ខេត្តប៉ៃលិន ៖ មន្ត្រីនគរបាលវរ៨២១ការពារព្រំដែនបានស្លាប់ភ្លាមក្នុងថ្លុកឈាម ជាមួយស្ត្រីម្នាក់ដែលកំពុងជិះម៉ូតូឌុបគ្នា ដោយសារត្រូវរថយន្តដឹកទឹកកកបុកពេញទំហឹងខ្ទាតមនុស្សផ្លោងជាច្រើនម៉ែត្រ កាលពីវេលាម៉ោង៣ និង១០នាទីរសៀលថ្ងៃទី២១ ខែកក្កដាកន្លងទៅ នៅភូមិអូរឈើក្រំ ឃុំស្ទឹងកាច់ ស្រុកសាលាក្រៅ ។
តាមព័ត៌មានឱ្យដឹងថា គ្រោះថ្នាក់នេះមិនមែនកើតឡើង ដោយខ្វះការប្រុងប្រយ័ត្ននោះទេ តែជាឃាតកម្មគិតទុកជាមុនរបស់អ្នកបើកបររថយន្តដឹកទឹកកក ដោយសារប្រចណ្ឌនឹងអតីតស្រីស្នេហ៍របស់ខ្លួន ដែលបានបោះបង់រូបគេ ហើយទៅមានប្រុសស្នេហ៍ថ្មី ។
ប្រភពព័ត៌មានពីនគរបាលចរាចរណ៍ផ្លូវគោកខេត្តបានឱ្យដឹងថា ជនដែលបើករថយន្តបុកម៉ូតូនេះ ឈ្មោះ សាន សិទ្ធ ភេទប្រុស អាយុ១៨ឆ្នាំ ជាកម្មករបើករថយន្តដឹកទឹកកកឱ្យថៅកែម្នាក់ និងបើករថយន្តម៉ាកហ៊ីយ៉ាន់ដាយ ពណ៌ខៀវលាយស ពាក់ផ្លាកលេខ ភ្នំពេញ ៣C-៣០៩៦ ។ ជននេះ រស់នៅក្នុងភូមិតាប្រាង សង្កាត់ប៉ៃលិន ក្រុងប៉ៃលិន ។ ឯអ្នករួមដំណើរក្នុងរថយន្ត ឈ្មោះ ណាន់ វីន ភេទប្រុស អាយុ១៨ឆ្នាំ ជាកម្មករដឹកទឹកកក និងមានទីលំនៅក្នុងភូមិជាមួយគ្នា ។
ចំណែកជនរងគ្រោះដែលស្លាប់បុរសឈ្មោះជួន ផាន់ណា អាយុ២៦ឆ្នាំ ជាមន្ត្រីនគរបាលវរព្រំដែនលេខ៨២១ បើកម៉ូតូម៉ាកឌូក ពណ៌.សលាយខ្មៅ ពាក់ផ្លាកលេខ ភ្នំពេញ ១FK-៤១៩៩ និងស្ត្រីឈ្មោះ សាន វាសនា អាយុ១៨ឆ្នាំ រស់នៅភូមិអូររអិល ឃុំស្ទឹងកាច់ ស្រុកសាលាក្រៅ ។
ប្រភពដដែលបន្តថា រថយន្តនិងម៉ូតូធ្វើដំណើរស្របទិសគ្នា ស្រាប់តែរថយន្តដឹកទឹកកករេចង្កូតមកខាង
ឆ្វេងដៃបំបុកម៉ូតូជនរងគ្រោះពេញទំហឹង អូសជាច្រើនម៉ែត្រ បណ្តាលឱ្យស្លាប់ទាំង២នាក់យ៉ាងអាណោចអាធ័ម។
ករណីខាងលើនេះ មុនដំបូង ជាសំណុំរឿងគ្រោះថ្នាក់ចរាចរណ៍ ដោយសាររថយន្តរេចង្កូតជ្រុលទៅបុកម៉ូតូ ។ ប៉ុន្តែ បន្ទាប់ពីទទួលបានពាក្យបណ្តឹងពីឈ្មោះ មាស ម៉ូរ៉ា ភេទស្រី អាយុ៥១ឆ្នាំ ជាកសិករ រស់នៅភូមិអូររអិល ឃុំស្ទឹងកាច់ ស្រុកសាលាក្រៅ ជាម្ដាយស្ត្រីរងគ្រោះ ក្នុងករណីគ្រោះថ្នាក់ចរាចរណ៍នេះ នគរបាលការិយាព្រហ្មទណ្ឌកម្រិតធ្ងន់ខេត្ត ធ្វើការស្រាវជ្រាវស៊ើបសួរអ្នកបើកបររថយន្តបានរកឃើញថា ករណីនេះគឺជាឃាតកម្មគិតទុកជាមុន ។
