រាជធានីភ្នំពេញ ៖ មន្ត្រីជាន់ខ្ពស់ក្រសួងទេសចរណ៍បានលើកឡើងថា កម្ពុជាជួបបញ្ហាប្រឈមមួយចំនួនដែលរាំងស្ទះចលនាទេសចរណ៍ក្នុងស្រុក គឺខ្វះខាតការផ្សព្វផ្សាយ, ប្រជាពលរដ្ឋមិនទាន់មានទម្លាប់ដើរកម្សាន្ត និងកញ្ចប់ទស្សនកិច្ចនៅមានតម្លៃថ្លៃ ។
ក្នុងពិធីបើកសម្ពោធពិព័រណ៍ទេសចរណ៍ជាតិ កាលពីថ្ងៃទី២០ កក្កដា លោក ថោង ខុន រដ្ឋមន្ត្រីក្រសួងទេសចរណ៍ បានមានប្រសាសន៍ថា ៖« យើងសង្កេតឃើញបញ្ហាប្រឈមមួយចំនួន ដែលរាំងស្ទះចលនាទេសចរណ៍ក្នុងស្រុក ដូចជា កង្វះខាតការផ្សព្វផ្សាយដើម្បីទាក់ទាញទេសចរ, ប្រជាជនកម្ពុជាមិនទាន់មានទម្លាប់ធ្វើដំណើរក្នុងស្រុកតាមរយៈកញ្ចប់ទស្សនកិច្ច និងកញ្ចប់ទស្សនកិច្ចក្នុងស្រុកនៅមានតម្លៃថ្លៃ ដែលមិនអាចទាក់ទាញទេសចរបាន ដោយសារសម្បទានទេសចរណ៍ផ្សេងៗដូចជា សណ្ឋាគារ ភោជនីយដ្ឋាន និងមធ្យោបាយដឹកជញ្ជូនមានតម្លៃថ្លៃ ជាដើម » ។
ទីប្រឹក្សាសមាគមទីភ្នាក់ងារទេសចរណ៍កម្ពុជាមើលឃើញថា កន្លងមក ប្រព័ន្ធផ្សព្វផ្សាយរបស់រដ្ឋ ក៏ដូចជាឯកជន បានចូលរួមផ្សព្វផ្សាយច្រើនទាក់ទងនឹងតំបន់គោលដៅទេសចរណ៍នានានៅក្នុងស្រុក ប៉ុន្តែវាមិនទាន់គ្រប់គ្រាន់ទេ ដែលតម្រូវឱ្យអាជ្ញាធរពាក់ព័ន្ធចូលរួមលើកស្លាកសញ្ញាបង្ហាញកន្លែងកម្សាន្តក្នុងតំបន់របស់ខ្លួន ដើម្បីបង្កើនប្រសិទ្ធភាពថែមទៀត ។
លោក ហូ វណ្ឌី ទីប្រឹក្សាសមាគមទីភ្នាក់ងារទេសចរណ៍កម្ពុជា មានប្រសាសន៍កាលពីថ្ងៃទី២៤ កក្កដា ម្សិលមិញថា ៖« ប៉ុន្មានឆ្នាំចុងក្រោយនេះ គ្រប់សារព័ត៌មានបានចូលរួមផ្សព្វផ្សាយច្រើន ពិសេស យើងឃើញក្រសួងទេសចរណ៍បានបង្កើតបទចម្រៀងខ្លីៗទាក់ទាញច្រើន ហើយគ្រប់តំបន់ផ្សេងទៀតមានការផ្សព្វផ្សាយនៅតាមកញ្ចក់ទូរទស្សន៍ទាំងរដ្ឋ និងឯកជន ។ លើសពីនេះ វិស័យឯកជនខ្លួនឯងក៏បានធ្វើការផ្សព្វផ្សាយនៅតាមបណ្តាញសង្គម តាមខិត្តប័ណ្ណផ្សព្វផ្សាយ តាមកាសែត និងទស្សនាវដ្តី ជាដើម ។ ទន្ទឹមនឹងនេះ យើងមើលឃើញនៅមានកង្វះខាតនៅឡើយ ដែលកន្លងមក យើងមានការប្រជុំគ្នាឱ្យអាជ្ញាធរមានសមត្ថកិច្ចពាក់ព័ន្ធ ពិសេស អាជ្ញាធរនៅតាមតំបន់រៀងៗខ្លួន លើកស្លាកសញ្ញាបង្ហាញ ដើម្បីឲ្យភ្ញៀវទេសចរដឹងថា នៅតំបន់នេះមានអ្វីខ្លះ ? ការធ្វើបែបនេះ ទើបមានប្រសិទ្ធភាពច្រើន » ។
