រាជធានីភ្នំពេញ ៖ បុរស២នាក់បានជិះម៉ូតូក្នុងស្ថានភាពស្រវឹងជ្រុលទៅបុកនឹងរថយន្តដឹកសំរាមរបស់ក្រុមហ៊ុនស៊ីនទ្រីចំពីក្រោយពេញទំហឹងបណ្តាលអោយមានអ្នករងរបួសធ្ងន់ម្នាក់និងស្រាលម្នាក់ ដែលហេតុការណ៍នេះដែរបានកើតឡើងនៅវេលាម៉ោង១១យប់ ថ្ងៃទី២៤ ខែកក្កដា ឆ្នាំ២០១៨ ស្ថិតលើផ្លូវវ៉េងស្រេង ភូមិដំណាក់៣ សង្កាត់ស្ទឹងមានជ័យ៣ ខណ្ឌមានជ័យ ។
តាមប្រភពព័ត៌មានពីកន្លែងកើតហេតុបានអោយដឹងថា មុនពេលកើតហេតុគេបានឃើញរថយន្តដឹកសំរាមរបស់ក្រុមហ៊ុនស៊ីនទ្រី ពណ៌លឿងមួយគ្រឿង បានបើកប្រមូលសំរាមតាមផ្លូវវ៉េងស្រេងក្នុងទិសដៅពីកើតទៅលិចដោយមានគ្នីគ្នាបីនាក់ ។
លុះដល់រថយន្តបើកមកដល់ចំណុចកើតហេតុក៏ស្រាប់តែបុរសពីរនាក់បានជិះម៉ូតូម៉ាក់ស៊ុយសុគីនិច ពណ៌ផ្កាឈូក ពាក់ស្លាកលេខ ភ្នំពេញ 2FA-9239 បានធ្វើដំណើរក្នុងទិសដៅស្របគ្នាហើយល្បឿនលឿន ព្រមទាំងស្រវឹងផងនោះធ្វើអោយម៉ូតូបានជ្រុលបុកនឹងរថយន្តដឹកសំរាមរបស់ក្រុមហ៊ុនស៊ីនទ្រីចំពីក្រោយបណ្តាលអោយម៉ូតូដួលបាក់ខ្នងខាងមុខ ព្រមទាំងធ្វើអោយអ្នកបើកម៉ូតូរងរបួសបែកក្បាល សន្លប់ស្តូកស្តឹង ចំណែកអ្នកអង្គុយខាងក្រោយរងរបួសរលាត់ដៃរលាត់ជើង ទាំងពីរនាក់ត្រូវបានរថយន្តសង្គ្រោះបានមកដឹកយកទៅសង្គ្រោះនៅគ្លិនិកឯកជន ។
រថយន្តដឹកសំរាមរបស់ក្រុមហ៊ុនស៊ីនទ្រីនៅពេលបង្កគ្រោះថ្នាក់រួចហើយគឺមិនបានឈប់ដោះស្រាយនៅកន្លែងកើតហេតុទេ បានបើករថយន្តគេចពីកន្លែងកើតហេតុ១០០ម៉ែត្រក៏ត្រូវបានបងប្អូនប្រជាពលរដ្ឋនាំគ្នាដេញឃាត់រថយន្ត និងអ្នកបើកបរបាន ។ ពេលនោះដែរសមត្ថកិច្ចបានចុះទៅដល់កន្លែងកើតហេតុរវល់តែសួរនាំពីដំណើររឿងធ្វើអោយអ្នកបើកបររថយន្តឆ្លៀតឱកាសបានគេចខ្លួនបាត់ ។
ក្រោយពេលកើតហេតុដោយសារតែអត់មានដំណោះស្រាយ រថយន្ត និងម៉ូតូ ត្រូវបានសមត្ថកិច្ចជំនាញ់បានមកធ្វើការវាស់វែងយកទៅរក្សាទុកនៅការរិយាល័យចរាចរណ៍ជើងគោករាជធានីភ្នំពេញដើម្បីរងចាំធ្វើការដោះស្រាយនៅពេលក្រោយជាបន្តទៀត ៕
ចែករំលែកព័តមាននេះ