ប្រទេសស៊ីរី និងអ៊ីស្រាអែល ៖ អ៊ីស្រាអែលបានរាយការណ៍កាលពីថ្ងៃទី២៤ កក្កដាថា បានបាញ់ធ្លាក់នាថ្ងៃនោះនូវយន្តហោះប្រដេញមួយគ្រឿងរបស់ស៊ីរី ដែលហោះចូលក្នុងដែនអាកាស ដែលខ្លួនត្រួតត្រាពីលើខ្ពង់រាបហ្គោឡង់។ ហើយស៊ីរីវិញបានបដិសេធថា យន្តហោះនេះធ្វើប្រតិបត្តិការប្រឆាំងពួកជីហាដនៅភាគខាងត្បូងប្រទេស។
អ៊ីស្រាអែលបានប្រុងជើងការពារចាប់តាំងពីរបបស៊ីរី និងសម្ព័ន្ធមិត្តបានបើកការវាយលុកតាំងពីថ្ងៃទី១៩ មិថុនាមក ដើម្បីដណ្ដើមកាន់កាប់បណ្ដាតំបន់ឧទ្ទាមក្នុងខេត្តដឺរ៉ាអានិងខេត្តគូណីត្រា ភាគខាងត្បូងប្រទេស ក្បែរផ្នែកខ្ពង់រាបហ្គោឡង់ ដែលខ្លួនត្រួតត្រាមក។
រីឯអ្នកនាំពាក្យកងទ័ពអ៊ីស្រាអែល គូសបញ្ជាក់ថា យន្តហោះប្រយុទ្ធធុន SUKHOI22 ឬ SUKHOI23 រងការបាញ់ប្រហារ ក្រោយពីហោះចូលជម្រៅ២គីឡូម៉ែត្រក្នុងដែនអាកាស ត្រួតត្រាដោយអ៊ីស្រាអែល នៅភាគខាងត្បូងនៃតំបន់ហ្គោឡង់។ ក្នុងសេចក្ដីប្រកាសមួយមុននេះបន្តិច កងទ័ពអ៊ីស្រាអែល បញ្ជាក់ថា បានបាញ់មីស៊ីលប៉ាទ្រីយ៉ូតត្រូវយន្តហោះនេះធ្លាក់។ ហើយយន្តហោះបានធ្លាក់ក្នុងផ្នែកខាងត្បូងនៃខ្ពង់រាបហ្គោឡង់ស៊ីរី។
នៅស៊ីរីប្រភពយោធាមួយបានធ្វើការបកស្រាយខុសពីនេះ ដោយថា អ៊ីស្រាអែលតាមពិតទៅបាញ់សំដៅយន្តហោះប្រដេញស៊ីរីមួយដែលកំពុងធ្វើប្រតិបត្តិការ ប្រឆាំងពួកជីហាដ នៅភាគខាងត្បូងស៊ីរី។ របបក្រុងដាម៉ាស់ចាប់តាំងពីយូរមកហើយ ចោទប្រកាន់អ៊ីស្រាអែលថា ជួយទ្រទ្រង់ដល់ក្រុមរដ្ឋអ៊ិស្លាមនិងបណ្ដាក្រុមឧទ្ទាម។
ដោយឡែកទីភ្នាក់ងារព័ត៌មានស៊ីរី SANA រាយការណ៍ពីការវាយប្រហារអត្តឃាតមួយ នៅទីក្រុង SWEIDA ភាគនិរតីប្រទេស បណ្ដាលឲ្យមនុស្សស្លាប់យ៉ាងតិច៣៨នាក់ហើយច្រើននាក់ទៀតរងរបួស៕
ចែករំលែកព័តមាននេះ