរពីសុខទុក្ខប្រជាពលរដ្ឋទូទាំងប្រទេសជាពិសេសប្រជាពលរដ្ឋងាយរងគ្រោះ និងគ្រោះថ្នាក់ផ្សេងៗហើយតែងណែនាំដល់មន្ត្រីកាកបាទក្រហមថ្នាក់មូលដ្ឋានចុះដល់លំនៅឋានសាកសួរសុខទុក្ខ និងនាំអំណោយចែកជូនដល់ប្រជាពលរដ្ឋដែលមានជីវភាពខ្វះខាត៕
ចែករំលែកព័តមាននេះ