រាជធានីភ្នំពេញ ៖ ខ្សែភ្លើងមេមួយដុំដែលមានទំហំប្រមាណធំប៉ុន.កដៃដែលមានប្រវែងជាង៩ម៉ែត្រត្រូវបានក្រុមចោរនាំគ្នាមកធ្វើសកម្មភាពឆ្កឹះសោរចូលទៅលួចកាត់យកបាត់ពីក្នុងប៊ីនភ្លើងមួយកន្លែងដែលមានទីតាំងនៅខាងមុខអតីតរៀងចក្រ គង់ ហុង ដោយមានបច្ចេកទេសបិទប៉ារ៉ែត និងឧបករណ៍កាត់យ៉ាងត្រឹមត្រូវរហូតទាល់តែមានការរាយការណ៍ពីការដាច់ភ្លើងអំពីសំណាក់ប្រជាពលរដ្ឋទើបបានដឹងនោះ ។
ហេតុការណ៍នេះដែរបានបង្កការភ្ញាក់ផ្អើលកើតឡើងនៅវេលាម៉ោង១២និង០០នាទីថ្ងៃត្រង់ ថ្ងៃទី២៥ ខែកក្កដា ឆ្នាំ២០១៨ នៅចំណុចការប៊ីនភ្លើងដែលមានលេខ ប.ត ៥០៥ ដែលមានទិតាំងនៅខាងមុខដីឡូតិ៍អតីតរោងចក្រកាត់ដេរ គង់ ហុង ផ្លូវព្រះមនីវង្ស ក្នុងសង្កាត់ទន្លេបាសាក់ ខណ្ឌចំការមន ។
មន្ត្រីអគ្គិសនីកម្ពុជាម្នាក់បានប្រាប់ឱ្យដឹងថា មុនពេលកើតហេតុកាលពីវេលាប្រមាណជាជាង១០ព្រឹក ថ្ងៃទី២៥ ខែកក្កដា នេះដោយខាងអគ្គិសនីកម្ពុជាបានទទួលព័ត៌មានពីការរាយការណ៍ប្រាប់អំពីសំណាក់ប្រជាពលរដ្ឋក្នុងមូលដ្ឋានទៅសួរពួក គាត់ថា «ហេតុអ្វីបានជាដាច់ភ្លើងយូរម្លេះ?» ។ ទើបពួកគាត់បានចុះមកកាន់ការប៊ីនភ្លើងខាងលើដើម្បីធ្វើការត្រួតពិនិត្យមើលអោយដឹងពីមូលហេតុពេលដែលពួកគាត់មកដល់ភ្លាមក៏ស្រាប់តែបានឃើញទ្វារកាប៊ីនភ្លើងបិទជិតជាធម្មតាតែមិនឃើញមេសោរឡើយ ។
តាមប្រភពដដែលបានប្រាប់បន្តទៀតថា ពេលនោះពួកគាត់ក៏បានទាញទ្វារបើកចូលទៅក្នុងក៏ស្រាប់តែបានឃើញមេសោរធ្លាក់នៅលើដីខាងក្នុងកាប៊ីន និងឃើញបារ៉ែតភ្លើងត្រូវបានគេទាញបិទ និងមានស្នាមកាត់យកខ្សែភ្លើងមេដែលមានទំហំប៉ុន.កដៃអស់ប្រវែងប្រមាណជា៩ម៉ែត្រយកទៅបាត់ទើបកម្លាំងរបស់លោកធ្វើការរាយការណ៍ទៅប្រាប់កម្លាំងមានសម្ថកិច្ចមូលដ្ឋានឱ្យដឹងពីរឿងនេះផងដែរ ។
ការលួចនេះដែរដោយក្រុមចោរបាននាំគ្នាឆ្កឹះសោរដែលចាក់ខាងក្រៅចូលទៅក្នុងកាប៊ីន រួចហើយបិទបារ៉ែតភ្លើងត្រឹមត្រូវទើបធ្វើសកម្មភាពដោះ និងលួចកាត់យកខ្សែភ្លើងទាំងអស់នេះដោយមានបច្ចេកទេសយ៉ាងត្រឹមត្រូវទើបធ្វើអោយមានការដាច់ភ្លើងទៅដល់ផ្ទះរបស់ប្រជាពលរដ្ឋមួយចំនួននៅក្នុងប្លុកនេះទំនងជាដាច់តាំងពីយប់មកម្លេះនោះ ។
ក្រោយពីកម្លាំងអាជ្ញាធរអគ្គិសនីកម្ពុជាចុះមកដល់ទីតាំងកាប៊ីនភ្លើងខាងលើរួចហើយក៏បាននាំគ្នាប្រញាប់ធ្វើការជួសជុលដើម្បីអោយមានភ្លើងប្រើប្រាស់វិញ ហើយកម្លាំងមានសមត្ថកិច្ចក៏កំពុងតែធ្វើការស្រាវជ្រាវរកចាប់ខ្លួនក្រុមជនដៃដល់យកមកធ្វើការផ្តន្ទាទោសទៅតាមច្បាប់ផងដែរ ៕
ចែករំលែកព័តមាននេះ