ខេត្តស្វាយរៀង ៖ កូនប្រុសម្នាក់ខឹងឪពុកមកពីផឹកស៊ីរករឿងជេរម្ដាយ និងកូនៗ ស្ទុះទៅទាញយកកាំបិតខ្វែវកាប់ចិញ្ច្រាំទៅលើឪពុកចំនួន៣កាំបិត បណ្តាលឲ្យប្រកាច់ស្លាប់ក្នុងថ្លុកឈាមមួយរំពេច ។ ហេតុការណ៍នេះបង្កឱ្យមានការភ្ញាក់ផ្អើលបានកើតឡើងកាលពីវេលាម៉ោង៦និង៣០នាទីយប់ថ្ងៃទី២៤ ខែកក្កដា ឆ្នាំ២០១៨ នៅចំណុចភូមិព្រៃតាធឹក ឃុំគគីរសោម ស្រុកស្វាយទាប ខេត្តស្វាយរៀង។
បើតាមលោកស្នងការរងទទួលផែននគរបាលព្រហ្មទណ្ឌ លោក ឧត្តមសេនីយ៍ត្រី កុយ សុភាព បានឲ្យដឹងថា កូនប្រុសដែលជាជនសង្ស័យឈ្មោះ ផល ឆាយយ៉ា អាយុ២៥ឆ្នាំ មុខរបរធ្វើស្រែ មានទីលំនៅភូមិឃុំកើតហេតុខាងលើ បានយកកាំបិតខ្វែវកាប់ទៅលើឪពុកបង្កើតរបស់ខ្លួនឈ្មោះ សុក មន អាយុ៥៦ឆ្នាំ ចំនួន៣កាំបិត ត្រូវចំដើមទ្រូងមួយកាំបិត ស្មាខាងឆ្វេងមួយកាំបិត និងត្រូវចំ.កមួយកាំបិត បណ្តាលឲ្យប្រកាច់ស្លាប់ក្នុងថ្លុកឈាមមួយរំពេច ព្រោះខឹងឪពុកស្រវឹងស្រាមកដល់ផ្ទះស្រែកជេរស្តីប្រពន្ធ និងកូនៗ។ ក្រោយបង្កហេតុ ជនសង្ស័យបានទម្លាក់កាំបិតចោល រួចរត់គេចខ្លួនបាត់។
លោកស្នងការរងបានបន្តថា លុះដល់វេលាម៉ោង៨យប់ថ្ងៃដដែល បន្ទាប់ពីទទួលបានព័ត៌មានភ្លាម លោកអធិការនគរបាលស្រុកស្វាយទាប កម្លាំងជំនាញ នគរបាលព្រហ្មទណ្ឌកម្រិតធ្ងន់ កម្លាំងជំនាញការិយាល័យនគរបាលបច្ចេកទេស និងវិទ្យាសាស្ត្រ បានចុះមកដល់កន្លែងកើតហេតុ សហការជាមួយកម្លាំងជំនាញអធិការស្រុកស្វាយទាប ដើម្បីស្រាវជ្រាវរកទីតាំងលាក់ខ្លួនរបស់ជនសង្ស័យ ដើម្បីតាមចាប់ខ្លួនយកមកផ្តន្ទាទោសតាមផ្លូវច្បាប់៕
ចែករំលែកព័តមាននេះ