ខេត្តកណ្ដាល ៖ បុរសម្នាក់ត្រូវបានប្រពន្ធកូនទទួលស្គាល់ថា ជាមនុស្សផឹកស្រាស្រវឹងខួប កាលពីវេលាម៉ោង៣ និង៤០នាទី ថ្ងៃទី២៥ កក្កដានេះ គេបានប្រទះឃើញលង់ទឹកស្លាប់ ដោយសារចុះស្រង់ចកក្នុងស្រះសីមា វត្តម៉ែបាន ភូមិម៉ែបាន ឃុំស៊ីធរ ស្រុកខ្សាច់កណ្តាល ខេត្តកណ្តាល ។ ជនរងគ្រោះឈ្មោះ រុន ឌីណា អាយុ៣០ឆ្នាំ មុខរបរកសិករ ប្រពន្ធឈ្មោះ កើ មុំ អាយុ៣១ឆ្នាំ មុខរបរ កសិករដូចគ្នា មានទីលំនៅភូមិឃុំកើតហេតុខាងលើ មានកូនប្រុស២នាក់។
តាមសម្ដីស្ត្រីជាភរិយា របស់សពបានរៀបរាប់ប្រាប់សមត្ថកិច្ចថា កន្លងមកជនរងគ្រោះ(ប្តីគាត់) តែងតែផឹកស្រាស្រវឹងខួប ជារៀងរាល់ថ្ងៃ តែរយៈពេលកន្លះខែមកនេះជនរងគ្រោះបានមកជួយស្រង់ចកពីក្នុងស្រះសីមា នៅវត្តម៉ែបាន។ លុះថ្ងៃទី២៥ កក្កដានេះ វេលាម៉ោង១១ និង៣០នាទីព្រឹក ប្តីអ្នកស្រីបានផឹកស្រា ស្រវឹងយ៉ាងខ្លាំង ហើយជិះម៉ូតូចេញពីផ្ទះទៅស្រង់ចក ដើម្បីសម្អាតចេញពីក្នុងស្រះដូចសព្វដង។ ពេលនោះអ្នកស្រីបានឃាត់គាត់ដែរកុំឲ្យចុះទឹកព្រោះអាការៈស្រវឹងដាបហើយ តែប្តីគាត់មិនស្តាប់គាត់ ក៏ជិះម៉ូតូចេញពីផ្ទះ។
ដល់វេលាម៉ោង១២ព្រឹកថ្ងៃដដែល ឈ្មោះ អ៊ុំ គន្ធា ដែលជាជាងគំនូរនៅវត្តម៉ែបាន មិនបានឃើញជនរងគ្រោះឃើញតែម៉ូតូ ស្បែកជើង មួកខោអាវ នៅមាត់ស្រះ សង្ស័យជនរងគ្រោះលង់ទឹក បានទៅប្រាប់គាត់ជាប្រពន្ធ ភ្លាមនោះគាត់រួមជាមួយឈ្មោះ ងួន សេង ឈ្មោះ ស៊ុំ សារុន ត្រូវជាឪពុក ជនរងគ្រោះ និងព្រះសង្ឃក្នុងវត្តបានចុះទៅក្នុងស្រះជួយរាវរកជនរងគ្រោះ រហូតដល់វេលាម៉ោង៣ និង៤០នាទីរសៀល។
ទើបបានរាវរកសាកសពជនរងគ្រោះឃើញនៅចម្ងាយពីមាត់ស្រះ៣ម៉ែត្រ ជម្រៅប្រហែល១ម៉ែត្រ៨តឹក និងបានស្រង់មកដាក់លើគោក រួចរាយការណ៍ជូនសមត្ថកិច្ច នគរបាលប៉ុស្តិ៍ រដ្ឋបាលស៊ីធរ ដើម្បីពិនិត្យតាមការងារបច្ចេកទេស ដោយមាននគរបាលប៉ុស្តិ៍ ក្រុមប្រឹក្សាឃុំ មេភូមិ គ្រូពេទ្យ និងក្រុមគ្រួសារសព។ សាកសពមានសភាពពោះប៉ោង ហូរទឹកចេញតាមច្រមុះ ក្រៅពីនេះពុំមាន ស្លាកស្នាមអ្វីគួរឲ្យកត់សម្គាល់ទេ។ រួចសាកសពបានប្រគល់ជូនក្រុមគ្រួសារធ្វើបុណ្យតាមប្រពៃណី៕
ចែករំលែកព័តមាននេះ