ខេត្តកណ្ដាល ៖ ព័ត៌មានបឋមបានឲ្យដឹងថា កាលពីវេលាម៉ោង១០ និង៤៥នាទីព្រឹក ថ្ងៃទី២៥ កក្កដា ២០១៨នេះ មានប្រជាពលរដ្ឋបានប្រទះឃើញសពអណ្តែតទឹកនៅចំណុចតាមដងទន្លេសាប ស្ថិតក្នុងភូមិតាមែ ឃុំកំពង់ឧស ស្រុកពញឮ ខេត្តកណ្ដាល។
ជនរងគ្រោះស្ថិតក្នុងការសង្ស័យមានឈ្មោះ ZHANG YULO ភេទប្រុស អាយុ២១ឆ្នាំ ជនជាតិចិន មុខរបរជាងជួសជុលគ្រឿងចក្រ មានទីលំនៅក្នុងខេត្ត HUANN ប្រទេសចិន។ មកស្នាក់នៅសង្កាត់ចោមចៅ ខណ្ឌពោធិសែនជ័យ រាជធានីភ្នំពេញ កាន់លិខិតឆ្លងដែនលេខ EB4823468។ ប្រភពព័ត៌មានឲ្យដឹងថា សមត្ថកិច្ចបានទទួល ព័ត៌មានពីប្រជាពលរដ្ឋ គេប្រទះឃើញសាកសពអណ្តែតទឹកតាមដងទន្លេសាប។
ក្រោយពីទទួលបាន ព័ត៌មាននោះ កម្លាំងប្រជាការពារភូមិ បាននាំគ្នាយកទូកទៅអូសទាញយកសពមកអែបច្រាំង ហើយរាយការណ៍ទៅសមត្ថកិច្ចនគរបាលប៉ុស្តិ៍។ បន្ទាប់មកកម្លាំងជំនាញ បានចុះទៅពិនិត្យសាកសព ដោយមានការចូលរួមពីមន្ត្រីថ្នាក់ក្រសួងខេត្ត ស្រុក ក្រុមប្រឹក្សាឃុំ និងលោកគ្រូពេទ្យ ដោយបានសន្និដ្ឋានជំហានដំបូងថា សពពិតជាស្លាប់ដោយសារលង់ទឹក។ គណៈកម្មការពិនិត្យសព បានយកសាកសព ទៅតម្កល់នៅវត្តស្ទឹងមានជ័យ រាជធានីភ្នំពេញ រង់ចាំសាច់ញាតិមកពីប្រទេសចិនទទួលយក៕
ចែករំលែកព័តមាននេះ