ខេត្តកំពត ៖ ដោយសារតែផ្លូវក្នុងក្រុងកំពតរងការខូចខាតដោយសារគ្រោះទឹកជំនន់ រយៈពេលកន្លងមកជាច្រើនកន្លែង ហើយត្រូវធ្វើការជួសជុលឡើងវិញក្នុងនោះរដ្ឋបាលខេត្តបានចេញសេចក្តីជូនដំណឹងដល់ក្រុមអាជីវករដែលមានរថយន្តដឹកដី ដឹកថ្ម ដឹកខ្សាច់ ទាំងអស់ឲ្យផ្អាកការធ្វើចរាចរណ៍ឆ្លងកាត់ក្រុងដែលកំពុងតែធ្វើការជួសជុលផ្លូវ ដែលខូចខាតដោយគ្រោះទឹកជំនន់នាពេលកន្លងមក ។…
ខេត្តកំពត ៖ ដោយសារតែផ្លូវក្នុងក្រុងកំពតរងការខូចខាតដោយសារគ្រោះទឹកជំនន់ រយៈពេលកន្លងមកជាច្រើនកន្លែង ហើយត្រូវធ្វើការជួសជុលឡើងវិញក្នុងនោះរដ្ឋបាលខេត្តបានចេញសេចក្តីជូនដំណឹងដល់ក្រុមអាជីវករដែលមានរថយន្តដឹកដី ដឹកថ្ម ដឹកខ្សាច់ ទាំងអស់ឲ្យផ្អាកការធ្វើចរាចរណ៍ឆ្លងកាត់ក្រុងដែលកំពុងតែធ្វើការជួសជុលផ្លូវ ដែលខូចខាតដោយគ្រោះទឹកជំនន់នាពេលកន្លងមក ។
យោងតាមសេចក្តីជូនដំណឹងរបស់រដ្ឋបាលខេត្តខាងលើដោយក្រុមរថយន្តធ្វើអាជីវកម្មដឹកដី ដឹកថ្ម ដឹកខ្សាច់ខាងលើនៅតែធ្វើការឆ្លងកាត់ដដែល ដោយមិនបានគោរពតាមសេចក្តីជូនដំណឹងនាពេលកន្លងមកទើបនៅព្រឹកថ្ងៃទី២៤ ខែកក្កដា ឆ្នាំ២០១៨ នេះ លោកអភិបាលខេត្តបានធ្វើការណែនាំឲ្យលោកអភិបាលក្រុងកំពតចាត់វិធានការជាមួយកម្លាំងសមត្ថកិច្ចនគរបាលសណ្តាប់ធ្នាប់ក្រុងឃាត់រថយន្តដែលធ្វើអាជីវកម្មដឹកដី – ថ្ម និងខ្សាច់ ឆ្លងកាត់ក្នុងក្រុង ដើម្បីមកធ្វើការណែនាំ និងធ្វើកិច្ចសន្យាបញ្ឈប់ការធ្វើចរាចរណ៍ឆ្លងកាត់ផ្លូវដែលកំពុងធ្វើការជួសជុលនាពេលនេះ ។
ជុំវិញករណីសមត្ថកិច្ចនគរបាលក្រុងឃាត់រថយន្តដែលធ្វើអាជីវកម្មដឹកដី-ថ្ម – ខ្សាច់ ខាងលើ លោកលាង រឿនសុទ្ធី អភិបាលក្រុងកំពតបានថ្លែងប្រាប់កោះសន្តិភាពថា ដោយទទួលបញ្ជាពីលោកអភិបាលខេត្តណែនាំឲ្យក្រុងចាត់វិធានការឃាត់រថយន្តដែលធ្វើអាជីវកម្មខាងលើ ដោយកន្លងមករដ្ឋបាលខេត្តបានជូនដំណឹងសុំឲ្យផ្អាកការធ្វើចរាចរណ៍ដឹកជញ្ជូនឆ្លងកាត់ក្នុងក្រុងមួយរយៈសិន ដែលពេលនេះក្រុងកំពុងធ្វើការជួសជុលផ្លូវដែលរងការខូចខាតដោយគ្រោះទឹកជំនន់ប៉ុន្មានថ្ងៃកន្លងមកនេះ ហើយក្រុមអ្នកធ្វើអាជីវកម្មទាំងនោះហាក់ដូចជាមិនគោរពតាមសំណូមពរ និងសេចក្តីជូនដំណឹងរបស់រដ្ឋបាលទើបពេលនេះខេត្តបញ្ជាឲ្យក្រុងចាត់វិធានការឃាត់រថយន្តទាំងអស់ដែលកំពុងដឹកជញ្ជូនធ្វើចរាចរណ៍ឆ្លងកាត់ក្នុងក្រុងមកធ្វើការណែនាំនិងឲ្យផ្អាកសកម្មភាពធ្វើចរាចរណ៍ដឹកសម្ភារធ្ងន់ៗឆ្លងកាត់ក្រុងមួយរយៈតូចសិន ពេលជួសជុលផ្លូវដែលខូចខាតហើយ ទើបអនុញ្ញាត្តឲ្យបងប្អូនធ្វើចរាចរណ៍ឆ្លងកាត់វិញបាន ។
រំលឹកដែរថា ៖ ដោយសារតែផ្លូវដែលឆ្លងកាត់ក្រុងកំពតរងការខូចខាតជាច្រើនកន្លែងដោយសារគ្រោះទឹកជំនន់ និងភ្លៀងធ្លាក់ខ្លាំងអស់រយៈពេលជិតមួយខែកន្លងមក ហើយការធ្វើចរាចរណ៍នៅលើផ្លូវជាតិលេខ៤ ត្រូវបានបិទមួយរយៈរថយន្តដឹកទំនិញតូចធំត្រូវឆ្លងកាត់ខេត្តកំពតទើបផ្លូវដែលឆ្លងកាត់តាមក្រុងកំពតបានរងការខូចខាតជាច្រើនកន្លែងទើបពេលនេះក្រោយពីទឹកជំនន់បានស្រក់ទៅវិញផ្លូវដែលខូចខាតទាំងប៉ុន្មានខ្សែដែលតភ្ជាប់ និងខេត្តកំពតត្រូវបានក្រសួងដាក់ឲ្យក្រុមហ៊ុនដេញថ្លៃជួសជុលឲ្យបានល្អឡើងវិញ ហើយក្រុមហ៊ុនដែលធានាជួសជុលផ្លូវទាំងនោះបានប្តេជ្ញាថា និងជួសជុលឲ្យហើយរួចរាល់មុនថ្ងៃបោះឆ្នោតខាងមុខនេះផងដែរ ៕
ចែករំលែកព័តមាននេះ