ប្រភពព័ត៌មានពីនគរបាលបានឱ្យដឹងថា ឈ្មោះ ណាន់ វីន ជាកម្មករបើករថយន្តឱ្យថៅកែរោងចក្រទឹកកក
«ប៊ីអេស» ស្ថិតនៅក្នុងភូមិអូរតាប្រាង សង្កាត់អូរតាវ៉ៅ ក្រុងប៉ៃលិន បានបើករថយន្តដឹកទឹកកកដេញបំបុកម៉ូតូជនរងគ្រោះដោយចេតនា ខណៈបុរសម្ចាស់ម៉ូតូឌុបនារីម្នាក់ ដែលជាអតីតស្រីស្នេហ៍របស់ខ្លួន នៅតាមផ្លូវលំក្បែរក្រវាត់ព្រំដែន (ផ្លូវអូរឈើក្រំ) ។
ដោយសារមានកំហឹងនិងប្រចណ្ឌ លុះដល់ចំណុចខាងលើ ក៏បានជាន់ហ្គែរបន្ថែមដេញបំបុកម៉ូតូជនរងគ្រោះពីក្រោយពេញទំហឹង បណ្តាលឱ្យជនរងគ្រោះទាំង២នាក់ស្លាប់ភ្លាមៗនៅនឹងកន្លែងកើតហេតុ ហើយរថយន្តក៏ជ្រុលទៅបុកផ្ទះប្រជាពលរដ្ឋបណ្តាលឱ្យខូចខាតអស់១ខ្នងថែមទៀត ។ ភ្លាមៗនោះ ជនសង្ស័យត្រូវបាននគរបាលឃាត់ខ្លួនបញ្ជូនទៅស្នងការដ្ឋាននគរបាលខេត្ត ។
ក្រោយពីធ្វើការស្រាវជ្រាវ និងស៊ើបអង្កេតដោយការិយាល័យព្រហ្មទណ្ឌកម្រិតធ្ងន់ យុវជនជាអ្នកបើករថយន្តបានសារភាពថា រូបគេពិតជាមានចេតនាបុកសម្លាប់ជនរងគ្រោះទាំង២នាក់ ប្រាកដមែន ដោយសារតែការប្រចណ្ឌ ព្រោះឃើញមន្ត្រីនគរបាលរូបនោះដឹកអតីតសង្សាររបស់ខ្លួនដែលធ្លាប់ស្រឡាញ់កាលពី
មុន ។ ប្រភពព័ត៌មានពីពលរដ្ឋម្នាក់ មិនបញ្ចេញឈ្មោះបានឱ្យដឹងថា កាលពីមុនយុវជនរូបនេះ និងនារីរងគ្រោះ គឺជាអ្នកធ្វើការក្នុងសិប្បកម្មផលិតទឹកកកជាមួយគ្នា ហើយក៏ស្រឡាញ់គ្នារហូតមក ។
ប៉ុន្តែក្រោយមកនារីរងគ្រោះ បានប្តូរកន្លែងធ្វើការ ក៏បែកបែរចិត្តទៅស្រឡាញ់មន្ត្រីនគរបាលខាងលើ ។ លុះពេលកំពុងបើកបររថយន្តដឹកទឹកកកលក់តាមភូមិ ស្រាប់តែប្រទះឃើញមន្ត្រីនគរបាលរងគ្រោះឌុបអតីតស្រីស្នេហ៍របស់ខ្លួន ក៏កើតចិត្តប្រចណ្ឌ ក្លាយទៅជាកំហឹងបើករថយន្តបំបុកពីក្រោយ ខណៈបើកបរស្របទិសគ្នា បណ្តាលឱ្យស្លាប់ទាំង២នាក់យ៉ាងអាណោចអាធ័ម ។ ចំពោះបទល្មើសដែលជនបរាជ័យក្នុងរឿងស្នេហា បើករថយន្តបុកសម្លាប់មនុស្សដល់ទៅ២នាក់នេះ ប្រហែលជាត្រូវដេកគុកអស់១ជីវិតមិន
ខាន ៕
ចែករំលែកព័តមាននេះ