រាជធានីភ្នំពេញ ៖ ស្ត្រីម្នាក់រួមជាមួយនឹងសាច់ញាតិបានលើកគ្នាស្វែងរកប្តីរបស់ខ្លួនដែលសម្ងំលួចមានស្រីថ្មី ទីបំផុតបានប្រទះឃើញប្តីមានស្រីថ្មី រហូតមានកូនម្នាក់កំពុងស្នាក់នៅក្នុងភូមិសាស្ត្រសង្កាត់ស្ទឹងមានជ័យ ។ ដំណើរតាមដានប្តី ហើយប្រទះឃើញរស់នៅជាមួយស្រីថ្មីនេះកើតឡើងកាលពីវេលាព្រឹកថ្ងៃទី២៦ មីនា ២០១១ ។
តាមប្រភពព័ត៌មានដែលទម្លាយឱ្យដឹងត្រួសៗពីសាច់ញាតិខាងប្រពន្ធដើម បានឱ្យដឹងថា បុរសដែលមានប្រពន្ធមានកូន២នាក់ហើយលួចមានស្រីថ្មី និងមានកូនម្នាក់ទៀតនោះ ជាមន្ត្រីនគរបាលក្រសួងមហាផ្ទៃ មានឋានន្តរស័ក្តិវរសេនីយ៍ឯក ។ ខណៈបុរសជាមន្ត្រីនគរបាលលួចរួមរស់ជាមួយស្រីថ្មីនេះ ពុំបានគិតគូរដល់សុខទុក្ខប្រពន្ធកូនឡើយ ហើយថែមទាំងមានគំនិតចង់បានទ្រព្យសម្បត្តិពីប្រពន្ធដើមយកទៅផ្គាប់ចិត្តប្រពន្ធចុង (នេះបើតាមការអះអាងពីញាតិខាងប្រពន្ធដើម) ។
ដោយឡែកតាមការរៀបរាប់របស់សាច់ញាតិខាងប្រពន្ធចុងវិញបានទម្លាយថា លោកប៉ូលិសស័ក្តិ៥ ដែលពាក់ព័ន្ធបញ្ហាមានប្រពន្ធ២ខាងលើបានលែងលះគ្នាជាមួយប្រពន្ធដើមស្រេចបាច់ហើយ ។ ប៉ុន្តែចំណែកឯស្ត្រីជាប្រពន្ធដើមបាននិយាយថា នាងពុំទាន់មានសាលក្រមលែងលះគ្នានៅឡើយទេ ព្រោះតុលាការពុំទាន់បានសម្រេចដល់អង្គសេចក្តីឡើយ គឺទុកឱកាសឱ្យលោកប៉ូលិសខាងលើធ្វើការកែប្រែអត្តចរិត មករួមរស់ជាមួយប្រពន្ធដើមវិញ តែលោកប្តីប៉ូលិសនោះមិនត្រឡប់ក្រោយឡើយ គឺទៅរួមរស់ជាមួយស្រីថ្មីរហូតគាត់តាមទាន់ជាក់ស្តែងនឹងភ្នែក ។ ដូច្នេះគាត់ (ប្រពន្ធដើម) សម្រេចចិត្តសុំឱ្យនគរបាលប៉ុស្តិ៍ស្ទឹងមានជ័យ ក៏ដូចជាសាលាសង្កាត់ស្ទឹងមានជ័យជួយកសាងឯកសារបញ្ជាក់ថា ស្ត្រីម្នាក់ដែលនាងនាំមកស្នាក់ការនគរបាលប៉ុស្តិ៍ស្ទឹងមានជ័យនេះពិតជាប្រពន្ធចុងរបស់ប្តីគាត់ប្រាកដមែន ដើម្បីរូបគាត់មានឯកសារយោងប្តឹងទៅតុលាការសុំលែងលះគ្នាឱ្យស្រេចបាច់តែម្តង ។
សូមបញ្ជាក់ថា តួអង្គទាំងអស់ក្នុងរឿងស្នេហាត្រីកោណខាងលើនេះ កោះសន្តិភាពសុំមិនធ្វើការផ្សាយព័ត៌មានដាក់ចំអត្តសញ្ញាណបុគ្គល ឡើយ ម្យ៉ាងទៀតខាងសមត្ថកិច្ចមូលដ្ឋានក៏ពុំបានសួរនាំចងក្រងជាឯកសាររឿងនេះដែរ ព្រោះរឿងរ៉ាវខាងលើនេះពាក់ព័ន្ធដល់តុលាការរួចទៅហើយ ទុកឱ្យតុលាការចាត់ការចុះ ៕
ចែករំលែកព័តមាននេះ