ខេត្តព្រៃវែង ៖ វិស័យអគ្គិសនី គឺជាវិស័យដ៏សំខាន់មួយសម្រាប់ប្រទេសអភិវឌ្ឍន៍ និងប្រទេសកំពុងអភិវឌ្ឍន៍ដោយមិនថា ទីក្រុង ឬជនបទនោះទេ គឺសុទ្ធតែត្រូវការភ្លើងអគ្គិសនីជាចាំបាច់នៅក្នុងជីវភាពរស់នៅប្រចាំថ្ងៃ ហើយប្រទេសកម្ពុជាក៏ដូចគ្នាដែរ ។…
ខេត្តព្រៃវែង ៖ វិស័យអគ្គិសនី គឺជាវិស័យដ៏សំខាន់មួយសម្រាប់ប្រទេសអភិវឌ្ឍន៍ និងប្រទេសកំពុងអភិវឌ្ឍន៍ដោយមិនថា ទីក្រុង ឬជនបទនោះទេ គឺសុទ្ធតែត្រូវការភ្លើងអគ្គិសនីជាចាំបាច់នៅក្នុងជីវភាពរស់នៅប្រចាំថ្ងៃ ហើយប្រទេសកម្ពុជាក៏ដូចគ្នាដែរ ។
ដោយឡែកនៅក្នុងខេត្តព្រៃវែងវិស័យអគ្គិសនីក៏កំពុងមានការរីកចម្រើនយ៉ាងខ្លាំងផងដែរ ដោយនៅគ្រប់ខ្នងផ្ទះទាំងអស់ ទាំងនៅទីប្រជុំជន និងទីជនបទនានា គឺមានភ្លើងអគ្គិសនីប្រើប្រាស់ស្ទើគ្រប់ខ្នងផ្ទះ ហើយបច្ចុប្បន្ននេះមន្ត្រីអគ្គិសនីទាំងអគ្គិសនីរដ្ឋ និងក្រុមហ៊ុនឯកជន កំពុងតែមមារញឹកក្នុងការតបណ្តាញភ្លើងចែកចាយទៅតាមទីជនបទដាច់ស្រយាលថែមទៀត ដើម្បីបំពេញសេចក្តីត្រូវការរបស់ប្រជាពលរដ្ឋ ។
លោក ជា កក្កដា ប្រធានមន្ទីររ៉ែ និងថាមពលខេត្តព្រៃវែងបានមានប្រសាសន៍ថា បច្ចុប្បន្ននេះ នៅទូទាំងខេត្តព្រៃវែងទាំងមូលមានក្រុមហ៊ុនឯកជនចំនួន២៨ក្រុមហ៊ុនដែលកំពុងវិនិយោគលើវិស័យអគ្គិសនីនេះ និងបានផ្គត់ផ្គង់ភ្លើងអគ្គិសនីជូនប្រជាពលរដ្ឋបានចំនួន១១៣៧ភូមិ ស្មើនិង១១៦ឃុំ ទូទាំងខេត្តព្រៃវែង ។
ទោះជាយ៉ាងណាក៏ដោយបើយោងតាមការសិក្សាជាក់ស្តែងរបស់មន្ត្រីជំនាញ បើគិតពីចំនួន ការផ្គត់ផ្គង់នេះទើបតែបាន៦០%ប៉ុណ្ណោះនៃចំនួនប្រជាពលរដ្ឋទាំងអស់ដែលកំពុងត្រូវការភ្លើងអគ្គិសនីប្រើប្រាស់ជាចាំបាច់ គឺមានន័យថា នៅសល់៤០%ទៀតមិនទាន់ទទួលបានភ្លើងអគ្គិសនីប្រើប្រាស់គ្រប់គ្រាន់នៅឡើយទេ ។ ហេតុដូច្នេះហើយទើបអគ្គិសនីជាតិកម្ពុជាបានបង្កើតអនុស្ថានីយ៍អគ្គិសនីមួយទៀត នៅឃុំកំពង់សឹង ស្រុកព្រះស្តេច ហើយបានជំរុញឲ្យខាងក្រុមហ៊ុនឯកជនធ្វើការតបណ្តាញអគ្គិសនីចូលទៅតាមភូមិផ្សេងៗទៀតដែលមិនទាន់មានភ្លើងចូលទៅដល់ធ្វើយ៉ាងណាឲ្យប្រជាពលរដ្ឋនៅតាមភូមិទាំងនោះមានភ្លើងប្រើប្រាស់គ្រប់ៗគ្នា នៅត្រឹមឆ្នាំ២០២១ខាងមុខនេះ ។
ជាមួយគ្នានេះដែរលោកក៏បានផ្តាំផ្ញើទៅដល់បងប្អូនប្រជាពលរដ្ឋដែលប្រើប្រាស់ភ្លើងអគ្គិសនីទាំងអស់ត្រូវមានការប្រុងប្រយ័ត្នឲ្យបានខ្ពស់នៅពេលដែលខ្លួនសើម សូមកុំប៉ះពាល់កុងតាក់ឫព្រីភ្លើង ហើយពេលខ្សែភ្លើងមានបញ្ហាត្រូវរាយការណ៍មកមន្ត្រីអគ្គិសនីជាបន្ទាប់ ជៀសវាងកុំឲ្យមានគ្រោះថ្នាក់កើតឡើង ៕
ចែករំលែកព័តមាននេះ