រាជធានីភ្នំពេញ ៖ រាជរដ្ឋាភិបាលកម្ពុជាតាមរយៈក្រសួងទេសចរណ៍ ដែលជាសេនាធិការ បានរៀបចំនូវគោលដៅយុទ្ធសាស្ត្រជាច្រើនដើម្បីប្រែក្លាយកម្ពុជា ជាគោលដៅទេសចរណ៍ដ៏ទាក់ទាញបំផុត ។ ក្នុងនោះ ក្រសួងបានកំណត់ប៉ូលទេសចរណ៍សំខាន់ៗមួយចំនួនដើម្បីជំរុញការអភិវឌ្ឍ ដើម្បីទាក់ទាញភ្ញៀវទេសចរ…
រាជធានីភ្នំពេញ ៖ រាជរដ្ឋាភិបាលកម្ពុជាតាមរយៈក្រសួងទេសចរណ៍ ដែលជាសេនាធិការ បានរៀបចំនូវគោលដៅយុទ្ធសាស្ត្រជាច្រើនដើម្បីប្រែក្លាយកម្ពុជា ជាគោលដៅទេសចរណ៍ដ៏ទាក់ទាញបំផុត ។ ក្នុងនោះ ក្រសួងបានកំណត់ប៉ូលទេសចរណ៍សំខាន់ៗមួយចំនួនដើម្បីជំរុញការអភិវឌ្ឍ ដើម្បីទាក់ទាញភ្ញៀវទេសចរ ខណៈដែលវិស័យនេះបានក្លាយជាវិស័យអាទិភាពមួយក្នុងចំណោមវិស័យសំខាន់ៗដទៃទៀត ក្នុងការចូលរួមជំរុញកំណើនសេដ្ឋកិច្ចជាតិ ។
ថ្លែងប្រាប់កោះសន្តិភាព កាលពីថ្ងៃទី២០ កក្កដា កន្លងមក លោករដ្ឋមន្ត្រីក្រសួងទេសចរណ៍បានឲ្យដឹងថា រាជរដ្ឋាភិបាលបាននិងកំពុងយកចិត្តទុកដាក់ក្នុងការអភិវឌ្ឍតំបន់គោលដៅទេសចរណ៍សំខាន់ៗដើម្បីទាក់ទាញភ្ញៀវទេសចរ ជាពិសេស ទេសចរចិនដែលកំពុងឈានមុខគេក្នុងវិស័យទេសចរណ៍នៅលើពិភពលោក ខណៈដែលអ្នកទេសចរចិនមានចំនួនកាន់តែច្រើនបាននិងកំពុងដើរកម្សាន្តស្ទើរគ្រប់ប្រទេស ។
ដោយឡែក ប្រទេសកម្ពុជាកំណើនភ្ញៀវទេសចរចិន ក៏មានចំនួនកើនឡើងគួរឲ្យកត់សម្គាល់ផងដែរ ។
ផ្តើមពីនេះ លោក ថោង ខុន រដ្ឋមន្ត្រីក្រសួងទេសចរណ៍ បានថ្លែងថា រាជរដ្ឋាភិបាលបានរំលេចនូវប៉ូលទេសចរណ៍សំខាន់ៗដូចជា អង្គរវត្ត គឺជាប៉ូលទេសចរណ៍ដ៏សំខាន់មួយដែលកំពុងទាក់ទាញភ្ញៀវទេសចរចិន ព្រោះថា អង្គរវត្តបានក្លាយជារមណីយដ្ឋានវប្បធម៌ និងអរិយធម៌ដ៏អច្ឆរិយៈសម្រាប់ពិភពលោកទាំងមូល ។ ដូច្នេះហើយ ទើបប្រជាពលរដ្ឋចិនមានការចាប់អារម្មណ៍ និងចង់មកទស្សនាអង្គរវត្ត ហើយព្រោះតែកំណើនភ្ញៀវទេសចរចិនមកកាន់អង្គរវត្ត នោះហើយ ទើបជើងហោះហើរត្រង់ពីប្រទេសចិនមកសៀមរាប ត្រូវបានរៀបចំឡើង ហើយមានកំណើនខ្ពស់ បើធៀបនឹងជើងហោះហើរផ្សេងទៀតពីចិនមកកម្ពុជា ។
លោករដ្ឋមន្ត្រីបន្ដថា បន្ទាប់ពីអង្គរវត្ត គឺរាជធានីភ្នំពេញ ក៏ជាគោលដៅទេសចរណ៍ដ៏គួរឲ្យទាក់ទាញមួយផងដែរ ព្រោះថា រាជធានីភ្នំពេញស្ថិតនៅតាមដងទន្លេ ហើយកំពុងតែរំលេចខ្លួនក្លាយជាទីក្រុងស្អាតនៅអាស៊ី ។ ទន្ទឹមនឹងនោះ តំបន់ឆ្នេរសមុទ្រដែលបានក្លាយជាតំបន់ឆ្នេរដ៏ស្រស់ស្អាត ជាប់ចំណាត់ថ្នាក់លេខ១លើពិភពលោក ក៏កំពុងទាក់ទាញភ្ញៀវទេសចរ ជាពិសេស គឺភ្ញៀវទេសចរចិនឲ្យមកសម្រាកកម្សាន្តដ៏ច្រើនកុះករ ។ លោករដ្ឋមន្ត្រី ថោង ខុន ថ្លែងថា ៖«ក្រៅពីប៉ូលទេសចរណ៍ខាងលើ កម្ពុជានៅមានតំបន់មួយចំនួនទៀតដូចជា នៅក្នុងខេត្តកែប និងខេត្តកំពត ដែលពោរពេញទៅដោយប្រជុំកោះ និងឆ្នេរដ៏ស្រស់ស្អាត បន្ទាប់ពីខេត្តព្រះសីហនុ។ ទន្ទឹមនឹងនោះ ម្ហូបអាហារគ្រឿងសមុទ្រ ដែលមានរសជាតិឆ្ងាញ់បាននិងកំពុងទាក់ទាញភ្ញៀវទេសចរចិនថែមទៀត » ។