លោកថា ៖« ការលើកស្លាកសញ្ញាបង្ហាញពីតំបន់កម្សាន្តនៅមានចំនួនតិចតួច ហើយពេលខ្លះធ្វើឱ្យអ្នកដំណើរ ឬទេសចរមួយចំនួនទៅហួស មកហួសដែរ ។ អីចឹង ពួកគាត់ត្រូវតែចូលរួមឱ្យបានច្រើន » ។
ក្រៅពីនេះ លោកសង្កត់ធ្ងន់ថា ៖« រឿងសំរាម, អនាម័យ, ចរាចរយានយន្តនៅតាមផ្លូវសាធារណៈ មិនមានសុវត្ថិភាពល្អ និងរឿងសណ្តាប់ធ្នាប់ បង្កឱ្យមានគ្រោះថ្នាក់ចរាចរណ៍រាល់ថ្ងៃ ក៏ធ្វើឲ្យអ្នកធ្វើដំណើរ និងអ្នកទេសចរដែលចង់ទៅលេងនៅតាមតំបន់នានាភ័យខ្លាចរអាដែរ ។ អីចឹងហើយ អាជ្ញាធរមានសមត្ថកិច្ចនៅតាមតំបន់ជួយទប់ស្កាត់ និងពង្រឹងឱ្យខាងតែបាន ព្រោះចំណុចទាំងនេះ វាជាសត្រូវទេសចរណ៍ខ្លាំងណាស់ » ។
កំណើនភ្ញៀវទេសចរក្នុងស្រុកក្នុងរយៈពេលប៉ុន្មានឆ្នាំចុងក្រោយនេះ បានកើនឡើងគួរឲ្យកត់សម្គាល់ ។ ជាក់ស្ដែង នៅឆ្នាំ២០១៥ ទេសចរក្នុងស្រុកមានចំនួនជាង៩,៦លាននាក់ កើនដល់ជាង១០លាននាក់នៅឆ្នាំ២០១៦ និងជិត១១លាននាក់នៅឆ្នាំ២០១៧ ។ ជាមួយគ្នានេះ ចក្ខុវិស័យរបស់ក្រសួងទេសចរណ៍ បានកំណត់និងជំរុញចលនាទេសចរណ៍ក្នុងស្រុក ឲ្យកើនដល់១៩លាននាក់នៅឆ្នាំ២០២៥ខាងមុខ ។
ដើម្បីឆ្លើយតបតាមចក្ខុវិស័យនេះ ក្រសួងទេសចរណ៍ និងគណៈកម្មាធិការជាតិវាយតម្លៃទីក្រុងស្អាត បានអនុវត្តការងារមួយចំនួនក្នុងគោលបំណងពង្រឹងការគ្រប់គ្រង និងអភិវឌ្ឍន៍ផលិតផលទេសចរណ៍ប្រកបដោយគុណភាព និងចីរភាព រួមមាន ការដាក់ចេញនូវការអនុវត្តយន្តការពង្រឹងប្រព័ន្ធវាយតម្លៃ ចំណាត់ថ្នាក់សេវាស្នាក់នៅ, ចលនាប្រឡងប្រណាំងទីក្រុងស្អាត, ចលនាប្រឡងប្រណាំងពានរង្វាន់សម្តេចតេជោនាយករដ្ឋមន្ត្រី សម្រាប់ធុរកិច្ចបៃតងក្នុងវិស័យទេសចរណ៍, ចលនាប្រឡងប្រណាំងរមណីយដ្ឋានទេសចរណ៍គំរូ និងចលនាប្រឡងប្រណាំងបដិសណ្ឋារកិច្ចល្អ ជាដើម ៕
ចែករំលែកព័តមាននេះ