ខេត្តបាត់ដំបង ៖ សមត្ថកិច្ចបានឱ្យដឹងថា បុរសម្នាក់បានជិះម៉ូតូបុកគូទរថយន្តពីក្រោយ ដែលឈប់ស្ងៀមបណ្ដាលឱ្យស្លាប់ កាលពីវេលាម៉ោង០៩ និង១០នាទីយប់ថ្ងៃ២៤ កក្កដា នៅលើផ្លូវជាតិលេខ៥ ត្រង់ចំណុចអូរតាមៀវ ស្ថិតក្នុងភូមិពោធិ៍២ ឃំុគារ ស្រុកមោងប្ញស្សី។
ជនរងគ្រោះឈ្មោះសរ ដារ៉ា ភេទប្រុស អាយុ២៨ឆ្នាំ រស់នៅភូមិកន្សៃបន្ទាយ ឃុំមោង ស្រុកមោងប្ញស្សី ជិះម៉ូតូម៉ាកហុងដាឌ្រីម ពាក់ស្លាកលេខបាត់ដំបង1X-2099។ បើតាមសមត្ថកិច្ចថា ជនរងគ្រោះបានជិះម៉ូតូបុកគូទរថយន្តម៉ាកហ្វុយហ្សូ ពាក់ស្លាកលេខ ចង្កូតស្ដាំ PP-2466 ដែលឈប់លើចិញ្ចើមថ្នល់ក្នុងទិសដៅស្របទិសគ្នាពីកើត ទៅលិច រីឯអ្នកបើកបររថយន្តបានរត់ចោលរថយន្តទាំងយប់ នៅពេលបញ្ហាបានកើតឡើង។
សមត្ថកិច្ចដែលចុះទៅពិនិត្យកន្លែងកើតហេតុបានឱ្យដឹងថា រថយន្តនោះបានខូច ហើយបានឈប់នៅចំណុចខាងលើ ដើម្បីជួសជុល ។ ប៉ុន្តែពេលចតនៅលើចិញ្ចើមផ្លូវនោះ អ្នកបើកបរបានដាក់មែកឈើតូចមួយ ជាសញ្ញាដែរ តែដាក់កៀកនឹងរថយន្តពេក ដែលជាហេតុ នាំឲ្យអ្នកជិះម៉ូតូមើលមិនឃើញទើបជិះបុកពីក្រោយពេញទំហឹងបណ្ដាលឲ្យស្លាប់បែបនេះ។
មន្ត្រីជំនាញបាននិយាយដែរថា នេះជាការធ្វេសប្រហែសរបស់ភាគីខាងរថយន្ត ដែលឈប់រថយន្តលើដងផ្លូវ មិនបានដាក់ស្លាកសញ្ញាឲ្យបានត្រឹមត្រូវ ។ បន្ទាប់ពីពិនិត្យទីតាំងកើតហេតុ មើលមិនឃើញ ទើបនាំឲ្យ អ្នកដំណើរជិះបុកគ្រោះថ្នាក់ ។
ទោះយ៉ាងណា សាកសពត្រូវបានក្រុមគ្រួសារយកទៅធ្វើបុណ្យតាមប្រពៃណី រីឯរថយន្តនិងម៉ូតូត្រូវបានសមត្ថកិច្ចយកទៅរក្សាទុកនៅអធិការនគរបាលស្រុកមោងប្ញស្សី ដើម្បីដោះស្រាយតាមនីតិវិធីច្បាប់ ។
ចែករំលែកព័តមាននេះ