ក្រៅពីតំបន់ទេសចរណ៍សំខាន់ៗខាងលើ លោករដ្ឋមន្ត្រីបន្ថែមថា តំបន់ភូមិភាគឦសាន ក៏ជាតំបន់ប៉ូលមួយដ៏គួរឲ្យទាក់ទាញភ្ញៀវទេសចរចិនផងដែរ ។ ដោយមើលឃើញបែបនេះហើយ ទើបរាជរដ្ឋាភិបាលកំពុងតែយកចិត្តទុកដាក់អភិវឌ្ឍន៍តំបន់ភូមិភាគឦសាន ដើម្បីទាក់ទាញភ្ញៀវទេសចរ សំខាន់គឺទេសចរចិនឲ្យទៅកាន់តំបន់នោះ ។ លោករដ្ឋមន្ត្រីថ្លែងថា ៖« គោលដៅសំខាន់ៗ និងជាក់ស្តែង អាចរួមមាន ការពង្រឹងគុណភាពនៃការបម្រើទេសចរណ៍, ការបង្កើតឡើងនូវផលិតផលទេសចរណ៍ថ្មីៗបន្ថែមទៀត ហើយផលិតផលនោះត្រូវបម្រើឲ្យចំទីផ្សារទេសចរណ៍ដោយពិតប្រាកដ ព្រោះថា បើយើងមិនមានផលិតផលទេសចរណ៍ថ្មីនោះទេ យើងនឹងមិនអាចទាក់ទាញភ្ញៀវទេសចរក្នុងកំណើនខ្ពស់ឡើយ » ។
លោករដ្ឋមន្ត្រីបានសង្កត់ធ្ងន់ថា ៖« គោលដៅធំរបស់យើង គឺសំដៅបម្រើដល់ភ្ញៀវទេសចរចិន ព្រោះថា ភ្ញៀវទេសចរចិនស្ថិតក្នុងកំណើនខ្ពស់ណាស់ ដែលកម្ពុជាយើងត្រូវឆក់ឱកាស ដើម្បីទាក់ទាញឲ្យកាន់តែច្រើន ប៉ុន្តែយើងក៏មិនភ្លេចទេថា ភ្ញៀវទេសចរនៃបណ្តាប្រទេសដទៃទៀតដែលយើងគប្បីត្រូវគិតគូរ ក្នុងការទាក់ទាញភ្ញៀវពីគ្រប់ប្រទេសផងដែរ » ។
គួរបញ្ជាក់ថា ក្នុងឆ្នាំ២០១៧កន្លងមក កម្ពុជាបានទទួលភ្ញៀវទេសចរអន្តរជាតិចំនួន ៥,៦លាននាក់ កើនឡើង១១,៨% ក្នុងនោះមានភ្ញៀវទេសចរចិនចំនួន១.២១០.៧៨២នាក់ កើនឡើង៤៥,៩% ឈរក្នុងលំដាប់ថ្នាក់លេខ១ នៃទីផ្សារទេសចរណ៍សំខាន់ៗទាំង១០ និងបាននាំមកនូវប្រាក់ចំណូលប្រមាណ៣.៦៣៨លានដុល្លារចាក់បញ្ចូលក្នុងសេដ្ឋកិច្ចជាតិ និងរួមចំណែក១៣% នៃផលិតផលក្នុងស្រុកសរុប (GDP) ។ សម្រាប់រយៈពេល៤ខែដើមឆ្នាំ២០១៨ កម្ពុជាទទួលបានភ្ញៀវទេសចរចិនចំនួន ៦៤៧.៣៥២នាក់ កើនឡើង៧៩,៤% នឹងបន្តឈរក្នុងលំដាប់ថ្នាក់លេខ១ នៃទីផ្សារទេសចរណ៍សំខាន់ៗទាំង១០របស់កម្ពុជា ។
រដ្ឋមន្ត្រីសង្កត់ធ្ងន់ថា តាមការព្យាករ របស់អង្គការទេសចរណ៍ពិភពលោក (UNWTO) បានគូសបញ្ជាក់ថា នៅឆ្នាំ២០២០ ចំនួនទេសចរចិនធ្វើដំណើរចេញក្រៅមានប្រមាណ ២០០លាននាក់ ឬច្រើនជាងនេះ ហើយចំណាយប្រមាណ៤២០ពាន់លានដុល្លារ ដែលធ្វើឱ្យបណ្តាប្រទេសនានាលើពិភពលោកត្រៀមខ្លួនក្នុងការទាក់ទាញ និងទទួលស្វាគមន៍ទេសចរចិន។ ដោយឡែក នៅឆ្នាំ២០១៨ កម្ពុជានឹងទទួលបានទេសចរអន្តរជាតិប្រមាណ៦,២លាននាក់, នៅឆ្នាំ២០២០ ប្រមាណ៧លាននាក់ និងនៅឆ្នាំ២០៣០ កម្ពុជានឹងទទួលបានទេសចរអន្តជាតិប្រមាណ១៥លាននាក់ នាំមកនូវចំណូលសរុបប្រមាណ១០.០០០លានដុល្លារ និងបង្កើតនូវឱកាសការងារប្រមាណ២លាននាក់ ៕
ចែករំលែកព័តមាននេះ